ឧក្រិដ្ឋជន ស្រី ស៊ីណា នឹងត្រូវដាក់ក្នុង«បញ្ជីខ្មៅ» ដែលនឹងមិនត្រូវទទួលបាន នូវការបន្ធូរបន្ថយទោស ឬលើកលែងទោសនោះឡើយ។
ភ្នំពេញៈ ការផ្តន្ទាទោស ដាក់ពន្ធនាគារជាអតិបរមា សរុប៣១ឆ្នាំ និងសងសំណងជំងឺចិត្ត១លានដុល្លារទៅលើឧក្រិដ្ឋជន អតីតឧកញ៉ា ស្រី ស៊ីណា គឺជាសំណងដ៏ច្រើន មិនធ្លាប់មានក្នុងប្រវត្តិ នៃការកាត់ក្តីលើសំណុំរឿងឃាតកម្មនៅកម្ពុជា។ នេះជាការលើកឡើងរបស់ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ លោកកើត រិទ្ធនាថ្ងៃពុធ ទី២៥ ខែធ្នូនេះ។
ការលើកឡើងនេះធ្វើឡើង ក្រោយពីតុលាការសាលាដំបូងរាជធានីភ្នំពេញ បានចេញសាលក្រមកាត់ក្តីសំណុំរឿងឃាតកម្មកាលពីថ្ងៃទី២៣ ខែធ្នូ ដែលបានប្រព្រឹត្ត ដោយឧក្រិដ្ឋជន អតីតឧកញ៉ាស្រី ស៊ីណា ។
តុលាការបាន សម្រេចផ្តន្ទាទោសឧក្រិដ្ឋជនរូបនេះ ដាក់ពន្ធនាគារ ជាអតិបរមា តាមច្បាប់ ដែលសរុបទាំង៣ សំណុំរឿង មានរហូតដល់ទៅ ៣១ ឆ្នាំ។
លើសពីនោះ បានសម្រេចផ្តល់សំណងជំងឺចិត្ត ដល់គ្រួសារអ្នករងគ្រោះ ដែលបានស្លាប់បាត់បង់ជីវិតចំនួន១លានដុល្លារ ក្នុងមួយគ្រួសារ អ្នករងរបួសធ្ងន់ចំនួន៣០ម៉ឺនដុល្លារ និងអ្នករងគ្រោះស្រាលចំនួន២០ ម៉ឺនដុល្លារផងដែរ ដោយលោករដ្ឋមន្រ្តីគូសបញ្ជាក់តាមបណ្តាញសង្គមរបស់លោកថា«យុត្តិធម៌ ដែលគ្រប់គ្នាបានទន្ទឹងរង់ចាំ គឺបានមកដល់ហើយ»។
លោករដ្ឋមន្រ្តីបានសរសេរថា៖«សម្រាប់ខ្ញុំ នេះ អាចចាត់ជាប្រវត្តិសាស្រ្តមួយក្នុងវិស័យយុត្តិធម៌ ដែលតុលាការ មិនត្រឹមតែសម្រេចដាក់ទោសពន្ធនាគារជាអតិបរមាតាមការកំណត់នៃច្បាប់នោះទេ ប៉ុន្តែ ថែមទាំងបានសម្រេចអំពីសំណងដល់គ្រួសារ នៃជនរងគ្រោះ ដែលបានស្លាប់បាត់បង់ជីវិតរហូតដល់ ១លានដុល្លារ ក្នុងមួយគ្រួសារ»។
លោកឧបនាយករដ្ឋមន្ត្រីបានលើកឡើងថា មានគោលការណ៍សំខាន់យ៉ាងតិចពីរ ដែលតុលាការបានប្រើក្នុងការសម្រេចសេចក្តីនេះ។
ទី១ គឺ “គោលការណ៍យុត្តិធម៌តាមច្បាប់” ដែលតុលាការ ត្រូវប្រកាន់ភាពម៉ឺងម៉ាត់ក្នុងការអនុវត្តច្បាប់ ប៉ុន្តែ ភាពម៉ឺងម៉ាត់នេះ ត្រូវគោរពទៅតាមអ្វី ដែលច្បាប់ជាធរមានបានកំណត់ ដើម្បីផ្តល់យុត្តិធម៌តាមច្បាប់ជូនដល់ជនរងគ្រោះ។
ទី២ គឺ “គោលការណ៍សមទណ្ឌោ” ក្នុងការសម្រេចសេចក្តី ទាំងលើការផ្តន្ទាទោសដាក់ពន្ធនាគារជាអតិបរមា ទាំងលើការសងសំណងជំងឺចិត្ត១ លានដុល្លារ ដែលជាសំណងដ៏ច្រើនមិនធ្លាប់មានក្នុងប្រវត្តិនៃការកាត់ក្តីទាក់ទងនឹងរឿងឃាតកម្ម។
លោកបន្តថា ជាការពិត សំណងចំនួន១ លានដុល្លារនេះ មិនអាចដោះដូរនឹងតម្លៃ នៃអាយុជីវិតមិនអាចកាត់ថ្លៃបានរបស់យុវជនទាំង២រូប ដែលត្រូវសម្លាប់យ៉ាងឃោរឃៅនៅក្នុងករណីឃាតកម្មដ៏សាហាវនេះឡើយ ប៉ុន្តែ នេះ ជាអ្វីដែល “យុត្តិធម៌ក្នុងយុគសម័យ នៃពិភពលោកបច្ចុប្បន្ន” អាចធ្វើបាន ដើម្បីជាសំណងជំងឺចិត្តដល់គ្រួសារជនរងគ្រោះ និង អ្នករងគ្រោះ បន្ថែមពីលើ អ្វីដែលជាការផ្តន្តាទោសដាក់ពន្ធនាគារ។
លោកបានបញ្ជាក់ដូច្នេះថា៖«ផ្អែកតាម “គោលការណ៍សមទណ្ឌោ”, ផ្នែកនៃការសម្រេចអំពីសំណងនេះ គឺ សក្តិសមជាទីបំផុតសម្រាប់ឧកញ៉ាមានលុយ ដែលក្អេងក្អាងប្រមាថជីវិតអ្នកដទៃ និងបានប្រព្រឹត្តអំពើឃាតកម្មដ៏ឃោរឃៅបែបនេះ»។
អតីតឧកញ៉ា ស្រី ស៊ីណា អាយុ ៥១ឆ្នាំ ត្រូវបានចោទប្រកាន់ចំនួន៣បទល្មើសផ្សេងគ្នា ដែលពាក់ព័ន្ធនឹងករណីឃាតកម្ម ប៉ុនប៉ងឃាតកម្ម ប្រើប្រាស់អាវុធដោយគ្មានការអនុញ្ញាត និងបទរំលោភលើលំនៅដ្ឋានកាលពីខែមិថុនា កន្លងមក ដែលបណ្តាលឱ្យស្លាប់ មនុស្ស២នាក់ និងរបួស២នាក់ទៀត នៅក្នុងនៅខណ្ឌច្បារអំពៅ រាជធានីភ្នំពេញ។
លោករដ្ឋមន្រ្តីក៏បានបញ្ជាក់ប្រាប់សាធារណជនផងដែរថា ក្នុងនាមជារដ្ឋមន្រ្តីយុត្តិធម៌ ដែលទទួលបទបញ្ជាពីប្រមុខរដ្ឋាភិបាល លើរឿងនេះតាំងពីដំណាក់កាលដំបូងនោះ លោកនឹងបន្តតាមដានការអនុវត្តច្បាប់ចំពោះករណីនេះជាបន្តទៀត។
ក្នុងនោះ មិនត្រឹមតែនៅសាលាជម្រះក្តីជាន់ខ្ពស់ ក្នុងករណីមានបណ្តឹងតវ៉ានឹងសាលក្រមនេះនោះទេ ប៉ុន្តែ នឹងបន្តតាមដាននៅពេលអនុវត្តទោសក្នុងពន្ធនាគាររបស់ទណ្ឌិតរូបនេះ។
ជាពិសេស គឺទាក់ទងទៅនឹងការ ដាក់ឈ្មោះឧក្រិដ្ឋជនដ៏សាហាវឃោរឃៅនេះក្នុង «បញ្ជីខ្មៅ» ដែលនឹងមិនត្រូវទទួលបាននូវការបន្ធូរបន្ថយទោស ឬលើកលែងទោសឡើយ។ ក្រៅពីនេះ លោកក៏នឹងតាមដានអំពីការអនុវត្តសំណងចំពោះជនរងគ្រោះនៅក្នុងសំណុំរឿងនេះផងដែរ៕
