ជនជាប់ចោទជាជនវៀតណាម ១២នាក់ ត្រូវបានចាប់ខ្លួនពីបទចាប់បង្ខាំងដោយមានស្ថានទមង្ន់ទោស។ រូបថត អគ្គស្នងការដ្ឋាននគរបាលជាតិ ក្រសួងមហាផ្ទៃ
ខេត្ដស្វាយរៀង៖ ឧបទ្ទវហេតុទាក់ទងការបាញ់ប្រហារដោយភាន់ច្រឡំទៅលើរថយន្ដប្រជាពលរដ្ឋ ដែលបង្កការរិះគន់ដល់សមត្ថកិច្ចខេត្ដព្រៃវែង ត្រូវបានស្រាយចម្ងល់នៅពេលកម្លាំងនាយកដ្ឋាននគរបាលព្រហ្មទណ្ឌបានបង្ក្រាបឧក្រិដ្ឋជនដែលជាជនជាតិវៀតណាមចំនួន ១២នាក់។
យោងតាមនាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ ក្រសួងមហាផ្ទៃ បានប្រកាស កាលពីថ្ងៃទី២៩ ខែធ្នូម្សិលមិញថា៖ «កម្លាំងនាយកដ្ឋាននគរបាលព្រហ្មទណ្ឌ បង្ក្រាបដោយជោគជ័យករណីចាប់ជំរិតជនជាតិចិន នៅក្រុងបាវិត ឧក្រិដ្ឋជនវៀតណាម១២នាក់ ត្រូវបានចាប់ខ្លួន»។
ប្រភពពីនាយកនាយកដ្ឋាននគរបាលព្រហ្មទណ្ឌ បានឱ្យដឹងថា កាលពីថ្ងៃទី២៧ ខែធ្នូ ឆ្នាំ២០២៤ កម្លាំងនាយកដ្ឋាននគរបាលព្រហ្មទណ្ឌបានទទួលបណ្តឹងករណីចាប់ឃុំឃាំង និងបង្ខាំងដោយខុសច្បាប់មានស្ថានទម្ងន់ទោស។
ការចាប់របង្ខាំងនោះត្រូវបានធ្វើឡើងនៅចំណុចសង្កាត់បាវិត ក្រុងបាវិត ខេត្តស្វាយរៀង ទៅលើជនរងគ្រោះឈ្មោះ CHEN YITONG ភេទប្រុស អាយុ ២៥ឆ្នាំ ជនជាតិចិន បង្កឡើងដោយជនមិនស្គាល់អត្តសញ្ញាណមួយក្រុម ជិះរថយន្តម៉ាកស្តារិច ពណ៌ស មិនស្គាលផ្លាកលេខ។
នាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ ក្រសួងមហាផ្ទៃ បានបន្ដថា៖ «លុះថ្ងៃទី២៩ ខែធ្នូ ឆ្នាំ២០២៤ វេលាម៉ោង ១២៖០០នាទីរសៀល កម្លាំងជំនាញបានស្រាវជ្រាវរកឃើញ ជនរងគ្រោះខាងលើត្រូវបានក្រុមជនសង្ស័យបង្ខាំងចាក់ សោរទុកនៅក្នុងផ្ទះជួលមួយកន្លែងស្ថិតនៅក្នុងភូមិតាពៅ សង្កាត់បាវិត ខេត្តស្វាយរៀង និងបានឃាត់ខ្លួនជនសង្ស័យជាបន្តបន្ទាប់ចំនួន ១២នាក់»។
គួរបញ្ជាក់ថា ជនសង្ស័យទាំងនោះមានប្រុសចំនួន ១០នាក់ និងស្ដ្រី ២នាក់ អាយុពី ១៧ ទៅ ៣៥ឆ្នាំ ដែលសុទ្ធសឹងជាជនជាតិវៀតណាម។
ទាក់ទងនឹងការបាញ់ច្រឡំទៅលើរថយន្ដប្រជាពលរដ្ឋនេះ សមត្ថកិច្ចខេត្ដព្រៃវែងទទួលស្គាល់កំហុស និងទទួលខុសត្រូវទាំងស្រុងចំពោះឧបទ្ទវហេតុនៃការសម្រេចចិត្តបំផ្ទុះអាវុធបាញ់លើរថយន្ដស្ដាវិច ដែលបង្កឲ្យប្រជាពលរដ្ឋរងរបួស នៅថ្ងៃទី ២៧ ខែធ្នូ ចំណុច ក អណ្ដើក លើផ្លូវជាតិលេខ ០១ ឃុំប្រាសាទ ស្រុកកំពង់ត្របែក ខេត្តព្រៃវែង។
ថ្លៃព្យាបាលទាំងស្រុង និងសំណងផ្សេងៗទៀត ជាការរ៉ាប់រងពីនាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ។
ស្នងការដ្ឋាននរគបាលខេត្ដព្រៃវែង បានស្រាយបំភ្លឺកាលពីថ្ងៃទី២៨ ខែធ្នូ មូលហេតុនាំឱ្យផ្ទុះអាវុធ គឺរថយន្តស្តារិចពណ៌សនេះត្រូវបានកម្លាំងភ្នាក់ងារសម្ងាត់ផ្តល់ព័ត៌មានមកថា ជារថយន្តរបស់ឧក្រិដ្ឋជនកំពុងដឹកជនរងគ្រោះក្នុងករណីចាប់កម្រិតទាមទារប្រាក់ពីខេត្តស្វាយរៀង។
ជួនពេលមានការប្រដេញតាមពីសំណាក់សមត្ថកិច្ច អ្នកបើកបរដែលដឹកកុមារបាក់ដៃម្នាក់ទៅព្យាបាលនៅភ្នំពេញ ទំនងជាភ័យពេកក៏ថយបុករថយន្តសមត្ថកិច្ច ដែលធ្វើឱ្យសមត្ថកិច្ចកាន់តែភាន់ច្រឡំ។
យ៉ាងណាមិញ នគរបាលខេត្តព្រៃវែង បានរៀបចំសំណុំរឿងជូនដល់ក្រុមរថយន្ដរងគ្រោះ ដើម្បីពួកគេទាមទារសំណងផ្សេងៗតាមនីតិវិធីច្បាប់ជាធរមាន៕
