កណ្តាល/បន្ទាយមានជ័យៈ ជនជាតិឥណ្ឌាម្នាក់ ត្រូវ បាន ឃុំខ្លួន ហើយបក្សពួក២នាក់ផ្សេងទៀតកំពុងតែត្រូវបានតាមរកចាប់ខ្លួន ក្រោយពី កន្លែងផលិតគ្រឿងរបស់ពួកគេមួយកន្លែង ត្រូវបានរកឃើញ ជាមួយនឹងគ្រឿងញៀនជាង១តោន។
កន្លែងផលិតគ្រឿង ដែលស្ថិតក្នុងភូមិខ្ពបវែង សង្កាត់កំពង់សំណាញ់ ក្រុងតាខ្មៅត្រូវបានរកឃើញ បន្ទាប់ពីទីតាំងនេះត្រូវបានភ្លើងឆេះ ហើយសមត្ថកិច្ចមូលដ្ឋានបានចុះទៅពន្លត់។
ប្រតិបត្តិការបង្ក្រាបក្នុងសំណុំរឿងនេះ សមត្ថកិច្ចដកហូតវត្ថុតាងជាច្រើនដូចជា៖ គ្រឿងញៀនប្រភេទ MDMA ថ្នាំគ្រាប់ ទម្ងន់ ជាង១តោន (១.៤២៤.១៥០ ក្រាម), គ្រឿងញៀនប្រភេទ MDMA ម្សៅ ទម្ងន់ ជាង ១១៤គីឡូ និងសារធាតុគីមី Cellulose ទម្ងន់ ៥៩៣ គីឡូក្រាម រួមជាមួយឧបករណ៍សម្រាប់ផលិត និងកែច្នៃគ្រឿងញៀនមួយចំនួន។ នេះបើយោងតាម សេចក្តីប្រកាសព័ត៌មានរបស់តុលាការខេត្តកណ្តាល ដែលបានផ្សព្វផ្សាយជាសាធារណៈ នាថ្ងៃទី២ ខែធ្នូ។
ប្រភពដដែលលបានឱ្យដឹងថា នៅថ្ងៃទី១ ខែធ្នូនេះ សាលាដំបូងខេត្តបានទទួលចាត់ការលើសំណុំរឿងព្រហ្មទណ្ឌ ដែលមានជនត្រូវចោទចំនួន៣នាក់។
ក្នុងនោះ មានឈ្មោះ SARABJIT ភេទប្រុស អាយុ៣៨ឆ្នាំ ជនជាតិឥណ្ឌា ត្រូវបានឃាត់ខ្លួននៅកន្លែងកើតហេតុ កាលពីយប់ថ្ងៃទី២៧ ខែវិច្ឆិកាកន្លងមក។
បុរសរូបនេះ ត្រូវចោទប្រកាន់ពីបទ ផលិត រក្សាទុក ជួញដូរ និងប្រើប្រាស់ដោយខុសច្បាប់នូវ សារធាតុញៀន តាមបញ្ញត្តិមាត្រា ៣៩, មាត្រា ៤០ និងមាត្រា ៤៥ នៃច្បាប់ស្តីពីការត្រួតពិនិត្យគ្រឿងញៀន។
បុរសជាជនត្រូវចោទ២នាក់ផ្សេងទៀត ដែលបានរត់គេចខ្លួនមានឈ្មោះ SEWAK SINGH អាយុប្រហែល ២២ឆ្នាំ ជនជាតិឥណ្ឌា និងឈ្មោះ MONCHI អាយុប្រហែល ២៤ឆ្នាំ ជនជាតិប៉ាគីស្ថាន។
ពួកគេ ត្រូវចោទ ប្រកាន់ពីបទ ផលិត រក្សាទុក និងជួញដូរដោយខុសច្បាប់នូវសារធាតុញៀន តាមមាត្រា ៣៩ និងមាត្រា ៤០ នៃច្បាប់ស្តីពីការត្រួតពិនិត្យគ្រឿងញៀន។
តុលាការបញ្ជាក់ថា៖«បន្ទាប់ពីបានពិនិត្យផ្ទៀងផ្ទាត់លើឯកសារ និងភស្តុតាងនានា ដែលមាននៅក្នុងសំណុំរឿង ចៅក្រមស៊ើបសួរ នៃសាលាដំបូងខេត្តកណ្តាល បានសម្រេចឃុំខ្លួនបណ្តោះអាសន្នលើជនត្រូវចោទឈ្មោះ SARABJIT នៅពន្ធនាគារ ខេត្តកណ្តាល ដើម្បីបន្តកិច្ចស៊ើបសួរតាមនីតិវិធីច្បាប់»។
ទាក់ទងនឹងបទល្មើសគ្រឿងញៀននេះដែរ ជនជាតិថៃ១០នាក់ត្រូវបានបញ្ជូនទៅតុលាការខេត្តបន្ទាយមានជ័យ នៅថ្ងៃអង្គារ ទី៣ ខែធ្នូនេះ ពាក់ព័ន្ធនឹងងសារធាតុញៀនជាង១ម៉ឺនគ្រាប់ ដែលត្រូវបានបង្រ្កាប នៅអគារថ្មីមួយកន្លែង ស្ថិតនៅ សង្កាត់អូរជ្រៅ ក្រុងប៉ោយប៉ែត កាលពីយប់ថ្ងៃទី៣០ខែវិច្ឆិកា។
អគ្គស្នងការដ្ឋាននគរបាលជាតិបានឱ្យដឹងថា គ្រឿងញៀន ជាវត្ថុតាង ដែលត្រូវបានឆែកឆេររកឃើញមានជាច្រើនប្រភេទ ដូចជា៖ថ្នាំគ្រាប់ពណ៌ក្រហម អក្សរWY ចំនួន៩ ៥៨០គ្រាប់, ថ្នាំគ្រាប់ពណ៌ទឹកក្រូចអក្សរ WY ចំនួន ១ ១៣០គ្រាប់, ថ្នាំគ្រាប់ពណ៌បៃតងអក្សរ WYចំនួន ៣៨គ្រាប់ និងម្សៅក្រាមស ដែលសង្ស័យជាសារធាតុញៀនចំនួន២៦ថង់ផងដែរ។
អ្នកនាំពាក្យក្រសួងយុត្តិធម៌ បានឱ្យដឹងថា ក្នុងរយៈពេល ១ខែ គិតចាប់ពីថ្ងៃទី១ ដល់ថ្ងៃទី៣០ ខែវិច្ឆិកា ឆ្នាំ២០២៤ សាលាដំបូង និងអយ្យការអមសាលាដំបូងរាជធានី ខេត្ត បានទទួលចាត់ការលើសំណុំរឿងពាក់ព័ន្ធនឹងគ្រឿងញៀនសរុបចំនួន ៣៥៤ ករណី។ ដែលក្នុងនោះ មានជនសង្ស័យចំនួន ៩៩១ នាក់ និងត្រូវបានឃាត់ខ្លួនចំនួន ៧៤៩ នាក់៕
