មន្រ្តីជំនាញ នៃអគ្គនាយកដ្ឋានការពារអ្នកប្រើ ប្រាស់ កិច្ចការប្រកួតប្រជែង និងបង្ក្រាបការក្លែងបន្លំ(ក.ប.ប)បានចុះទៅយកសំណាកគំរូ នំសាំងវិច និងគ្រឿងផ្សំ នៅហ៊ាង ដើម្បីធ្វើការវិភាគ រកកត្តាបង្កគ្រោះថ្នាក់។ រូបថត ក.ប.ប
ព្រះសីហនុៈ យ៉ាងហោចណាស់មនុស្សចំនួន៤១នាក់ ត្រូវបានបញ្ជូនទៅមន្ទីរពេទ្យក្នុងក្រុងព្រះសីហនុ ដោយសារតែបរិភោគ នំសាំងវិច ដែលមានផ្ទុកប៉ាតេរីចំនួន២ប្រភេទ កាលពីថ្ងៃទី២៦ ខែធ្នូ ឆ្នាំ២០២៤។ នេះបើយោងតាមអគ្គនាយកដ្ឋានការពារអ្នកប្រើ ប្រាស់ កិច្ចការប្រកួតប្រជែង និងបង្ក្រាបការក្លែងបន្លំ(ក.ប.ប)នៅថ្ងៃទី៣១ ខែធ្នូនេះ។
ក.ប.ប.បានឱ្យដឹងថា មនុស្សចំនួន៤១នាក់នោះ មានអាការៈរាគរូស និងក្អួតចង្អោរ ហើយត្រូវបានបញ្ជូនទៅសង្គ្រោះបន្ទាន់នៅមន្ទីពេទ្យ បន្ទាប់ពីបានទទួលទាននំសាំងវិច ដែលទិញមកពីអាហារដ្ឋានមួយកន្លែង។ ករណីនេះ ត្រូវបានផ្តោតការសង្ស័យថា ជាករណីពុលអាហារ។
បន្ទាប់ពីទទួលបានព័ត៌មានខាងលើ មន្ត្រីជំនាញនៃសាខា ក.ប.ប. ខេត្តព្រះសីហនុ បានចុះដល់ទីតាំងកើតហេតុ និងអាហារដ្ឋាននោះ ដើម្បីប្រមូលព័ត៌មាន និងបានដកយកសំណាកគំរូ ដែលរួមមាននំសាំងវិច និងគ្រឿងផ្សំសម្រាប់ផលិតនំសាំងវិចចំនួន ១២គំរូ ដើម្បីបញ្ជូនមកមន្ទីរពិសោធន៍នៃអគ្គនាយកដ្ឋាន ក.ប.ប. ធ្វើការវិភាគរកកត្តាបង្កគ្រោះថ្នាក់នានា។
ក.ប.ប បញ្ជាក់ថា៖«លទ្ធផលវិភាគបានបង្ហាញថា សំណាកគំរូ ដែលទទួលបានពីកន្លែងកើតហេតុ ត្រូវបានរកឃើញ វត្តមានបាក់តេរីប្រភេទ អ៊ីកូឡាយ(E-coli) ក្នុងបរិមាណលើសកម្រិតអនុញ្ញាត ពោលគឺចំនួនច្រើនជាង ១០០ CFU/g និងមាន វត្តមាន បាក់តេរីប្រភេទ ស្តាហ្វីឡូកូកឹសអូរៀស (Staphylococcus aureus) ក្នុងបរិមាណលើសកម្រិតសុវត្ថិភាព ពោលគឺចំនួនច្រើនជាង ១០.០០០ CFU/g»។
ក.ប.ប បានលើកឡើងថា ស្តាហ្វីឡូកូកឹសអូរៀស (Staphylococcus aureus) អាចនឹងបង្កការពុលអាហារ បន្ទាប់ពីបានទទួលទានអាហារមានផ្ទុកបាក់តេរីប្រភេទនេះ ក្នុងរយៈពេលចាប់ពី១ ទៅ៦ម៉ោង ដោយបង្ហាញចេញនូវអាការៈរោគមួយចំនួនដូចជា ក្អួតចង្អោរ ចុកពោះ និង រាគរូសជាដើម។
មន្ទីរសុខាភិបាលខេត្តព្រះសីហនុ បានឱ្យដឹងដែរថា ក្រោយពីទទួលបានព័ត៌មានពីការពុលសាំងវិចនេះមក ក្រុមការងារមន្ទីរសុខាភិបាលខេត្ត ដែលរួមមានក្រុមឆ្លើយតបបន្ទាន់ និងក្រុមការងារសុវត្ថិភាពចំណីអាហារ បានចុះធ្វើការអង្កេតស្រាវជ្រាវលើករណីនេះ កាលពីព្រឹកថ្ងៃទី ២៨ ខែធ្នូ ឆ្នាំ២០២៤។
ក្រុមការងារបានជួបជាមួយអ្នកជំងឺ ៥នាក់ ដែលបានចូលសំរាកព្យាបាលនៅមន្ទីរពេទ្យកាលពីយប់ថ្ងៃ ទី២៧ ខែធ្នូ ឆ្នាំ២០២៤។ ពួកគាត់មានអាការៈពុលចំណីអាហារដូចជា៖ ក្តៅខ្លួន រាក ក្អួត ចង្អោរ ចុកពោះ ឈឺ ក្បាល អស់កម្លាំង និង ខ្សោះជាតិទឹក ប៉ុន្តែ បន្ទាប់ពីបានទទួលការព្យាបាលនាថ្ងៃទី ២៩ ខែធ្នូ ឆ្នាំ២០២៤ នេះអ្នក ជំងឺទាំង ៥នាក់នោះបានធូស្បើយហើយ។
មន្ទីរសុខាភិបាលបានចាត់វិធានការបឋម ដោយចាត់ក្រុម ការងារសុវត្ថិភាពចំណីអាហារ ចុះណែនាំលើអនាម័យចំណីអាហារចំពោះទីតាំងអាហារដ្ឋានដែលបានលក់នំសាំងវ៉ិចនេះ។
ប្រធានមន្ទីរសុខាភិបាលខេត្តព្រះសីហនុ លោកស្រីលឹម សាមានបានឱ្យដឹងថា ការពុលនេះ មិនមានករណីធ្ងន់ធ្ងរ រហូតដល់បាត់បង់ជីវិតនោះទេ។
លោកស្រីបញ្ជាក់ថា៖«ពួកគាត់ទាំង៥នាក់បានចូលសម្រាកពេទ្យ ពីថ្ងៃទី២៧មក ហើយបានចេញពីពេទ្យព្រឹកនេះហើយ [ថ្ងៃអង្គារ ទី៣១]។ យើងបានចុះទៅធ្វើការណែនាំនៅហ៊ាង»។ លោកស្រីបានបន្ត នៅថ្ងៃអង្គារ ទី៣១ ខែធ្នូនេះ ក្រុមការងារ ដែលដឹកនាំដោយអភិបាលរងខេត្តម្នាក់ក៏បានចុះទៅធ្វើការណែនាំដល់ម្ចាស់ហ៊ាងនោះបន្ថែមទៀតផងដែរ។
ក.ប.ប ក៏បានលើកឡើងដែរថា វត្តមាននៃបាក់តេរីទាំង២ប្រភេទខាងលើនេះបង្ហាញថា ការអនុវត្តអនាម័យក្នុងផលិតកម្មអនាម័យ បុគ្គលិក អាចនៅមិនទាន់បានល្អប្រសើរនៅឡើយ។ក្នុងនាមជាអង្គភាពទទួលបន្ទុកផ្នែកសុវត្ថិភាពម្ហូបអាហារ ក.ប.ប បានធ្វើការអំពាវនាវដល់ប្រតិបត្តិករអាជីវកម្មម្ហូបអាហារទាំងអស់ ជាពិសេស អ្នករៀបចំ កែច្នៃ និងផលិតម្ហូបអាហារ ត្រូវតែយកចិត្តទុកដាក់ខ្ពស់បំផុតក្នុងការអនុវត្តឱ្យបានជាប្រចាំនូវគន្លឹះទាំង៥ ដែលធ្វើឱ្យម្ហូបអាហារមានសុវត្ថិភាព របស់អង្គការសុខភាពពិភពលោក (WHO) ដើម្បីធានាដល់សុខភាព និងសុវត្ថិភាពអ្នកប្រើប្រាស់ ជាពិសេសដើម្បីជួយឱ្យប្រតិបត្តិករអាជីវកម្មម្ហូបអាហាររួចផុតពីការប្រឈមចំពោះមុខច្បាប់ផងដែរ៕
