រោងចក្រផលិតស៊ីម៉ងត៍របស់ក្រុមហ៊ុន ជីបម៉ុង អ៊ិនស៊ី ស៊ីមេន ខបភើរេសិន ដែលបើកដំណើរការកាលពីឆ្នាំ ២០១៨ នៅខេត្តកំពត។ ហ៊ឹន ពិសី
ការផលិតស៊ីម៉ងត៍នៅកម្ពុជា ក្នុងរយៈពេល ១០ ខែដើមឆ្នាំ ២០២៤ បានបរិមាណជិត ៧ លានតោន កើនឡើងបន្តិចបន្តួចបើធៀបនឹងរយៈពេលដូចគ្នាឆ្នាំ ២០២៣ ខណៈតម្លៃស៊ីម៉ងត៍ បានធ្លាក់ចុះបន្តិចបន្តួច។
ទិន្នន័យដែលភ្នំពេញប៉ុស្តិ៍ទទួលបានពីសមាគមឧស្សាហកម្មស៊ីម៉ងត៍កម្ពុជា(CCMA)ក្នុងថ្ងៃទី៣ ខែធ្នូ ឱ្យដឹងថា ចាប់ពីខែមករា ដល់ខែតុលា ឆ្នាំ២០២៤ ការផលិតស៊ីម៉ងត៍នៅកម្ពុជាសម្រេចបាន ៦,៨៤ លានតោន កើនឡើងប្រមាណ ២ ភាគរយបើធៀបនឹងរយៈពេលដូចគ្នាក្នុងឆ្នាំ ២០២៣។
អគ្គលេខាធិការនៃសមាគមឧស្សាហកម្មស៊ីម៉ងត៍កម្ពុជា (CCMA) លោក ពុត ចន្តារិទ្ធ បានប្រាប់ភ្នំពេញប៉ុស្តិ៍ក្នុងថ្ងៃទី៣ ខែធ្នូថា នៅកម្ពុជាបច្ចុប្បន្នមានរោងចក្រផលិតស៊ីម៉ងត៍ចំនួន ៥ កំពុងដំណើរការ និងមាន ១ កំពុងសាងសង់នៅក្នុងខេត្តកំពង់ស្ពឺ។
បរិមាណផលិតកម្មស៊ីម៉ងត៍ដែលផលិតបាននារយៈពេល ១០ ខែដើមឆ្នាំនេះបានកើនឡើងតិចតួចបើធៀបនឹងរយៈពេលដូចគ្នាឆ្នាំមុន ហើយចំនួននេះនឹងមានកំណើនថែមទៀតនៅឆ្នាំក្រោយប្រសិនបើវិស័យសំណង់កម្ពុជាមានសម្ទុះឡើងវិញ។
លោកបន្ថែមថា បច្ចុប្បន្នស៊ីម៉ងត៍ផលិតក្នុងស្រុកត្រូវបានប្រើប្រាស់យ៉ាងច្រើននៅតាមការដ្ឋានសំណង់ទូទាំងប្រទេស ដែលខុសប្លែកយ៉ាងខ្លាំងបើធៀបនឹង ១ ទសវត្សរ៍មុន ដែលស៊ីម៉ងត៍ស្ទើរទាំងអស់ត្រូវបាននាំចូលពីក្រៅប្រទេស។
លោកបានថ្លែងថា៖«បច្ចុប្បន្នផលិតផលស៊ីម៉ងត៍ក្នុងស្រុកអាចផ្គត់ផ្គង់ឱ្យតម្រូវការក្នុងស្រុកចន្លោះពី ៨០-៩០ ភាគរយនៃតម្រូវការប្រើប្រាស់ប្រចាំឆ្នាំ។ នៅឆ្នាំក្រោយបរិមាណផលិតនឹងកើនខ្ពស់ជាងឆ្នាំនេះ»។
ម្ចាស់ការដ្ឋានសំណង់លំនៅឋានមួយកន្លែងក្នុងរាជធានីភ្នំពេញ លោក ទិត្យ សម្បត្តិ បាននិយាយថា បច្ចុប្បន្នស៊ីម៉ងត៍ផលិតក្នុងស្រុកត្រូវបានប្រើប្រាស់ស្ទើតែ ១០០ ភាគរយនៅតាមការដ្ឋានសំណង់នីមួយៗ។ សម្រាប់តម្លៃក្នុងឆ្នាំ ២០២៤ នេះគឺស្ថិតក្នុងចន្លោះពី ៩០-១០០ ដុល្លារក្នុង ១តោន ធ្លាក់ចុះចន្លោះពី ៣-៥ ដុល្លារបើធៀបនឹងឆ្នាំ ២០២៣។
លោកនិយាយថា៖«កត្តាគុណភាព និងតម្លៃ បានធ្វើឱ្យតម្រូវការផលិតតផលស៊ីម៉ងត៍ក្នុងស្រុកមានកាន់តែច្រើន»។
បើតាមលោក សម្បត្តិ កន្លងមកកម្ពុជាបាននាំចូលស៊ីម៉ងត៍ជាច្រើនលានតោនក្នុង ១ឆ្នាំៗពីប្រទេសមួយចំនួនដូចជា វៀតណាម ថៃ និងចិន ជាដើម។
នៅកម្ពុជាបច្ចុប្បន្នមានរោងចក្រផលិតស៊ីម៉ងត៍ចំនួន ៥ កំពុងដំណើរការ គឺ ៤ ស្ថិតក្នុងខេត្តកំពត រួមមាន រោងចក្រស៊ីម៉ងត៍កំពត ស៊ីមេន ខូអិលធីឌី ដែលមានសមត្ថភាពផលិត ២ លានតោនក្នុងមួយឆ្នាំ, រោងចក្រស៊ីម៉ងត៍កម្ពុជាចក្រីទីង មានសមត្ថភាពផលិត ១,៣ លានតោន, រោងចក្រស៊ីម៉ងត៍ ជីប ម៉ុង អ៊ិនស៊ី ស៊ីមេន ខបភើរេស៊ិន មានសមត្ថភាពផលិត ២ លានតោន, និងរោងចក្រស៊ីម៉ងត៍ ថៃ ប៊ុនរ៉ុង អាចផលិតបាន ១ លានតោន។ ចំណែករោងចក្រស៊ីម៉ងត៍ បាត់ដំបង ខនស៍ ស៊ីមេន លីមីធីត មានសមត្ថភាពផលិតបានជិត ២,១ លានតោន។
កាលពីចុងខែសីហា កន្លងមកថ្នាក់ដឹកនាំក្រុមហ៊ុនមកពីប្រទេសចិន Jiangxi Provincial Building Material Group., Ltd. បានបង្ហាញចំណាប់អារម្មណ៍ក្នុងការបណ្តាក់ទុនលើរោងចក្រផលិតស៊ីម៉ងត៍នៅកម្ពុជា។
ព័ត៌មាននេះត្រូវបានលោក Wensheng Chen ប្រធានក្រុមហ៊ុន Jiangxi Provincial Building Material Group., Ltd. លើកឡើងក្នុងឱកាសនៃជំនួបពិភាក្សាជាមួយនឹងលោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា ដើម្បីសុំការណែនាំ និងទទួលព័ត៌មានសំខាន់ៗបន្ថែម ដើម្បីជាមូលដ្ឋានសម្រាប់ក្រុមហ៊ុនពិនិត្យ និងសម្រេចបណ្តាក់ទុនវិនិយោគនៅកម្ពុជា។
លោក Wensheng Chen បានឱ្យដឹងថា Jiangxi Provincial Building Material Group., Ltd. គឺជាក្រុមហ៊ុនវិនិយោគក្នុងវិស័យផលិតស៊ីម៉ងត៍នៅប្រទេសចិន។ គោលបំណងនៃដំណើរទស្សនកិច្ចនៅកម្ពុជាគឺដើម្បីសិក្សាស្វែងយល់បន្ថែមអំពីបរិស្ថានវិនិយោគនៅកម្ពុជា ជាពិសេសការគិតគូរពីគម្រោងបង្កើតរោងចក្រផលិតស៊ីម៉ងត៍នៅកម្ពុជា។
ជាការឆ្លើយតបលោក ជា វុទ្ធី បានសម្តែងការស្វាគមន៍ចំពោះគម្រោងវិនិយោគបង្កើតរោងចក្រផលិតស៊ីម៉ងត៍នៅកម្ពុជា ដែលនឹងចូលរួមចំណែកជំរុញការអភិវឌ្ឍឧស្សាហកម្មកម្ពុជា ជាពិសេសវិស័យសំណង់ និងបានស្នើឱ្យក្រុមហ៊ុនត្រូវមានការគិតគូរពីការចូលរួមកាត់បន្ថយការបំពុលបរិស្ថានជាអតិបរមាតាមរយៈការប្រើប្រាស់បច្ចេកវិទ្យាទំនើប ក៏ដូចជាការប្រើប្រាស់ថាមពលស្អាត។ ជាមួយគ្នានេះគណៈកម្មាធិការវិនិយោគកម្ពុជារង់ចាំដោយក្តីរីករាយក្នុងការផ្តល់កិច្ចសម្របសម្រួលគ្រប់បែបយ៉ាងជូនក្រុមហ៊ុនក្នុងការបណ្តាក់ទុនវិនិយោគផ្ទាល់នៅកម្ពុជា៕
