លោក វ៉ាង វិនពិន (ស្ដាំ) ចាប់ដៃជាមួយលោក ម៉ាង ស៊ីណេត នៅថ្ងៃទី៣០ ខែធ្នូ ២០២៤។ រដ្ឋបាលខេត្តព្រះសីហនុ
ឯកអគ្គរដ្ឋទូតចិន លោក វ៉ាង វិនពិន (Wang Wenbin) និងលោក ម៉ាង ស៊ីណេត អភិបាលខេត្តព្រះសីហនុ បានឯកភាពបន្តពង្រឹងកិច្ចសហប្រតិបត្តិការរវាងប្រទេសចិន និងខេត្តព្រះសីហនុ ក្នុងវិស័យសេដ្ឋកិច្ច ពាណិជ្ជកម្ម ការវិនិយោគ ទេសចរណ៍ និងការប្រយុទ្ធប្រឆាំងនឹងការលេងល្បែងអនឡាញ និងការឆបោកតាមទូរគមនាគមន៍។
ការអះអាងបែននេះធ្វើឡើងដោយលោក វ៉ាង វិនពិន បន្ទាប់ពីលោកបានជួបជាមួយលោក ម៉ាង ស៊ីណេត ក្នុងជំនួបកាលពីថ្ងៃទី៣០ ខែធ្នូ ដោយលោកអះអាងថា កិច្ចសហប្រតិបត្តិការនេះនឹងជួយជំរុញឲ្យខេត្តព្រះសីហនុក្លាយជាគំរូសម្រាប់កិច្ចសហប្រតិបត្តិការតាមខេត្ត ក្រុងរវាងប្រទេសទាំងពីរ។
លោកសរសេរនៅទំព័រហ្វេសប៊ុករបស់លោកថា៖ «អបអរសាទរ ខេត្តព្រះសីហនុ ដែលសម្រេចបានផលិតផលក្នុងស្រុកសរុបសម្រាប់មនុស្សម្នាក់លើសពី ៤០០០ ដុល្លារ។ តំបន់សេដ្ឋកិច្ចពិសេសក្រុងព្រះសីហនុ ដែលវិនិយោគដោយប្រទេសចិន រួមចំណែកជាងពាក់កណ្តាលនៃផលិតផលក្នុងស្រុកសរុបរបស់ខេត្តព្រះសីហនុ។ ភ្ញៀវទេសចរចិនគឺជាចំនួនភ្ញៀវទេសចរបរទេសច្រើនជាងគេដែលមកទស្សនាខេត្តព្រះសីហនុ»។
លោក ឡុង ឌីម៉ង់ អភិបាលរងខេត្ត និងជាអ្នកនាំពាក្យ បានឲ្យដឹងថា ឯកអគ្គរដ្ឋទូតចិនបានសន្យាជួយទាក់ទាញអ្នកវិនិយោគ ពង្រឹងពាណិជ្ជកម្ម និងជួយផ្សព្វផ្សាយពីសក្ដានុពលខេត្តព្រះសីហនុដល់ភ្ញៀវទេសចរចិន។
លោកបន្តថា ទិសដៅអភិវឌ្ឍខេត្តព្រះសីហនុត្រូវបានកំណត់រួចហើយតាមរយៈផែនការមេ ដោយផ្ដោតទៅលើពាណិជ្ជកម្មអន្តរជាតិ ដឹកជញ្ជូន ភស្តុភារកម្ម ឧស្សាហកម្ម កសិឧស្សាហកម្ម មជ្ឈមណ្ឌលហិរញ្ញវត្ថុអន្តរជាតិ ដូច្នេះខេត្តនេះខេត្តព្រះសីហនុមានឱកាសច្រើនសម្រាប់អ្នកវិនិយោគ។
ពាក់ព័ន្ធនឹងអំពើល្មើសច្បាប់ដូចជា ល្បែងអនឡាញ និងការបោក លោកថ្លែងថា៖ «ការជួយផ្ដល់ព័ត៌មានគ្នាទៅវិញទៅមក គឺជារឿងមួយសំខាន់ដែលឈានដល់ការបង្ក្រាប ល្បែងអនឡាញខុសច្បាប់ ជាពិសេសការប្រយុទ្ធប្រឆាំងនឹងការឆបោក និងករជួញដូរគ្រប់ទម្រង់។ ស្ថានភាពអនឡាញអីហ្នឹងបានស្ងាត់ច្រើនណាស់ ព្រោះការប្រឆាំងបទល្មើសនេះជាការប្ដេជ្ញាចិត្តមួយមុតមាំរដ្ឋាភិបាល និងអាជ្ញាធរមានសមត្ថកិច្ចទាំងអស់»។
ទិដ្ឋភាពខេត្តព្រះសីហនុ ក្នុងខែធ្នូ ឆ្នាំ២០២៤។ ហុង រស្មី
លោក ហុង វណ្ណៈ អ្នកស្រាវជ្រាវសេដ្ឋកិច្ចនៅរាជបណ្ឌិត្យសភាកម្ពុជា បានថ្លែងថា បើប្រៀបធៀបចំណូលនឹងចំនួនប្រជាជននៃខេត្តព្រះសីហនុ ផលិតផលសរុបសម្រាប់មនុស្សម្នាក់នៅខេត្តព្រះសីហនុ អាចឈានដល់ ៤០០០ដុល្លារ ដូចលោក វ៉ាង វិនពិន លើកឡើង ដោយសារតែកំណើននៃការអភិវឌ្ឍនៃខេត្តនេះកើនឡើង។
យ៉ាងណាក៏ដោយ បច្ចុប្បន្ននេះ ផលិតផលក្នុងស្រុកសរុបសម្រាប់មនុស្សម្នាក់របស់កម្ពុជាស្ថិតនៅក្រោម ៣០០០ដុល្លារ។
លោក ហុង វណ្ណៈ បន្តថា ដើម្បីឲ្យកម្ពុជាទទួលបានផលចំណេញពីការអភិវឌ្ឍនៅខេត្តព្រះសីហនុ ការគ្រប់គ្រងប្រភពចំណូលនៅខេត្តនេះគឺជារឿងសំខាន់។
លោកថ្លែងថា៖ «បើយើងគ្រប់គ្រង់អត់បាន ប្រមូលចំណូលអត់បាន ការវិនិយោគនៅខេត្តនេះវាទៅជារឿងមិនសូវមានផលប្រយោជន៍សម្រាប់សង្គមជាតិ ហើយការចែករំលែកផលចំណេញដើម្បីឲ្យសង្គមក្លាយជាសង្គមស៊ីវិល័យពីមួយថ្ងៃទៅមួយថ្ងៃ គឺជាកាតព្វកិច្ចរបស់អ្នកដឹកនាំ។ ការអភិវឌ្ឍមិនអាចរីកចម្រើនសម្រាប់មនុស្សតែមួយក្ដាប់តូចទេ គ្រាន់តែថា កម្រិតនៃការទទួលបានផលចំណេញវាខុសគ្នា»។
មិនថានៅខេត្តព្រះសីហនុ ឬនៅកម្រិតទូទាំងប្រទេសកម្ពុជា ការបែងចែកផលចំណេញពីការរីកចម្រើនរបស់ប្រទេសទៅដល់ប្រជាពលរដ្ឋគ្រប់ស្រទាប់វណ្ណៈគឺជារឿងសំខាន់ ចៀសវាងការអភិវឌ្ឍដែលធ្វើឲ្យមានគម្លាតឆ្ងាយរវាងអ្នកមាននិងអ្នកក្រ។ នេះជាការលើកឡើងរបស់លោក ហុង វណ្ណៈ៕
