ភ្នំពេញៈ​ ប្រមុខរដ្ឋាភិបាលបានបញ្ជាក់ថា គ្មានការផ្លាស់ប្តូរដាក់ភាសាបរទេសណាមួយ ជំនួសភាសាខ្មែរជា​ភាសា​ជាតិ​នោះទេ ហើយបានជម្រុញ ឱ្យមានការពង្រឹងបន្ថែមទៀត នូវ​ចំណេះដឹង​មូលដ្ឋាន​លើ​ភាសាខ្មែរ ​ចាប់​ពី​ថ្នាក់​មតេ​យ្យឡើ​ង​ទៅ​​។

ការថ្លែងបញ្ជាក់ នេះបានធ្វើឡើងនាថ្ងៃចន្ទ ទី២៣ ខែធ្នូ នេះ ក្នុងពេល ដែលលោក​ នាយករដ្ឋមន្ត្រី ហ៊ុន ម៉ា​ណែ​​ត​ជួ​ប​សំ​ណេះសំ​ណា​ល​ជា​មួយ​សិស្សនិទ្ទេស A ចំនួន ២២២៥​នាក់ នៃ​ការ​ប្រឡង​សញ្ញាប​ត្រម​ធ្យ​ម​សិក្សា​ទុ​តិ​យ​ភូ​មិ​​បាក់ឌុប និង​ប្រឡងសញ្ញាបត្របច្ចេកទេស និង​វិជ្ជា​ជីវៈកម្រិត៣ ឆ្នាំ២០២៤ ។

នេះក៏ជាការឆ្លើយតបទៅនឹងការប្រឌិ​តព័​ត៌​មា​ន​ក្លែ​ង​ក្លាយនាពេលថ្មីៗនេះ ពាក់ព័ន្ធទៅនឹងការផ្លាស់ប្តូរភាសាជាតិ​ផង​ដែ​រ​។

លោក​នាយករដ្ឋមន្ត្រីមានប្រសាសន៍ថា៖«ថ្ងៃមុន នៅមិននៅទៅស្រែកថា ក្រសួងអប់រំ ដាក់បញ្ជូលភាសាវៀតណាម ចូលនៅក្នុងប្រព័ន្ធជាភាសាជាតិ នៅក្នុងកម្មវិធីអប់រំរបស់ជាតិ។ អត់មានទេ ខ្ញុំសុំបញ្ជាក់ ដរាបណា គណបក្សប្រជាជន នៅដឹកនាំប្រទេស ភាសាខ្មែរ នៅតែភាសាជាតិ តែ១គត់របស់កម្ពុជា»។​

ប្រមុខរដ្ឋាភិបាលបានបន្តថា ការសិក្សាភា​សា​ប​​រទេស​ផ្សេងៗ ដូច​ជាភា​សា​បា​រំាង និង​អង់​គ្លេ​សជាដើម គឺជារសិក្សា​ប​ន្ថែម​តែប៉ុណ្ណោះក្នុងកម្មវិធីសិក្សាជាតិ។ លើសពីនោះ ទាំងរដ្ឋាភិបាល ក៏ដូច​ជាក្រសួងអប់រំ យុវជន និងកីឡាគ្មាន​ផែនការយកភាសាបរទេសណាមួយទៅជំនួស ភាសាខ្មែរនោះទេ។

លោកនាយករដ្ឋមន្រ្តីថ្លែងដូច្នេះថា៖«ហេតុនេះហើយបានជាយើងដាក់ទិសដៅ ​ពង្រឹងសាលាបឋសិក្សា គឺយើ​ងធ្វើ​យ៉ាង​ណា ពង្រឹងមូលដ្ឋានភាសាខ្មែរ ឱ្យកាន់តែរឹងមាំទាំងពីថ្នាក់បឋមឡើងមក។ នេះហើយដែលយើងត្រូវធ្វើ។ ជន​​​ជាតិ​ខ្មែរ ត្រូវរៀនភាសាខ្មែរ»។

លោកបានលើកឡើងថា ការអភិវឌ្ឍន៍ភាសាខ្មែរ មានជាបន្តបន្ទាប់ ដែលចាប់ទាំងពីចារលើ សាស្ត្រាស្លឹករឹត ទៅជា ការសរសេរលើសៀវភៅ, លើក្រដាស និងបោះពុម្ពថែមទៀតផង។ លើសពីនោះ មិនត្រឹមតែ​មាន​ការ​រៀន​សរ​សេរ​ភាសា​ខ្មែរ​នៅ​សាលានោះទេ។ ប៉ុន្តែភាសាខ្មែរ ថែមទាំងត្រូវបានដាក់បញ្ជូនទៅក្នុងហ្គូហ្គល(google)។ នេះជាការជំរុញ ភាសា​ខ្មែរ​ឱ្យ​ទាន់សម័យបច្ចេកវិទ្យាឌីជីថល ។

លោកមានប្រសាសន៍ថា៖«ឥលូវ គឺភាសាខ្មែរចូលទៅក្នុងប្រព័ន្ធឌីជីថល ដើម្បីឱ្យកូនខ្មែរ ប្រើប្រាស់កាន់តែច្រើន។ ពី​មុនគេថា ប្រើឌីជីថល ទាល់តែយើងរៀនអង់គ្លេស ព្រោះយើងអត់មានភាសាខ្មែរ នៅក្នុងKeyboard។ ឥលូវ​យើង​មាន​ហើយ សូមម្បីតែgoogleក៏ចេះភាសាខ្មែរដែរ គួរមានមោទនភាព...អញ្ជឹងកុំភ័យកុំព្រួយថា រាជរដ្ឋាភិបាល ឬ​ក្រ​សួង​អប់រំ លក់ភាសាជាតិ យកភាសាផ្សេងយកមកដាក់។ អត់ទេ ព្រោះអានេះព័ត៌មានប្រឌិតក្លែងក្លាយ»។

ទោះយ៉ាងណា ប្រមុខរដ្ឋាភិបាលបានណែនាំ កុំទាន់ឱ្យសិស្សានុសិស្សពីថ្នាក់១ ដល់៣ប្រើប្រាស់កុំព្យូទ័រច្រើនពេក ប៉ុន្តែ​ត្រូវ ដាក់បន្ថែមម៉ោងរៀនអានអក្សរខែ្មរឱ្យបានច្រើន ព្រោះថា បើសិស្សចាប់ផ្តើមពឹងទៅលើសម្ភារបច្ចេកវិទ្យាច្រើន តាំងពីតូចមកនោះ វាធ្វើឱ្យខាតនូវផលប្រយោជន៍ផ្សេងទៀត ដែលពាក់ព័ន្ធនឹងការហ្វឹកហ្វឺនជាដើម។

លោកថ្លែងថា៖«សូមកុំឱ្យបេសកម្មរបស់យើង ចោលមូលដ្ឋានឱ្យសោះ ព្រោះទា​ល់តែមាន​មូល​ដ្ឋា​នរឹ​ងមាំ​បាន​ទៅ​​ប្រើប​ច្ចេកវិទ្យាហ្នឹងកាន់តែមានប្រសិទ្ធភាព ហើយយើងម្ចាស់ការខ្លួនឯង។ ការរៀនភាសាខ្មែរ ការគិតលេខ បូក​លេខ​តាំង​ពីបឋម ដើម្បីពង្រឹងមូលដ្ឋានភាសាជាតិយើងឱ្យច្រើន។ កុំឱ្យជាប់ថ្នាក់ទី១២ សរសេរអក្សរខ្មែរមិនត្រូវជួរ»។

សិស្សនិទ្ទេស Aមា្នក់ៗទទួលបានកាឡាក់ស៊ី (Galaxy Tab)១គ្រឿង និងទឹកប្រាក់ចំនួន២លានរៀលផងដែរពីលោក​នាយ​​ករដ្ឋមន្រ្តី។ លោកបានលើកឡើងថា ការផលិតបាននូវសិស្សនិទ្ទេស A រាប់ពាន់នាក់ប៉ុន្មានឆ្នាំចុងក្រោយនេះ បាន​​បង្ហាញពីកិច្ចខិតខំប្រឹងប្រែងរួមគ្នា។ នេះគឺស្របពេល ដែលកម្ពុជាកំពុងប្រឹងប្រែងកសាងសមត្ថភាពស្ថាប័ន ការ​ធ្វើ​ទំ​នើប​កម្មមូលដ្ឋានសម្ភារបច្ចេកទេស និងការពង្រឹងប្រសិទ្ធភាពការប្រើប្រាស់បច្ចេកវិទ្យាទំនើប ដើម្បី​ឱ្យ​កម្ពុជា​មានធន​ធាន​មនុស្សគ្រប់គ្រាន់ ឆ្លើយតបទៅនឹងការរីកចម្រើនក្នុងបរិការណ៍ នៃបដិវត្តន៍ឧស្សាហកម្មជំនាន់ទី៤។

ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា លោកហង់ជួន ណារ៉ុនបានថ្លែងក្នុងឱកាសនោះថា កំ​ណើន​សិស្សទទួលបាននិទ្ទេស A ដែលកើនឡើងពី១ ៦៩១នាក់ ក្នុងឆ្នាំ​២០២៣​ ដល់​២២២៥ នៅឆ្នាំនេះ បង្ហាញពី​លទ្ធផល នៃ​ការខិត​ខំ​ប្រឹង​ប្រែងរបស់គណៈគ្រប់គ្រង លោកគ្រូអ្នកគ្រូ ជាសិសេស គឺការដាក់ចេញនូវយុទ្ធស្រ្តដ៏ត្រឹមត្រូវ របស់ដ្ឋាភិបាល នៅ​ក្នុង​ការពង្រឹងសាលារៀន ការលើកកម្ពស់ភាពជាដៃគូ រដ្ឋ និងឯកជន ក៏ដូចជាសហគមន៍ ដើម្បីលើកកម្ពស់ការអប់រំ និង​ការ​ធ្វើកំណែទម្រង់សាលារៀន និងការបើកការប្រឡងប្រណាំង​ ដើម្បីទទួលបានពានរង្វាន់សាលារៀនគំរូជាដើម។

លោកឧបនាយករដ្ឋមន្រ្តីបញ្ជាក់ថា៖«យើងឃើញថា បេក្ខជននិទ្ទេស A​ ដែលកើនឡើងពី១១នាក់ ក្នុងឆ្នាំ២០១៤ ដល់២ ២២៥នាក់ ក្នុងឆ្នាំ២០២៤ ក្នុងរយៈពេល១០ឆ្នាំនេះ បង្ហាញពីជោគជ័យរួមគ្នារបស់រាជរដ្ឋាភិបាល ដែល​បានដាក់​ចេញ​ជាវិធានការគន្លឹះ ដើម្បីគាំទ្រវិស័យអប់រំ ជាពិសេសគឺដើម្បីគាំទ្រ អភិបាលកិច្ចសាលារៀន ហើយ​សាលានី​មួយៗ​ក៏​បាន​ខិតខំបង្រៀន សិស្សប្រកបដោយគុណភាព»៕