ប្រជាពលរដ្ឋនៅតំបន់អូរឈ្លើងលើឃុំបិតត្រាំង ស្រុកព្រៃនប់ ខេត្តព្រះសីហនុ ជួបជាមួយអ្នកសារព័ត៌មាន នៅថ្ងៃទី១៧ ខែធ្នូ ឆ្នាំ២០២៤។ រូបថត គេហទំព័រផល្លីញូស៍
ស្នងការដ្ឋាននគរបាលខេត្តព្រះសីហនុបន្តស្រាវជ្រាវ ប្រមូលភស្តុតាងបន្ថែមទៀត និងរកមូលហេតុនៃទំនាស់ ព្រមទាំងកំណត់អត្តសញ្ញាណជនបង្ក និងអ្នកពាក់ព័ន្ធ នៅក្នុងការប៉ះទង្គិចគ្នារវាងប្រជាពលរដ្ឋនិងបុគ្គលិកក្រុមហ៊ុន រតនៈ សម្បត្តិ និង និងលោក មៀម វណ្ណៈ ដែលបណ្ដាលឲ្យមនុស្ស ៦ នាក់បានរងរបួស។
នៅក្នុងសេចក្ដីប្រកាសព័ត៌មានចុះថ្ងៃទី២៤ ខែធ្នូនេះ ស្នងការដ្ឋាននគរបាលខេត្តព្រះសីហនុ បានឲ្យដឹងថា កាលពីថ្ងៃទី១៥ ខែធ្នូ ឆ្នាំ២០២៤ វេលាម៉ោង ៧ យប់ មានករណីហិង្សាទៅវិញទៅមករវាងប្រជាពលរដ្ឋ និងបុគ្គលិកក្រុមហ៊ុន លោក រតនៈ សម្បត្តិ និង លោក មៀម វណ្ណៈ នៅចំណុចអូរឈ្លើងលើ ក្នុងភូមិគគីរ ឃុំបិតត្រាំង ដែលបច្ចុប្បន្ន ស្ថិតនៅក្រុងកំពង់សោម ខេត្តព្រះសីហនុ។
ស្នងការដ្ឋាននគរបាលខេត្តព្រះសីហនុ បញ្ជាក់ថា តាមរយៈការស្រាវជ្រាវពីថ្ងៃទី១៦ ដល់ថ្ងៃទី២៣ ខែធ្នូ សមត្ថកិច្ចជំនាញការិយាល័យនគរបាលព្រហ្មទណ្ឌកម្រិតធ្ងន់ បានសាកសួរអ្នកស្ថិតក្នុងហេតុការណ៍សរុបចំនួន ១១នាក់ ក្នុងនោះមានតំណាងប្រជាពលរដ្ឋ ៦ នាក់ និង បុគ្គលិកក្រុមហ៊ុនចំនួន ៥នាក់ និងបានចុះស្រាវជ្រាវពិនិត្យកន្លែងកើតហេតុ ប្រមូលភស្តុតាងនានា។
យ៉ាងណាក៏ដោយ សមត្ថកិច្ចមិនបានបញ្ជាក់ពីមូលហេតុនៃការប៉ះទង្គិចនេះទេ ដោយអះអាងថាកំពុងស្រាវជ្រាវបន្ត។ ប្រភពពីប្រជាពលរដ្ឋបានអះអាងថា បុគ្គលិកក្រុមហ៊ុន រតនៈ សម្បត្តិ បានមករារាំងមិនឲ្យពួកគេចូលទៅផ្ទះសម្បែងរបស់ពួកគេ ដែលជាហេតុធ្វើឲ្យមានការប៉ះទង្គិចគ្នានេះ។
អ្នកស្រី ជាប សុធារី មន្រ្តីសម្របសម្រួលសមាគមអាដហុកប្រចាំខេត្តព្រះសីហនុ បានឲ្យដឹងថា ដីតំបន់នេះមានជម្លោះជាច្រើន ដោយសារកាលពីដើមឡើយវាជាដីគម្របព្រៃឈើស្ថិតក្រោមការគ្រប់គ្រងរបស់ក្រសួងបរិស្ថាន។
ប៉ុន្តែ ក្រុមហ៊ុន រតនៈ សម្បត្តិ បានអះអាងថា ក្រុមហ៊ុនទទួលបានសិទ្ធិ និងមានប្លង់កម្មសិទ្ធិសម្រាប់វិនិយោគ ខណៈដែលប្រជាពលរដ្ឋ ក៏បានរស់នៅលើដីតំបន់នេះដោយថែមទាំងសាងសង់សំណង់ធំៗទៀតផង។
អ្នកស្រីបន្តថា បើសិនជាក្រុមហ៊ុន រតនៈ សម្បត្តិ មានកម្មសិទ្ធិលើដីនេះមែន គួរតែហាមឃាត់ប្រជាពលរដ្ឋតាំងពីដំបូង តាមរយៈការជូនដំណឹង និងធ្វើការជាមួយអាជ្ញាធរមានសមត្ថកិច្ចដើម្បីដោះស្រាយបញ្ហាដោយសន្តិវិធី។
ចំពោះការប៉ះទង្គិចគ្នានៅយប់ថ្ងៃទី១៥ ខែធ្នូ កន្លងទៅ អ្នកស្រីថ្លែងថា៖ «ក្នុងករណីអ្នកដែលជាម្ចាស់កម្មសិទ្ធិយល់ថាមានការរំលោភបំពានណាមួយ គាត់មិនអាចប្រើកម្លាំងឯកជនចុះទៅធ្វើការបណ្ដេញប្រជាពលរដ្ឋដោយខ្លួនឯងទេ គឺត្រូវតែដាក់ពាក្យទៅតាមផ្លូវច្បាប់ ដើម្បីឲ្យអាជ្ញាធរចុះអង្កេតពិនិត្យមើលថាតើគាត់មានឯកសារគ្រប់គ្រាន់ដែលបញ្ជាក់ថា គាត់ជាម្ចាស់កម្មសិទ្ធិដីនេះ គាត់ត្រូវតែប្ដឹង។ ការចុះទៅពេលយប់ព្រលប់នេះគឺជារឿងខុសច្បាប់ដែរ។ ការចូលពេលយប់ព្រលប់ លុះត្រាតែមានការស្រែកហៅសុំជំនួយពីជនរងគ្រោះពីកន្លែងកើងហេតុទើបគាត់អាចចូលបាន»។
អ្នកស្រីបន្តថា ប្រសិនបើក្រុមហ៊ុន រតនៈ សម្បត្តិ មានកម្មសិទ្ធិលើដីធ្លីនៅទីតាំងនោះ ក្រុមហ៊ុនមិនគួរដាក់កម្លាំងទៅទាំងយប់ដោយខ្លួនឯងដូច្នេះទេ គួរដើរនៅលើនីតិវិធី គឺការជូនដំណឹងទៅអាជ្ញាធរដើម្បីចុះអនុវត្ត ខណៈដែលបច្ចុប្បន្ននេះ កម្ពុជាមាននីតិវិធីគ្រប់គ្រាន់ដើម្បីដោះស្រាយជម្លោះដីធ្លី៕
