លោក ស្កុត នីសិន ស្ថាបនិកអង្គការមូលនិធិកុមារកម្ពុជា (CFF) ប្រារឰខួបការបង្កើតអង្គការ ២០ឆ្នាំ ក្រោមអធិបតីលោកស្រីទីមួយ ពេជ ចន្ទមុន្នី ហ៊ុន ម៉ាណែត។ រូបថត CFF
ភ្នំពេញ៖ លោក ស្កុត នីសិន (Scott Neeson) អង្គការមូលនិធិកុមារកម្ពុជា(CCF) ត្រូវបានព្រះមហាក្សត្រ ព្រះករុណា ព្រះបាទ សម្តេចព្រះបមរនាថ នរោត្តម សីហមុនី ត្រាស់បង្គាប់តែងតាំងជាទីប្រឹក្សានាយករដ្ឋមន្ត្រីកម្ពុជា។
យោងតាមព្រះរាជក្រឹត្យដែលបានតែងតាំងបុរសជនជាតិអូស្ដ្រាលី វ័យ ៦៥ឆ្នាំរូបនេះ បានបង្ហាញថា លោក ស្កុត នីសិន បានទទួលងារជាឯកឧត្ដមក្នុងតំណែងជា កាលពីថ្ងៃទី២១ ខែតុលា ឆ្នាំ២០២៤។
លោក នីសិន អតីតនាយកប្រតិបត្តិហូលីវូដ គឺជាស្ថាបនិក និងជានាយកប្រតិបត្តិនៃមូលនិធិកុមារកម្ពុជា (CCF) ជាអង្គការមិនរកប្រាក់ចំណេញដែលបានបង្កើតឡើងក្នុងឆ្នាំ ២០០៤ ដើម្បីជួយដល់កុមារក្រីក្រ និងគ្រួសារនៅតំបន់ស្ទឹងមានជ័យ រាជធានីភ្នំពេញ។
ក្រោមការដឹកនាំរបស់លោក នីសិន អង្គការ CCF បានពង្រីកកម្មវិធីរបស់ខ្លួនដើម្បីរួមបញ្ចូលការអប់រំ ការថែទាំសុខភាព និងការអភិវឌ្ឍន៍សហគមន៍ ដែលជះឥទ្ធិពលជាវិជ្ជមានដល់ជីវិតមនុស្សជាង ១៥៥០០០នាក់។
នៅក្នុងឆ្នាំ២០១៥ ព្រះមហាក្សត្រ ព្រះប្រទានសញ្ជាតិខ្មែរដល់ លោក ស្កុត នីសិន បន្ទាប់ពីលោកបានខិតខំជួយកុមារក្រីក្ររនៅតំបន់ចាក់សំរាមស្ទឹងមានជ័យ អស់ជាច្រើនឆ្នាំមកហើយនោះ៕
លោក ស្កុត នីសិន និយាយជាមួយកុមាររើសអេតចាយនៅតំបន់ចាក់សំរាមស្ទឹងមានជ័យ កាលពីឆ្នាំ២០០៤ ដែលនាំឱ្យបង្កើតជាអង្គការមូលនិធិកុមារកម្ពុជា (CFF)។ រូបថត CFF
