ប្រជាកសិករបូមទឹកអាង ពីប្រព័ន្ធធារាសាស្រ្ត ដើម្បីបង្កបង្កើនផលស្រូវប្រាំង ក្នុងខេត្តបន្ទាយមានជ័យ។ រូបថត មន្ទីរធនធានទឹកខេត្តបន្ទាយមានជ័យ
ភ្នំពេញៈ កម្ពុជាមានអាងស្ដុកទឹក និងអាងទឹក នៃប្រព័ន្ធធារាសាស្ត្រជាង១ ៥០០នៅទូទាំងប្រទេស ដែលក្នុងនោះបានចុះបញ្ជីរួចរាល់ ចំនួន១៩៧ ស្មើនឹង ១៣ ភាគរយ ដើម្បីការពារកុំឱ្យមានការទន្រ្ទានយក និងជួយរក្សាប្រភពទឹកសម្រាប់ប្រើប្រាស់ ជាពិសេសគឺនៅរដូវប្រាំង។
ខេត្តចំនួន២៣ ក្នុងចំណោមរាជធានីខេត្តចំនួន២៥នៅកម្ពុជា មានអាងស្ដុកទឹក និងអាងទឹក នៃប្រព័ន្ធធារាសាស្ត្រសរុបចំនួន ១ ៥៦២គិតមកដល់ពេលបច្ចុប្បន្ននេះ ។
ក្នុងនោះអាងស្តុកទឹក និងអាងទឹក ដែលបានចុះបញ្ជីរួចមានចំនួន១៩៧ ដែលស្មើនឹង ១៣ ភាគរយ, អាងស្តុកទឹក និងអាងទឹក ដែលកំពុងដំណើរការចុះបញ្ជីមានចំនួន ២៧៣ ស្មើនឹង ១៧ ភាគរយ និងអាងស្តុកទឹក និងអាងទឹកមិនទាន់បានចុះបញ្ជីមានចំនួន ១ ០៩២ ស្មើនឹង ៧០ ភាគរយ។ នេះបើយោងតាមប្រសាសន៍របស់ រដ្ឋមន្ត្រីក្រសួងធនធានទឹក និងឧតុនិយម លោកថោ ជេដ្ឋា នៅក្នុងកិច្ចប្រជុំពិនិត្យវឌ្ឍនភាពការងារចុះបញ្ជីអាងទឹកនៅទូទាំងប្រទេស។
កិច្ចប្រជុំនេះត្រូវបានធ្វើឡើងនា ថ្ងៃព្រហស្បតិ៍ ទី២៦ ខែធ្នូនេះ នៅទីស្តីការក្រសួងរៀបចំដែនដី នគរូបនីយកម្ម និងសំណង់ ក្រោមអធិបតីភាព ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី លោកសាយ សំអាល់។
លោករដ្ឋមន្ត្រីបានបន្តថា រាជធានីភ្នំពេញ និងខេត្តប៉ៃលិន មិនមានអាងស្ដុកទឹក និងអាងទឹក នៃប្រព័ន្ធធារាសាស្ត្រនោះទេ។
លោករដ្ឋមន្ត្រីបានបញ្ជាក់ថា៖« អគ្គនាយកដ្ឋានកិច្ចការបច្ចេកទេសនៃក្រសួងធនធានទឹក និងឧតុនិយម បាននិងកំពុងអនុវត្តយ៉ាងសកម្មនូវផែនការសកម្មភាពក្នុងការបន្តជំរុញការងារចុះបញ្ជីអាងស្ដុកទឹក និងអាងទឹកដែលមិនទាន់បានចុះបញ្ជីឱ្យបានឆាប់រហ័ស»។
អ្នកនាំពាក្យក្រសួងធនធានទឹក និងឧត្តុនិយម លោក ចាន់ យុត្ថា មិនអាចទាក់ទងសុំអត្ថាធិប្បាយបន្ថែមបានទេនាថ្ងៃសុក្រ ទី២៧ ខែធ្នូនេះ។
លោកប៊ុន ពៅប្រធានការិយាល័យរដ្ឋបាល នៃមន្ទីរធនធានទឹក និងឧត្តុនិយម ខេត្តបន្ទាយមានជ័យបានឱ្យដឹងថា អាងទឹកចំនួន២ ក្នុងចំណោម៤៧អាងទឹក ទទួលបានប្លង់កម្មសិទ្ធរួចហើយ។
ចំណែកឯអាងក្រៅពីនោះ ខាងមន្រ្តីសុរិយោដីបានធ្វើការវាស់វែងរួចហើយ និងកំពុងតែដំណើរការចេញប្លង់រឹងដូចគ្នានេះផងដែរ។
លោកថ្លែងថា៖«ពេលចុះជាប្រព័ន្ធជូនពលរដ្ឋហ្នឹង គេកាត់ដីអាងទុក ហើយយើងចុះបញ្ជី ធ្វើជាប្លង់កម្មសិទ្ធិ។ ពេលមានប្លង់កម្មសិទ្ធិហើយ គឺមិនមានការរំលោភយកបានទេ ហើយដូចជាការចូលរួមការពារប្រភពទឹកផងដែរ»។
ទាក់ទងទៅនឹងការបង្ការកង្វះទឹក ជាពិសេសក្នុងរដូវប្រាំងនេះ មន្ទីរធនធានទឹក និងឧត្តុនិយម និងរដ្ឋបាលខេត្តមួយចំនួន បានណែនាំដល់ប្រជាកសិករពីការបង្កបង្កើនផលស្រូវប្រាំងទៅតាមការកំណត់ផងដែរ។
មន្ទីរធនធានទឹក និងឧតុនិយមខេត្តបន្ទាយមានជ័យបានឱ្យដឹងថា ប្រព័ន្ធធារាសាស្ត្រស្ថិតនៅក្នុងស្រុក ក្រុងទាំង៩ ទូទាំងខេត្ត មានទឹកប្រើប្រាស់សម្រាប់ស្រោចស្រពស្រូវប្រាំង និងសម្រាប់ប្រើប្រាស់ប្រចាំថ្ងៃ សរុបមានចំនួន ៥១ប្រព័ន្ធ និងប្រព័ន្ធស្ទឹងចំនួន២ប្រព័ន្ធ។
មន្ទីបានលើកឡើង ការប្រែប្រួលធាតុអាកាស បាននាំឱ្យទិន្នន័យកម្ពស់ទឹកភ្លៀងពីដើមឆ្នាំ២០២៤ រហូតដល់ថ្ងៃទី២២ ខែវិច្ឆិកា ឆ្នាំ២០២៤ មានចំនួន ៩៦៤.២មម តិចជាងឆ្នាំ២០២៣ចំនួន ១៩៨.១មម។
មន្ទីរបញ្ជាក់ថា៖«ដូច្នេះមន្ទីរ សូមកំណត់ឱ្យធ្វើការបង្កបង្កើនផលស្រូវប្រាំង និងស្រូវប្រដេញទឹកតែមួយលើកប៉ុណ្ណោះ សរុបមានចំនួន ១៦ ០០០ហិកតា ក្នុងតំបន់គោលដៅទាំង១១ប្រព័ន្ធ»។
អាជ្ញាធរមូលដ្ឋានបានអំពាវនាវ ដល់ប្រជាពលរដ្ឋឱ្យ ធ្វើស្រែប្រាំងទៅតាមផែនការប្រើប្រាស់ទឹក និងជួយសហការគ្នា ដើម្បីថែរក្សាទឹកទុកសម្រាប់ប្រើប្រាស់នៅក្នុងរដូវប្រាំងនេះ ដើម្បីចៀសវាងបញ្ហាខ្វះខាតទឹក។
ទោះយ៉ាងណា លោកប៊ុន ពៅបានឱ្យដឹងថា ប្រជាកសិករមិនបានស្តាប់តាមការណែនាំនេះទេ ហើយពួកគាត់បានធ្វើស្រែប្រាំងរហូតដល់ទៅ៩ម៉ឺនហិកតា។ ហេតុនេះ វានឹងបណ្តាលឱ្យមានការប្រឈមនឹងការខ្វះខាតទឹកជាមិនខានឡើយ។
រដ្ឋបាលខេត្តពោធិ៍សាត់ ក៏បានជូនដំណឹងឱ្យមានការផ្អាកការបង្កបង្កើនផលស្រូវនៅរដូវប្រាំងលើកទី២ផងដែរ។
រដ្ឋបាលខេត្តបានឱ្យដឹងថា ផែនការសក្តានុពលទឹក សម្រាប់ស្រោចស្រពលើការងារបង្កបង្កើនផលស្រូវរដូវប្រាំង ឆ្នាំ២០២៤-២០២៥ របស់មន្ទីរធនធានទឹក និងឧតុនិយមខេត្ត សម្រាប់ការផ្គត់ផ្គង់ទឹកជូនប្រជាកសិករ ក្នុងឆ្នាំ ២០២៥ នេះបានត្រឹមតែ ២០ ០០០ហិកតាប៉ុណ្ណោះ។
ប៉ុន្តែផ្អែកតាមការចុះពិនិត្យជាក់ស្តែងកន្លងមករបស់ថ្នាក់ ដឹកនាំខេត្ត និងការវាយតម្លៃរបស់មន្ទីរកសិកម្ម រុក្ខាប្រមាញ់ និងនេសាទខេត្ត ការបង្កបង្កើនផលរបស់ប្រជាកសិករបានកើនរហូតដល់ ៥៨ ៧៧០ហិកតា ដែលលើសផែនការ នៃការប្រើប្រាស់ទឹកជាច្រើន។
រដ្ឋបាលខេត្ត បានណែនាំឱ្យ ប្រជាកសិករទាំងអស់ ផ្អាកការបង្កបង្កើនផលដំណាំស្រូវរដូវប្រាំងលើកទី២ ជាបណ្តោះ អាសន្ន បន្ទាប់ពីពួកគាត់ប្រមូលផលរួចរាល់នៅក្នុងអំឡុងខែមករា ឆ្នាំ២០២៥ ខាងមុខ។
ម្យ៉ាងវិញទៀត ប្រជាពលរដ្ឋ ដែលរស់នៅតំបន់គ្មានប្រភពទឹក ត្រូវត្រៀមលក្ខណៈស្តុកទឹកក្នុងស្រះ អណ្តូង ប្រឡាយ ដែលអាចស្តុកទឹកសម្រាប់ទុកប្រើប្រាស់ប្រចាំថ្ងៃ និងសម្រាប់សត្វពាហនៈជាដើម។
រដ្ឋបាលខេត្តបញ្ជាក់ថា៖«ករណីដែលប្រជាកសិករយើងនៅតែបន្តការបង្កបង្កើនផលស្រូវរដូវប្រាំងលើកទី២ ទៀតនោះ បងប្អូនអាចនឹងជួបប្រទះការខ្វះខាតទឹកប្រើប្រាស់ប្រចាំថ្ងៃ ខ្វះទឹកសម្រាប់សត្វពាហនៈជាដើម»៕
