លោកពុំ សុផល អតីតអភិបាលរងស្រុកកំពង់លែង និងលោកលឹម ដានីន អតីតប្រធានការិយាល័យប្រជាពលរដ្ឋស្រុក ដែលត្រូវបានតុលាការផ្តន្ទាទោសម្នាក់ពី៣ ទៅ៤ឆ្នាំ។ រូបថត សហការី
កំពង់ឆ្នាំងៈ អភិបាលរងស្រុកកំពង់លែង លោកពុំ សុផល, ប្រធានការិយាល័យប្រជាពលរដ្ឋស្រុក លោកលឹម ដានីន រួមនឹងម្ចាស់សិប្បកម្មផលិតទឹកកកម្នាក់ត្រូវបានតុលាការខេត្តកំពង់ឆ្នាំងធ្វើការផ្តន្ទាទោសដាក់ពន្ធនាគារក្នុងម្នាក់ៗពី៣ ទៅ៤ឆ្នាំនាថ្ងៃទី១២ ខែធ្នូនេះ ពាក់ព័ន្ធទៅនឹងការទន្រ្ទានដីព្រៃលិចទឹកក្នុងបឹងទន្លេសាបប្រមាណជា៩ហិកតា។
ចៅក្រមជំនុំជម្រះ នៃសាលាដំបូងខេត្តកំពង់ឆ្នាំង បានប្រកាសសាលក្រម ព្រហ្មទណ្ឌ លេខ ៨០ “ឆ” ចុះថ្ងៃទី១២ ខែធ្នូ ឆ្នាំ ២០២៤ ដោយបានសម្រេចផ្តន្ទាទោសជនជាប់ចោទចំនួន៣នាក់។ ក្នុងនោះ រួមមាន ឈ្មោះ ពុំ សុផល អាយុ ៥៩ឆ្នាំ ជា អភិបាលរងស្រុកកំពង់លែង, ឈ្មោះលឹម ដានីន អាយុ ៥៣ ឆ្នាំ ជា ប្រធានការិយាល័យប្រជាពលរដ្ឋស្រុកកំពង់លែង និងឈ្មោះ ជួន តុំ ភេទ ប្រុស អាយុ ៥៣ឆ្នាំ មុខរបរម្ចាស់សិប្បកម្មផលិតទឹកកកត្រពាំងពេជ្រ។
សេចក្តីប្រកាសព័ត៌មានរបស់តុលាការខេត្តកំពង់ឆ្នាំងបានឱ្យដឹងថា ជនជាប់ចោទចំនួន២ ឈ្មោះលឹម ដានីននិងឈ្មោះ ជួន តុំត្រូវបានផ្តន្ទាទោសដាក់ពន្ធនាគារក្នុងម្នាក់ៗ ចំនួន៤ឆ្នាំ និងពិន័យជាប្រាក់ចំនួន ១០ដប់លានរៀល។
អ្នកទាំង២ត្រូវបានចោទប្រកាន់ពីបទ បំផ្លាញ គៃបំបាត់ និងកាប់ឆ្ការគាស់រានឈូសឆាយដីព្រៃលិចទឹក ប្រព្រឹត្តនៅចំណុចតាទុំ ភូមិកង្កែប ឃុំច្រណូក ស្រុកកំពង់លែង ខេត្តកំពង់ឆ្នាំង កាលពីអំឡុងខែមីនា ឆ្នាំ២០២៤ តាម មាត្រា៦០៨ នៃក្រមព្រហ្មទណ្ឌ មាត្រា៣២ នៃច្បាប់ស្តីពីការប្រឆាំងអំពើពុករលួយ និងមាត្រា៩៨ ចំណុច១ នៃច្បាប់ ស្តីពីជលផល។
សេចក្តីប្រកាសបញ្ជាក់ថា៖«រីឯជនជាប់ចោទ១ រូបទៀត ជាអភិបាលរងស្រុកកំពង់លែង ត្រូវបានផ្តន្ទាទោសដាក់ពន្ធនាគារ ចំនួន៣ឆ្នាំ និងពិន័យជាប្រាក់ចំនួន ៦លានរៀល ក្នុងអំពើសម គំនិតពីបទបំផ្លាញ គៃបំបាត់ និងកាប់ឆ្ការគាស់រានឈូសឆាយ ដីព្រៃលិចទឹក ប្រព្រឹត្ត នៅចំណុចតាទុំ ភូមិកង្កែប ឃុំច្រណូក ស្រុកកំពង់លែង កាលពីអំឡុងខែមីនា ឆ្នាំ២០២៤»។
ជនជាប់ចោទឈ្មោះពុំ សុផលត្រូវបានចោទប្រកាន់តាម មាត្រា២៩ មាត្រា៦០៨ នៃក្រមព្រហ្មទណ្ឌ មាត្រា៣២ នៃច្បាប់ស្តីពី ការប្រឆាំងអំពើពុករលួយ និងមាត្រា៩៨ ចំណុច១ នៃច្បាប់ស្តីពីជលផល។
ចំពោះវត្ថុចាប់យកមួយចំនួន ត្រូវបានតុលាការសម្រេចរឹបអូស និងមួយចំនួនទៀត ត្រូវបានប្រគល់ឱ្យ ម្ចាស់ដើមវិញ។
ជនចាប់ចោទទាំង៣នាក់ត្រូវបានអង្គភាពប្រឆាំងអំពើពុករលួយ(អ.ប.ព.) ធ្វើការឃាត់ខ្លួន និងបញ្ជូនទៅ តុលាការខេត្តកំពង់ឆ្នាំងកាលពីខែមេសាកន្លងមកពាក់ព័ន្ធនឹងការទន្ទ្រានយកព្រៃលិចទឹកក្នុងបឹងទន្លេសាបតំបន់២ប្រមាណជា ៩ហិកតា។
កាលពីឆ្នាំ២០២១ អង្គភាពប្រឆាំងអំពើពុករលួយក៏បានមានចំណាត់ការផ្លូវច្បាប់ចំពោះឧត្តមសេនីយ៍ត្រី ស៊ុំ សុជាតិ ស្នងការរងនគរបាលខេត្តតកំពង់ឆ្នាំង និងលោកកែវ ណារុន ប្រធានការិយាល័យអន្តរាគមន៍ នៃស្នងការដ្ឋាននគរបាលខេត្តកំពង់ឆ្នាំង ពាក់ព័ន្ធនឹងការទន្ទ្រានយកព្រៃលិចទឹកក្នុងបឹងទន្លេសាបនៅតំបន់៣ ក្នុងស្រុកកំពង់លែងផងដែរ។
អ.ប.ពបានឱ្យដឹងកាលពីពេលថ្មីៗនេះថា ដីព្រៃលិចទឹកបឹងទន្លេសាបក្នុងតំបន់៣ និងតំបន់២ ជិត៤ម៉ឺនហិកតា ត្រូវបានមនុស្សចំនួន១៧៦នាក់ រំលោភកាន់កាប់ក្នុងទ្រង់ទ្រាយធំ ដោយខុសច្បាប់។
ក្នុងនោះ មាន១៥២នាក់ បានស្ម័គ្រចិត្តប្រគល់ដីជូនរដ្ឋវិញ ដែលមានផ្ទៃដី៣០ ១០៩ ហិកតា។ ប៉ុន្តែ២៤នាក់ កាន់កាប់ខុសច្បាប់ ៩ ៤៦៣ ហិកតា ដែលអ្នកខ្លះកាន់កាប់រហូតដល់ ២ ៥០០ ហិកតា បានប្រកែកមិនព្រមប្រគល់ដីជូនរដ្ឋវិញ។
អ្នកនាំពាក្យ អង្គភាពប្រឆាំងអំពើពុករលួយ លោកសយ ច័ន្ទវិចិត្ត បានឱ្យដឹងថា អ.ប.ពកំពុងតែមានចំណាត់ការបន្តទៅលើបញ្ហាទន្រ្ទានយកដីធ្លីនៅក្នុងបឹងទន្លេសាបនេះ៕
