ប្រជាពលរដ្ឋបានជួបជាមួយក្រុមមេធាវីរាជរដ្ឋាភិបាល នាពេលកន្លងមក ដើម្បីប្រគល់សិទ្ធិការពារក្តី ជូនពួកគាត់ ក្នុងសំណុំរឿង អតីតឧកញ៉ា ឡេង ចាន់ណា។ រូបថតៈ ក្រុមមេធាវីរាជរដ្ឋាភិបាល
ភ្នំពេញៈ តុលាការខេត្តសៀមរាប បានកោះហៅមន្រ្តី២រូបទៅបំភ្លឺ ពាក់ព័ន្ធករណីឆបោករបស់អតីតឧកញ៉ា ឡេង ចាន់ណា បន្ទាប់ពីមនុស្សប្រហែលជា ២០នាក់ហើយត្រូវបានឃាត់ខ្លួននៅក្នុងសំណុំរឿងក្រុមហ៊ុន ប្រ៊ីលាន ស៊ីធី វើលដ៍ឯកនេះ ។
ការផ្សព្វផ្សាយដីកាជាសាធារណនេះ បានកើតមានឡើងក្រោយពីលោកនាយករដ្ឋមន្រ្តីហ៊ុន ម៉ាណែតបានថ្លែងកាលពីសប្តាហ៍មុនថា មេធាវីរាជរដ្ឋាភិបាលបានស្នើដីកា ដើម្បីកោះហៅ អ្នកពាក់ព័ន្ធបន្ថែមទៀត ក្នុងដំណើរការ ស៊ើបសួរករណីនេះបន្ថែម។
ចៅក្រមស៊ើបសួរនៃសាលាដំបូងខេត្តសៀមរាប លិ ស៊ីវទានបានចេញដីកាកោះហៅ លោកស ថាវីអនុរដ្ឋលេខាធិការក្រសួងការពារជាតិ ឱ្យចូលបំភ្លឺ ជាសាក្សី នៅថ្ងៃទី១១ ខែធ្នូ និងលោកស៊ាន បូរ៉ាត រដ្ឋលេខាការក្រសួងអប់រំ យុវជន និងកីឡា នៅថ្ងៃទី១៨ ខែធ្នូនេះ។
ដីកាចុះថ្ងៃទី១៨ ខែវិច្ឆិកាបញ្ជាក់ថា ការកោះហៅនេះគឺ «ដើម្បីចូលទៅបំភ្លឺពីដំណើររឿង ឆបោកមានស្ថានទម្ងន់ទោសជាក្រុមមានការចាត់តាំង ដែលបានប្រព្រឹត្តនៅភូមិតាវៀន សង្កាត់ សាលាកំរើក ក្រុងសៀមរាប កាលពីអំឡុងឆ្នាំ២០២២»។ នេះជាបទល្មើសព្រហ្មទណ្ឌ ដែលមានចែងឱ្យផ្តន្ទាទោស តាមបញ្ញត្តិមាត្រា៣៧៧ និងមាត្រា៣៨០ កថាខណ្ឌ១ ចំណុច៥ នៃក្រមព្រហ្មទណ្ឌ។
មួយវិញទៀត ពីបទ សម្អាតប្រាក់ ប្រព្រឹត្តនៅខេត្តសៀមរាប និងទីតាំងផ្សេងទៀតក្នុងប្រទេសកម្ពុជា កាលពីអំឡុងឆ្នាំ២០១៨ រហូត ដល់បច្ចុប្បន្ន។
នេះក៏ជា បទល្មើសព្រហ្មទណ្ឌ ដែលមានចែងឱ្យផ្តន្ទាទោសតាមបញ្ញត្តិមាត្រា៣៨ នៃច្បាប់ស្តីពីការប្រឆាំងការ សំអាតប្រាក់ និងហិរញ្ញប្បទានភេរវកម្ម និងពីបទ មិនបំពេញកាតព្វកិច្ចចំពោះឧបករណ៍ ដែលអាចជួញដូរបាន ប្រព្រឹត្តនៅភូមិតាវៀន សង្កាត់សាលាកំរើក ក្រុងសៀមរាប កាលពីថ្ងៃទី១៣ ខែធ្នូ ឆ្នាំ២០២៣ បទល្មើសព្រហ្មទណ្ឌមានចែងឱ្យផ្តន្ទាទោសតាមបញ្ញត្តិមាត្រា២៣១ នៃច្បាប់ស្តីពីឧបករណ៍ដែលអាចជួញដូរបាន និងប្រតិបត្តិការទូទាត់សងប្រាក់។
មេធាវីរាជរដ្ឋាភិបាល បានជួបផ្ទាល់ ជាមួយនឹងពលរដ្ឋសរុបចំនួន១៤ លើក ចាប់តាំងពីខែឧសភាកន្លងមក បន្ទាប់ពីប្រមុខរាជរដ្ឋាភិបាលបានផ្តល់សិទ្ធិឱ្យជួយការពារក្តីជូនជនរងគ្រោះរួចមក។ ក្នុងនោះ មានជនរងគ្រោះសរុបចំនួន ៤ ៩២៩ រូបបានប្រគល់សិទ្ធិជូនមេធាវី ដើម្បីការពារសិទ្ធិ និងផលប្រយោជន៍ដល់ពួកគាត់។
ក្នុងពិធី បិទសន្និបាតបូកសរុបលទ្ធផលការងារ ឆ្នាំ២០២៤ និងទិសដៅការងារឆ្នាំបន្ត របស់ក្រសួងដែនដី នគរូបនីយកម្ម និងសំណង់ កាលពីសប្តាហ៍មុន លោកនាយករដ្ឋមន្រ្តីហ៊ុន ម៉ាណែត បានលើកឡើងថា បញ្ហានេះ មិនមានវិធីអ្វីផ្សេង ក្រៅពីប្រើយន្តការច្បាប់ ដើម្បីដោះស្រាយនោះទេ។
តុលាការខេត្តសៀមរាប និងមេធាវីរាជរដ្ឋាភិបាលបានកំពុងតែបន្តការងារនេះ ដើម្បីជួយដោះស្រាយជូន ពលរដ្ឋទាំងនោះ ដែលសំណុំរឿងនេះត្រូវការពេលវេលាច្រើន។
លោកមានប្រសាសន៍ថា៖«តាមសួរចំលើយ គាត់ប្រាប់អញ្ជឹងៗ យើងត្រូវច្បាមបន្ថែម...អញ្ជឹងកិច្ចការងារនេះ យើងធ្វើ ហើយមេធាវីរាជរដ្ឋាភិបាលបានស្នើដីកា ដើម្បីកោះហៅអ្នកបន្តបន្ទាប់ ដើម្បីយកមកស៊ើបសួរបន្ថែម ស្រាវជ្រាវរកមើល»។
ប្រមុខរដ្ឋាភិបាលបានបន្តថា៖«ខ្ញុំមើលតាមការប្រកាសរបស់តុលាការ ឃាត់ខ្លួនប្រហែលជា ២០នាក់ ហើយរៀបចំស្រាវជ្រាវបន្ថែម ដើម្បីកំណត់ ហើយបានចេញគោលការណ៍បង្ក្រកទ្រព្យសម្បត្តិអ្នកពាក់ព័ន្ធមួយចំនួន។ រឿងនេះ អត់ស្រួលទេ បើគាត់ដាក់ទ្រព្យទាំងអស់នេះនៅមួយឃ្លាំង ស្រួលណាស់។ បើកឃ្លាំង យកមកចែកគ្នាតែម្តង។ តែវាអត់នៅក្នុងឃ្លាំងតែមួយ»។
ក្រុមមេធាវីរបស់រាជរដ្ឋាភិបាលក៏បានធ្វើការជាមួយក្រសួងការបរទេស និងសហប្រតិបត្តិការអន្តរជាតិ ដើម្បីឱ្យពលករខ្មែរ ដែលកំពុងតែធ្វើការនៅក្រៅប្រទេស ហើយជាជនរងគ្រោះដែរនោះ អាចប្រគល់សិទ្ធិជូនមេធាវី ដើម្បីការពារ ជូនពួកគាត់ផងដែរ។
ទាក់ទងនឹងសំណុំរឿងក្រុមហ៊ុន ប្រ៊ីលាន ស៊ីធី វើលដ៍ឯ.ក(Brilliant City)នេះ អ្នកនាំពាក្យតុលាខេត្តសៀមរាប លោកយិន ស្រាង បានអះអាងថា លោកមិនបានចាំទេថា មានមនុស្សផ្សេងទៀតប៉ុន្មាននាក់ ដែលត្រូវបានកោះហៅទៅបំភ្លឺនោះទេ៕
