កម្លាំងនគរបាលចុះអនុវត្តរឹតបន្តឹងច្បាប់ចរាចរណ៍ផ្លូវគោក និងត្រួតពិនិត្យជាតិអាល់កុល ក្នុងរាជធានីភ្នំពេញ នាពេលថ្មីៗនេះ។ រូបថត នគរបាលរាជធានីភ្នំពេញ
ភ្នំពេញៈ នគរបាលចរាចរណ៍ នឹងចាប់ផ្តើមដកហូតបណ្ណបើកបរយានយន្ត ដែលអស់ពិន្ទុ ជាង១ពាន់បណ្ណ ក្នុងចំណោមបណ្ណ ដែលត្រូវបានដកពិន្ទុជាង៧ម៉ឺន នៅសប្តាហ៍ក្រោយនេះ ហើយបានណែនាំដល់អ្នកបើកបរ ដែលបណ្ណ ជិតអស់ពិន្ទុ ទៅប្រឡងបំពេញពិន្ទុឡើងវិញ។
អគ្គស្នងការដ្ឋាននគរបាលជាតិ បានជម្រាបជូនសាធារណជន ជាពិសេសអ្នកដែលមានបណ្ណបើកបរ ដែលអស់ពិន្ទុថា ចាប់ពីថ្ងៃពុធថ្ងៃទី១ ខែមករា ឆ្នាំ ២០២៥ ខាងមុខនេះ អង្គភាពនគរបាលចរាចរណ៍ផ្លូវគោកតាមបណ្តារាជធានី ខេត្ត នឹងអនុវត្តការដកហូតបណ្ណបើកបរយានយន្ត គ្រប់ប្រភេទ ដែលអស់ពិន្ទុ ឬពិន្ទុសូន្យ។ នេះបើយោងតាមសេចក្តីជូនដំណឹងរបស់ នាយឧត្តមសេនីយ៍ ស ថេត អគ្គស្នងការនគរបាលជាតិ ចុះថ្ងៃទី២៣ ខែធ្នូនេះ។
វិធានការនេះ គឺដើម្បីបង្កើនប្រសិទ្ធភាពនៃការ រឹតបន្តឹងការអនុវត្តច្បាប់ស្តីពីចរាចរណ៍ផ្លូវគោក សំដៅកាត់បន្ថយគ្រោះថ្នាក់ចរាចរណ៍ផ្លូវគោកឱ្យបាន ជាអតិបរមា និងបង្កលក្ខណៈងាយស្រួលក្នុងការអនុវត្តច្បាប់ ស្តីពីចរាចរណ៍ផ្លូវគោកជូនប្រជាពលរដ្ឋ និងធានាគ្រប់គ្រងប្រកបដោយតម្លាភាពនូវការពិន័យអន្តរការណ៍ ចំពោះអំពើល្មើសច្បាប់ស្តីពីចរាចរណ៍ ផ្លូវគោក។
បន្ថែមពីនេះ លោកនាយឧត្តមសេនីយ៍ ក៏បានសំណូមពរដល់ប្រជាពលរដ្ឋ ដែលមានបណ្ណបើកបរ យានយន្តគ្រប់ប្រភេទជិតអស់ពិន្ទុ ទៅដាក់ពាក្យសុំរៀនបំប៉ន ដើម្បីប្រឡងយកពិន្ទុបន្ថែម ឬបំពេញពិន្ទុ ឡើងវិញ នៅមណ្ឌល ផ្តល់សេវា របស់ក្រសួងសាធារណការ និងដឹកជញ្ជូន។
អគ្គស្នងការដ្ឋាននគរបាលជាតិ ក៏បានអំពាវនាវ ឱ្យពលរដ្ឋចូលរួម ក្នុងការអនុវត្តសេចក្តីជូនដំណឹងនេះ ដើម្បីលើកកម្ពស់ការគោរពច្បាប់ស្តីពីចរាចរណ៍ ផ្លូវគោក កាត់បន្ថយគ្រោះថ្នាក់ និងរក្សាសណ្តាប់ធ្នាប់ចរាចរណ៍ផ្លូវគោក ឱ្យកាន់តែប្រសើរជាលំដាប់។
អ្នកនាំពាក្យ ក្រសួងសាធារណការ និងជញ្ជូន លោកផន រឹមបានឱ្យដឹងថា ការអនុវត្តការដកពិន្ទុបណ្ណបើកបរចាប់ពី ថ្ងៃទី១ ខែកញ្ញា ឆ្នាំ២០២២ មកដល់ ថ្ងៃទី៣០ ខែវិច្ឆិកា ឆ្នាំ២០២៤ បានអនុវត្តដកពិន្ទុបណ្ណបើកបរសរុប ៧៤ ៥០៤ករណី។ ក្នុងនោះ បណ្ណបើកបរ ដែលមានពិន្ទុសល់សូន្យ មានចំនួន ១ ២៣២ករណី។
លោកបានបញ្ជាក់ថា៖«ចាប់ពីថ្ងៃទី១ ខែកញ្ញា ឆ្នាំ២០២២ នៃការអនុវត្តការដកពិន្ទុមក ការិយាល័យជំនាញមិនទាន់ទទួលបានការស្នើសុំពីប្រជាពលរដ្ឋក្នុងការបណ្តុះបណ្តាល ដើម្បីបន្ថែមពិន្ទុ និងប្រឡងយកបណ្ណបើកបរសារជាថ្មីឡើងវិញនៅឡើយ»។
ដើម្បីបង្កើនប្រសិទ្ធភាពនៃការរឹតបន្តឹងអនុវត្តច្បាប់ស្ដីពីចរាចរណ៍ផ្លូវគោកសម្តៅកាត់បន្ថយគ្រោះថ្នាក់ចរាចរណ៍ផ្លូវគោកឱ្យបានជាអតិបរមា ការអនុវត្តដកពិន្ទុបណ្ណបើកបរត្រូវបានដាក់ឱ្យដំណើរការជាផ្លូវការចាប់ពីថ្ងៃទី១ ខែមករា ឆ្នាំ២០២៣។
នៅលើបណ្ណបើកបរមួយមានពិន្ទុសរុបចំនួន១២។ ពិន្ទុទាំងនេះ នឹងត្រូវកាត់ពីចាប់ ១ពិន្ទុ ទៅដល់ ៦ពិន្ទុ ទៅតាមប្រភេទបទល្មើស ដែលអ្នកបើកបរបានប្រព្រឹត្តជាក់ស្តែង។ ប៉ុន្តែការកាត់នោះមិនឱ្យលើសពី ៨ពិន្ទុនោះទេ។ នេះបើយោងតាមក្រសួងសាធារណការ និង ដឹកជញ្ជូន។
ទោះយ៉ាងណា អ្នកបើកបរល្មើសច្បាប់ចរាចរណ៍ ដែលត្រូវបានកាត់ពិន្ទុ អាចទៅរៀនបំប៉នផ្នែកទ្រឹស្តី រយៈពេល ២ថ្ងៃនៅក្រសួងសាធារណការ ដើម្បីបំពេញពិន្ទុឡើងវិញ។ ការទៅរៀនបំប៉នម្តងអាចបាន ៤ពិន្ទុមកវិញតែប៉ុណ្ណោះ ហើយក្នុងរយៈពេល ៦ខែ ទើបអាចទៅរៀនម្តងទៀតបាន។ ក្នុងរយៈពេល ៣ឆ្នាំ ក្នុងករណីបណ្ណបើកបរនៅសល់១ឬ ២ ពិន្ទុ បើមិនមានល្មើសច្បាប់ដែលត្រូវបានកាត់ពិន្ទុឱ្យអស់ពិន្ទុនោះទេ នោះពិន្ទុនឹងត្រូវឡើងពេញមកវិញផងដែរ។
នៅពេលកាត់អស់ពិន្ទុពីបណ្ណបើកបរនោះអ្នកបើកបរនឹងត្រូវដក ហូតសិទ្ធិបើកបរ ហើយត្រូវរង់ចាំរយៈពេល ៦ខែក្រោយ ទើបអាចប្រឡងយកបណ្ណបើកបរឡើងវិញ ដើម្បីធានាបានសុវត្ថិភាពក្នុងពេលបើកបរនិងមិនបង្កគ្រោះថ្នាក់ដល់អ្នកបើកបរដទៃ។
លោកឧត្តមសេនីយ៍ឯក ចេវ ហាក់ អគ្គស្នងការរងនគរបាលជាតិ ទទួលផែនចរាចរណ៍ និងសណ្ដាប់ធ្នាប់សាធារណៈ និងលោកស្រីមឹន មាណវី រដ្ឋលេខាធិការ ក្រសួងសាធារណការ និងដឹកជញ្ជូន និងជាអគ្គលេខាធិការ នៃអគ្គលេខាធិការដ្ឋាន គណៈកម្មាធិការជាតិសុវត្ថិភាពចរាចរណ៍ផ្លូវគោក(គ.ស.ច.គ) ជាប់រវល់មិនអាចមានប្រសាសន៍បានទេនាថ្ងៃ អង្គារ ទី២៤ធ្នូ នេះ។
សមត្ថកិច្ចបានធ្វើការត្រួតពិនិត្យយានយន្តសរុប៨៤ ២៩២គ្រឿង និងពិន័យយានយន្តសរុប ៦៤ ២៩៦គ្រឿង ដែលស្មើនឹង ៧៩ភាគរយ ក្នុងការរឹតបន្តឹងច្បាប់ចរាចរណ៍ផ្លូវគោកប្រចាំឆមាសទី១ នៃឆ្នាំ២០២៤នេះ ។ ក្នុងនោះមានម៉ូតូល្មើសចំនួន ៤៨ ៧០៣គ្រឿង ស្មើនឹង ៧៦ភាគរយផងដែរ។
ក្នុងរយៈពេលនេះផងដែរ ពិន្ទុសរុបចំនួន ៣១ ៧៤១ពិន្ទុ ត្រូវបានសមត្ថកិច្ចដកពីបណ្ណបើកបរយានយន្តចំនួន ៦៩ ៤៨០គ្រឿងផងដែរ។ ក្នុងនោះ ដកពិន្ទុលើម៉ូតូកម្លាំង ១២៥សេសេ ២ ០៥៧ពិន្ទុ, ដកពិន្ទុលើរថយន្តធុនស្រាល ២៨ ៩៥៦ពិន្ទុ និង ដកពិន្ទុលើរថយន្តធុនធ្ងន់ ចំនួន៧៥៤ពិន្ទុផងដែរ៕
