រូបថតតំណាង ដែលផលិតដោយ AI។
ភ្នំពេញ៖ ក្រសួងសុខាភិបាលកម្ពុជា បានចេញសេចក្ដីជូនដំណឹងឱ្យប្រជាពលរដ្ឋយកចិត្ដទុកដាក់ខ្ពស់ចំពោះអនាម័យ ស្របពេលរបាយការណ៍របស់អង្គការសុខភាពពិភពលោក WHO បានបង្ហាញថា នៅទូទាំងពិភពលោកមនុស្ស ២០ម៉ឺននាក់បានស្លាប់ដោយសារវីរុសណូរ៉ូ (Norovirus)។
យោងតាមសេចក្ដីប្រកាសរបស់ក្រសួងសុខាភិបាលកាលពីថ្ងៃទី១៩ ខែធ្នូម្សិលមិញ បានបង្ហាញថា៖ «អង្គការសុខភាពពិភពលោកបានរកឃើញថា ជារៀងរាល់ឆ្នាំនៅលើសកលលោក មាន ៦៨៥លានករណីបង្កដោយវីរុសណូរ៉ូ ស្លាប់ប្រមាណ ២០ម៉ឺននាក់ ក្នុងនោះដែរ ២០០លានករណី កើតលើកុមារអាយុក្រោម ៥ឆ្នាំ និងមានកុមារចំនួន ៥ម៉ឺននាក់បានស្លាប់»។
នៅលើពិភពលោក វីរុសណូរ៉ូ (Norovirus) ជាមូលហេតុចម្បងនៃការក្អួត និងរាក និងជំងឺដែលបណ្តាល មកពីអាហារ ដែលបង្កឱ្យមានជំងឺរលាកក្រពះស្រួចស្រាវ រលាកក្រពះពោះវៀន។
ក្រសួងសុខាភិបាលបានឱ្យដឹងថា ការផ្ទុះរាតត្បាតនៃជំងឺបង្កដោយវីរុសណូរ៉ូ ភាគច្រើនកើតមាននៅប្រទេសមានរដូវត្រជាក់ កន្លែងមានការប្រមូលផ្តុំ អាកាសធាតុត្រជាក់មេរោគរស់យូរ រដូវត្រជាក់ធ្វើឲ្យប្រព័ន្ធភាពស៊ាំរបស់រាងកាយចុះខ្សោយ។
បុគ្គលគ្រប់វ័យអាចឆ្លង និងឈឺដោយវីរុសណូរ៉ូ រោគសញ្ញា ជាទូទៅ កើតមានចន្លោះពី ១២ ទៅ ៤៨ម៉ោង បន្ទាប់ពីប៉ះពាល់ឬប្រឈមនឹងវីរុសណូរ៉ូ។ យ៉ាងណាមិញ ក្រសួងបានបញ្ជាក់ថា៖ «កុមារអាយុក្រោម ៥ឆ្នាំ មនុស្សចាស់ និងអ្នកដែលមានប្រព័ន្ធការពាររាងកាយខ្សោយ ទំនងជាងាយរងគ្រោះធ្ងន់ធ្ងរពេលឆ្លងវីរុស»។
រោគសញ្ញាភាគច្រើន រួមមាន រាក ក្អួត ចង្អោរ ចុកពោះ និងអាចមាន ក្តៅខ្លួន ឈឺក្បាល និងឈឺខ្លួន។ ភាគច្រើនជាសះស្បើយឡើងវិញក្នុងរយៈពេល ១ ទៅ ៣ ថ្ងៃ។
ក្រសួងបានព្រមានថា ប៉ុន្តែវីរុសអាចចម្លងមេរោគទៅអ្នកដទៃបានក្នុងអំឡុង២សប្តាហ៍ ឬលើសបន្ទាប់ពីជាសះស្បើយ។
ក្រសួងបានបន្ដថា៖ «អ្នកអាចកើតជំងឺបង្កដោយវីរុសណូរ៉ូ ច្រើនដងក្នុងជីវិត ពីព្រោះ វីរុសណូរ៉ូ មានច្រើនប្រភេទ។ ការឆ្លង វីរុសណូរ៉ូ មួយប្រភេទ មិនអាចការពារអ្នកពីប្រភេទផ្សេងទៀតឡើយ។ អាហារសមុទ្រ ជាពិសេសអយស្ទ័រឆៅ អាចមានផ្ទុកវីរុស»។
វីរុសណូរ៉ូ រីករាលដាលយ៉ាងងាយ និងរហ័សតាមវិធីផ្សេងៗគ្នា ដូចជា ការប៉ះពាល់ដោយផ្ទាល់ជាមួយអ្នកដែលមានវីរុសណូរ៉ូ ដូចជាការថែទាំអ្នកជំងឺ ការចែករំលែកអាហារ សម្ភារ ប្រើប្រាស់ និងទំនាក់ទំនងជិតស្និទ្ធជាមួយអ្នកមានវីរុសណូរ៉ូ។
ការទទួលទានអាហារ ទឹក ឬភេសជ្ជៈដែលមានមេរោគវីរុសណូរ៉ូ ក៏ដូចជាការប៉ះវត្ថុ ឬផ្ទៃមានមេរោគ និងបន្ទាប់មកដាក់ម្រាមដៃដែលមិនទាន់លាងសម្អាតនៅក្នុងមាត់ ក៏អាចឆ្លងវីរុសនេះផងដែរ។
ក្រសួងសុខាភិបាលកម្ពុជា បានណែនាំឱ្យប្រជាពលរដ្ឋយកចិត្ដទុកដាក់ខ្ពស់ចំពោះអនាម័យដើម្បីបង្ការវីរុសណូរ៉ូនេះ។ ពលរដ្ឋត្រូវប្រកាន់អនាម័យ លាងសម្អាតដៃឱ្យបានញឹកញាប់ សម្អាត និងសម្លាប់មេរោគលើផ្ទៃដែលមានមេរោគ ចម្អិនម្ហូបអាហារឱ្យបានឆ្អិនល្អ ពិសេសអាហារសមុទ្រ ពីព្រោះមេរោគស្លាប់នៅសីតុណ្ហភាពលើសពី ៦០ អង្សាសេ។
គួរចងចាំថា ពួកគេត្រូវស្នាក់នៅផ្ទះពេលឈឺរយៈពេល ២ ថ្ងៃ (៤៨ ម៉ោង) បន្ទាប់ពីបាត់រោគសញ្ញា។ បើមានរោគសញ្ញាដូចខាងលើ ពួកគេត្រូវទៅពិគ្រោះជំងឺ នៅតាមមណ្ឌលសុខភាព ឬមន្ទីរពេទ្យរដ្ឋ ដែលនៅជិតផ្ទះ។
កាលពីថ្ងៃចន្ទដើមសប្ដាហ៍នេះ ប្រទេសថៃ បានរាយការណ៍ពីការឆ្លងវីរុសណូរ៉ូជាង ១៤០០ករណីក្នុងខេត្ដរ៉ាក់យ៉ង។ យ៉ាងណាមិញ នៅកម្ពុជា មិនទាន់មានសេចក្ដីរាយការណ៍អំពីការឆ្លងវីរុសនេះនៅឡើយទេ។
វីរុសណូរ៉ូ ត្រូវបានគេរកឃើញនៅឆ្នាំ១៩៧២ មានប្រភពមកពីទីប្រជុំជន Norwalk រដ្ឋអូហៃយ៉ូ សហរដ្ឋអាមេរិក ពីកន្លែងដែលមេរោគនេះត្រូវបានរកឃើញ និងញែកដាច់ពីបណ្ដាវីរុសដទៃទៀតជាលើកដំបូងបន្ទាប់ពីការផ្ទុះឡើងនៃជំងឺរលាកក្រពះពោះវៀននៅឆ្នាំ ១៩៦៨។ នេះបើយោងតាមព្រឹត្ដិបត្ដិ The Lancet Infectious Diseases។
វីរុសណូរ៉ូ គឺជាមេរោគ RNA ខ្សែតែមួយនៃគ្រួសារ Caliciviridae។ ហ្សែនវីរុសនេះមានអត្រាផ្លាស់ប្តូរខ្ពស់ ដែលមានន័យថា វាអាចចម្លងតាមរបៀបស្រដៀងគ្នាទៅនឹងមេរោគគ្រុនផ្តាសាយ ដោយវីរុសណូរ៉ូ រវែងវិវត្តទៅជាទម្រង់ថ្មីដែលមានអនុភាពខ្ពស់ជាងប្រព័ន្ធភាពស៊ាំរបស់មនុស្ស។សម្រាប់ព័ត៌មានបន្ថែម សូមទាក់ទងលេខទូរសព្ទទាន់ហេតុការណ៍របស់ក្រសួងសុខាភិបាល លេខ១១៥ ដោយឥតគិតថ្លៃ៕
