លោក លី ធុជ (ស្ដាំ) និងលោកស្រី Devyani Uttam Khobragade ក្នុងពិធីចុះអនុស្សរណៈនៃការយោគយល់គ្នាអំពីការបោសសម្អាតមីននៅភូមិកោះប៉ោ ឃុំបាក់ខ្លង ស្រុកមណ្ឌលសីមា ខេត្តកោះកុង នៅថ្ងៃទី១៣ ខែធ្នូ ២០២៤។ CMAA
រដ្ឋាភិបាលឥណ្ឌាបន្តគាំទ្រគម្រោងបោសសម្អាតមីននេះនៅកម្ពុជា ដោយបន្ថែមជំនួយឥតសំណងក្នុងទឹកប្រាក់ ៥ម៉ឺនដុល្លារសម្រាប់អនុវត្តគម្រោងបោសសម្អាតមីនលើផ្ទៃដីមានមីនចំនួន ១៩៦ ៨១០ ម៉ែត្រក្រឡា ក្នុងភូមិកោះប៉ោ ឃុំបាក់ខ្លង ស្រុកមណ្ឌលសីមា ខេត្តកោះកុង។
ជំនួយឥតសំណងនេះត្រូវបានធ្វើឡើងតាមរយៈការអនុស្សរណៈនៃការយោគយល់គ្នាមួយនៅថ្ងៃទី១៣ ខែធ្នូនេះ ក្រោមក្រមខណ្ឌគម្រោងផ្តល់ផលរហ័ស «Quick Impact Projects» ដែលចុះហត្ថលេខាដោយលោក លី ធុជ ទេសរដ្ឋមន្រ្តី អនុប្រធានទី១ អាជ្ញាធរមីន និងលោកស្រី Devyani Uttam Khobragade ឯកអគ្គរដ្ឋទូតឥណ្ឌាប្រចាំនៅកម្ពុជា។
លោក លី ធុជ បានថ្លែងអំណរគុណដល់ប្រទេសឥណ្ឌា និងស្ថានទូតឥណ្ឌា ដោយថ្លែងថា៖ «ការគាំទ្រឥតងាករេរបស់ឥណ្ឌា និងការប្រឹងប្រែងនានាមានសារៈសំខាន់ក្នុងបន្ថែមទៅលើគំនិតផ្ដួចផ្ដើមសង្គ្រោះជីវិតមនុស្ស ដែលនឹងនាំមកនូវសុវត្ថិភាព ក្ដីសង្ឃឹម និងឱកាសអភិវឌ្ឍន៍សម្រាប់ប្រជពលរដ្ឋខេត្តកោះកុង»។
លោកបន្តថា ជំនួយឥតសំណងសម្រាប់ការសម្អាតមីននៅភូមិកោះប៉ោនេះ គឺជាសក្ខីភាពនៃការប្ដេជ្ញាចិត្តរបស់ឥណ្ឌាសម្រាប់បុព្វហេតុមនុស្សធម៌ និងការអភិវឌ្ឍប្រទេសដោយចិរភាពនៅកម្ពុជា។
យោងតាមអាជ្ញាធរមីន ប្រទេសឥណ្ឌាបានចូលរួមបោសសម្អាតមីនមនុស្សធម៌នៅកម្ពុជា ចាប់តាំងពីឆ្នាំ២០២២ ក្រោមកិច្ចសហការជាមួយអាជ្ញាធរមីន និងធ្វើការបោសសម្អាតនៅក្នុងខេត្តកោះកុង លើផ្ទៃដីប្រមាណ ២,២០ គីឡូម៉ែត្រក្រឡា ដែលអនុវត្តដោយមជ្ឈមណ្ឌលជាតិរក្សាសន្តិភាព (NPMEC)។
ស្ថានទូតឥណ្ឌា ក៏បានរួមចំណែកក្នុងការផ្តល់នូវអវយវៈសិប្បនិមិត្តដល់ជនមានពិការភាពដោយសារមីន និងសំណល់ជាតិផ្ទុះពីសង្រ្គាមជាង ៧០០ នាក់ នៅខេត្តបន្ទាយមានជ័យ ផងដែរ។
លោស្រី Devyani Uttam Khobragade ថ្លែងថា រដ្ឋាភិបាលឥណ្ឌា ក្នុងក្របខណ្ឌគម្រោងផ្តល់ផលរហ័សនេះ មិនត្រឹមតែចូលរួមចំណែកដល់ការងារបោសសម្អាតមីនប៉ុណ្ណោះទេ ថែមរួមចំណែកដល់ការអភិវឌ្ឍនៅទីជនបទ វិស័យអប់រំ និងការលើកកម្ពស់យេនឌ័រ ផងដែរ៕
