ប្រជាពលរដ្ឋចូលរួមក្នុងដំណើរទស្សនកិច្ចទៅខេត្តនៅតំបន់ភាគឦសាន លើកទី១១ កាលពីថ្ងៃទី២១ ខែធ្នូ ដែលជាដំណើរកម្សាន្តលើកចុងក្រោយ។ រូបថត អង្គភាពអ្នកនាំពាក្យរាជរដ្ឋាភិបាល
ដំណើរទស្សនកិច្ចទៅខេត្តនៅតំបន់ប៉ែកឦសាននៃប្រទេសកម្ពុជាដែលរៀបចំឡើងដោយចំណាយថវិកាផ្ទាល់របស់លោកនាយករដ្ឋមន្ត្រី ហ៊ុន ម៉ាណែត បានឈានដល់ទីបញ្ចប់ដោយមានប្រជាពលរដ្ឋសរុបចំនួន ២ ៤០០នាក់ បានចូលរួម។
ដំណើរទស្សនកិច្ចនេះចាប់ផ្ដើមកាលពីថ្ងៃទី៧ ខែកញ្ញា ឆ្នាំ២០២៤ ហើយត្រូវបានបញ្ចប់កាលពីថ្ងៃអាទិត្យ ទី២២ ខែធ្នូនេះ ដែលមានដំណើរកម្សាន្តសរុបចំនួន ១១លើក ដោយក្នុងមួយលើកៗ មានអ្នកចូលរួមជាង ២០០នាក់ ចូលរួមធ្វើដំណើរ និងស្នាក់នៅដោយឥតគិតថ្លៃ ទៅខេត្តត្បូងឃ្មុំ ក្រចេះ ស្ទឹងត្រែង រតនគិរី និង ខេត្តមណ្ឌលគិរី។
ដំណើរកម្សាន្តនេះ ត្រូវបានប្រកាសដោយលោកនាយករដ្ឋមន្ត្រី ហ៊ុន ម៉ាណែត នៅពេលដែលក្ដីបារម្ភនៃការភ័យខ្លាចបាត់បង់ទឹកដីទៅប្រទេសជិតខាង បានពុះកញ្ជ្រោលចាប់ពីខែកក្កដា ពាក់ព័ន្ធនឹងការចូលរួមរបស់កម្ពុជាក្នុងកិច្ចសហប្រតិបត្តិការតំបន់អភិវឌ្ឍន៍ត្រីកោណ កម្ពុជា ឡាវ វៀតណាម (CLV-DTA)។ យ៉ាងណាក៏ដោយ កម្ពុជាបានដកខ្លួនពីកិច្ចសហប្រតិបត្តិការនេះហើយ។
ដំណើរកម្សាន្តនេះដឹកនាំដោយក្រសួងព័ត៌មាន និងមានការចូលរួមនិងគាំទ្ររៀបចំពីអង្គភាពអ្នកនាំពាក្យរាជរដ្ឋាភិបាល និងរដ្ឋលេខាធិការដ្ឋានទទួលបន្ទុកកិច្ចការព្រំដែន។
លោក ទេព អស្នារិទ្ធ អ្នកនាំពាក្យក្រសួងព័ត៌មានបានថ្លែងថា ដំណើរកម្សាន្តនេះ បាន ឱកាសបង្កើនភាពស្និទ្ធស្នាលសាមគ្គីជាគ្រួសារកម្ពុជាតែមួយបន្ថែមទៀត និងផ្តល់ចំណេះដឹងថ្មីៗស្តីពីការគ្រប់គ្រងតំបន់ក្រវាត់ព្រំដែន និងការការពារយ៉ាងរឹងមាំនូវអធិបតេយ្យភាពនិងបូរណភាពទឹកដីកម្ពុជា។
លោកថា អ្នកដែលបានចុះឈ្មោះចូលរួមដំណើរកម្សាន្តមានរហូតដល់ទៅ ៤ ៤០៦នាក់ ប៉ុន្តែ ការរៀបចំអាចធ្វើបានតែសម្រាប់មនុស្ស ២ ៤០០នាក់ប៉ុណ្ណោះ។
លោកថ្លែងថា៖ «ទស្សនកិច្ចនេះត្រូវបានចាត់ទុកជាដំណើរទស្សនកិច្ចកម្រ ព្រោះជាទស្សកិច្ចពលរដ្ឋលើកដំបូងបង្អស់សម្រាប់កម្ពុជា ឬអាចថាក្នុងតំបន់ទាំងមូលក៏ថាបាន ហើយបានក្លាយជាសក្ខីកម្មរស់ដោយប្រជាពលរដ្ឋដ៏សំខាន់ស្តីពីការពិតនិងស្ថានភាពជាក់ស្តែងលើកិច្ចការព្រំដែន ការគ្រប់គ្រងនិងការពារទឹកដីរបស់រាជរដ្ឋាភិបាលកម្ពុជា»។
លោកបន្តថា ដំណើរទស្សនកិច្ចពលរដ្ឋនេះគឺទឡ្ហីករណ៍ដ៏សំខាន់ជម្រះអស់មន្ទិលទាំងឡាយជុំវិញការងារព្រំដែន ហើយបញ្ជាក់ពីភាពច្បាស់លាស់ប្រាកដរស់រដ្ឋាភិបាលកម្ពុជាក្នុងការបន្តបេសកកម្ម ការពារអធិបតេយ្យភាពជាតិ បូរណភាពទឹកដី។
លោក ឈត ប៊ុនថង អ្នកសិក្សាស្រាវជ្រាវផ្នែកវប្បធម៌ អប់រំ និងទេសចរណ៍ បានថ្លែងថា តំបន់ភាគឦសានជាកន្លែងពិបាកទៅដល់ ហើយជាតំបន់ដែលមនុស្សភាគច្រើនបារម្ភខ្លាចបាត់បង់ទឹកដី ហើយការរៀបចំដំណើរកម្សាន្តនេះបានជួយឲ្យមនុស្សជាច្រើនបានឃើញ និងជម្រះមន្ទិលសង្ស័យ។
លោកថ្លែងថា៖ «ប្រសិនបើមនុស្សគ្រប់គ្នាបានដឹង បានឃើញកន្លែងដែលមានក្ដីបារម្ភ និងអាថ៌កំបាំង វាលែងជារឿងអាថ៌កំបាំងទៀតហើយ។ បើសិនវាលែងជារឿងអាថ៌កំបាំង វាក៏មិនអាចក្លាយជាកម្មវត្ថុនៃរឿងនយោបាយ ឬការយកទៅបំប៉ោងដោយមនុស្សមួយចំនួនដើម្បីកេងចំណេញនយោបាយ»។
យ៉ាងណាក៏ដោយ លោកលើកទឹកចិត្តដល់ការបន្តកសាងហេដ្ឋារចនាសម្ព័ន្ធនៅតាមព្រំដែន ដូចជាផ្លូវជាដើម ដើម្បីបំបាត់អាថ៌កំបាំងទាំងឡាយ។ ប្រសិនបើកន្លែងមួយមិនមានមនុស្សភាគច្រើនទៅដល់ គេអាចនិយាយអ្វីមួយក៏បាន ហើយពលរដ្ឋងាយនឹងជឿ។
ក្រៅពីបានដឹងពីរឿងព្រំដែន លោកថា ដំណើរកម្សាន្តនេះជួយឲ្យពលរដ្ឋបានយល់ដឹងពីវប្បធម៌ ទំនៀមទម្លាប់ បរិស្ថាន ធនធានធម្មជាតិ និងជំរុញទឹកចិត្តពលរដ្ឋឲ្យស្រឡាញ់ទឹកដី និងធនធានធម្មជាតិរបស់កម្ពុជា ដែលកន្លែងខ្លះមានភាពស្រស់ស្អាត និងសម្បូរជាងប្រទេសមួយចំនួន៕
