ក្រុមការងារបច្ចេកទេសនៃក្រសួងបរិស្ថានពិនិត្យទឹកស្ទឹងដែលរងការបំពុលពីក្រុមហ៊ុន។ ក្រសួងបរិស្ថាន
ក្រសួងបរិស្ថានបានពិន័យក្រុមហ៊ុនបោកគក់ឈ្មោះថា Jin Lu Yuan Energy Environment Protection Industry Co., Ltd. មានមូលដ្ឋានក្នុងឃុំព្រះនិព្វាន ស្រុកគងពិសី ខេត្តកំពង់ស្ពឺ ក្នុងទឹកប្រាក់ «ជាច្រើនរយលានរៀល» ចំពោះការបង្ហូរទឹកមិនបានធ្វើប្រព្រឹត្តកម្មត្រឹមត្រូវចូលទៅក្នុងស្ទឹងដែលលាតសន្ធឹងដល់ខេត្តកណ្ដាល។
ក្រសួងបរិស្ថានបានឲ្យដឹងថា ក្រុមហ៊ុនបានបង្ហូរទឹកកខ្វក់ដែលមិនបានឆ្លងកាត់ការសម្អាតតាមលក្ខណៈបច្ចេកទេស និងបញ្ចេញសំណល់រាវលើសកម្រិតកំណត់ស្តង់ដារអនុញ្ញាត ចូលក្នុងស្ទឹង បង្កឲ្យមានការបំពុលទឹកនៅទឹកស្ទឹងតូច ស្ថិតនៅស្រុកកណ្តាលស្ទឹង ខេត្តកណ្ដាល កាលពីដើមខែធ្នូ។
ក្រសួងក៏បានតម្រូវឲ្យក្រុមហ៊ុននេះផ្អាកការបង្ហូរទឹកចូលស្ទឹង និងធ្វើប្រព្រឹត្តកម្មទឹកពីរោងចក្ររបស់ខ្លួន។
ក្រោយការចុះពិនិត្យរបស់ក្រសួង ក្រុមការងារបច្ចេកទេសពីក្រសួងបានរកឃើញថា ស្ថានភាពទឹកប្រឡាយមានភាពប្រសើរឡើង ប៉ុន្តែ មិនទាន់សមស្របទៅនឹងស្តង់ដារតម្រូវ ដោយទឹកស្ទឹងនៅមានធំក្លិនអូសាវែល និងមានពណ៌ក្រម៉ៅដដែល។
ដោយយោងលើការត្រួតពិនិត្យនេះ ក្រសួងសម្រេចក្រុមហ៊ុនត្រូវធ្វើប្រព្រឹត្តកម្មសំអាតជាមុន មុននឹងបញ្ចេញទៅក្នុងប្រព័ន្ធប្រឡាយ ដោយអនុលោមតាមស្តង់ដារកំណត់។
ក្រសួងបរិស្ថានក៏បានពិន័យអន្តរការណ៍ជាប្រាក់ «ជាច្រើនរយលានរៀល» និងផ្តល់សំណងការខូចខាត លើការខូចខាតបរិស្ថាន ជីវៈចម្រុះ និងប្រព័ន្ធអេកូឡូស៊ីនៃស្ទឹងតូច និងប្រឡាយទឹក៦១។ នេះបើតាមលោក ខ្វៃ អាទិត្យា អ្នកនាំពាក្យក្រសួងបរិស្ថាន។
ការផាកពិន័យនេះធ្វើឡើងយោងតាម មាត្រា ២៨៧, ២៨៩, និង២៩០ នៃក្រមបរិស្ថាននិងធនធានធម្មជាតិ មាត្រា៤ និង មាត្រា៦ និងមាត្រា៩ថ្មី នៃអនុក្រឹត្យស្តីពីការត្រួតពិនិត្យការបំពុលទឹក ដែលអាចនឹងត្រូវផ្តន្ទាទោសតាមមាត្រាទី ៨៤៥ និង៨៤៦ នៃក្រមបរិស្ថាន និងធនធានធម្មជាតិ។
ក្រសួងបរិស្ថានក៏តម្រូវឲ្យក្រុមហ៊ុននេះ ស្តារ និងរៀបចំជើងជញ្ជាំងប្រឡាយ ឱ្យមានសោភ័ណភាពល្អ ដើម្បីងាយស្រួលតាមដានស្ថានភាពបំពុលទឹក ក្នុងប្រឡាយពីសាធារណជនគ្រប់មជ្ឈដ្ឋាន ជាពិសេសប្រជាពលរដ្ឋ និងអាជ្ញាធរដែនដី ឱ្យបានរួចរាល់មុនថ្ងៃទី៣១ ខែមករា ឆ្នាំ២០២៥។
ក្រសួងក៏តម្រូវឲ្យក្រុមហ៊ុន ធ្វើការស្តារការខូចខាត និងស្តារបរិស្ថានឡើងវិញនៅក្នុងតំបន់ ដែលទទួលរងការបំពុលឱ្យបានរួចរាល់ជាកំហិតមុនថ្ងៃទី៣១ ខែមករា ឆ្នាំ២០២៥ ជាកំហិត»។
ក្រុមហ៊ុននេះក៏ត្រូវបានតម្រូវឲ្យរៀបចំច្រកចេញនៃប្រព័ន្ធលូបង្ហូរសំណល់រាវពីទីតាំងរបស់ខ្លួនតែមួយកន្លែង, រៀបចំប្រព័ន្ធលូបង្ហូរទឹកភ្លៀងឱ្យបានច្បាស់លាស់ និងដាច់ដោយឡែកពីប្រព័ន្ធលូបង្ហូរសំណល់រាវ និងទឹកកខ្វក់។
យោងតាមក្រុមប្រឹក្សាអភិវឌ្ឍន៍កម្ពុជា ក្រុមហ៊ុន Jin Lu Yuan Energy Environment Protection Industry Co., Ltd. ត្រូវបានបង្កើតនៅឆ្នាំ២០២៣ ដើម្បីវិនិយោគទៅលើការបោកគក់៕
