មន្ដ្រីនគរបាលខណ្ឌជ្រោយចង្វារឃាត់ខ្លួនក្មេងទំនើង ដែលពាក់ព័ន្ធករណីបង្ហោះម៉ូតូតាមផ្លូវសាធារណៈ នៅថ្ងៃទី២៦ ខែធ្នូ ត្រូវបានបិទបាំងអត្ដសញ្ញាណ។ រូបថត ស្នងការដ្ឋាននគរបាលរាជធានីភ្នំពេញ
ភ្នំពេញ៖ ក្រសួងមហាផ្ទៃបានចេញសេចក្តីណែនាំស្ដីពីការផ្សព្វផ្សាយព័ត៌មានសន្តិសុខសណ្តាប់ធ្នាប់សង្គម សម្រាប់មន្ត្រីមានសមត្ថកិច្ចក្របខ័ណ្ឌរបស់ក្រសួង ដោយសង្កត់ធ្ងន់លើការការពារសិទ្ធិបុគ្គល និងការប្រកាន់ខ្ជាប់នូវប្រសិទ្ធភាព និងសង្គតិភាពតាមគន្លងច្បាប់។
នៅក្នុងសេចក្តីណែនាំដែលបានចេញផ្សាយនៅថ្ងៃទី២៧កន្លងទៅ ក្រសួងមហាផ្ទៃបានរៀបរាប់លម្អិតអំពីគោលនយោបាយដែលត្រូវបានរៀបចំឡើងដើម្បីធានាថា មន្ត្រីក្រោមចំណុះត្រូវរក្សាការសម្ងាត់វិជ្ជាជីវៈ និងផ្ដល់នូវទំនុកចិត្តសាធារណៈ។
អាជ្ញាធរដែនដី មន្ត្រីរាជការស៊ីវិល មន្ត្រីនគរបាលជាតិកម្ពុជា មន្ត្រីពន្ធនាគារក្របខ័ណ្ឌក្រសួងមហាផ្ទៃ ក្នុងការផ្តល់ ឬផ្សព្វផ្សាយ ព័ត៌មានជាសាធារណៈឱ្យមានប្រសិទ្ធភាព និងការទទួលខុសត្រូវវិជ្ជាជីវៈស្របតាមគោលការណ៍ច្បាប់។
យោងតាមសេចក្ដីណែនាំបានបង្ហាញថា៖ «មុនពេល ក្នុងពេល និងក្រោយពេលប្រតិបត្តិការ មន្ត្រីមានសមត្ថកិច្ច ត្រូវរក្សាការសម្ងាត់វិជ្ជាជីវៈ មិនត្រូវផ្តល់ ឬផ្សព្វផ្សាយព័ត៌មានទៅបុគ្គលគ្មានភារកិច្ច សាធារណជន និងភ្នាក់ងារព័ត៌មានឡើយ»។
សេចក្ដីណែនាំរបស់ក្រសួងមហាផ្ទៃ បានបន្ដថា៖ «ក្នុងពេលប្រតិបត្តិការ មន្ត្រីមានសមត្ថកិច្ច មិនអនុញ្ញាតឱ្យថតរូបភាព វីដេអូ សំឡេង និងផ្តល់ ឬ ផ្សព្វផ្សាយសកម្មភាពប្រតិបត្តិការជាដាច់ខាត ទោះតាមទម្រង់ណាក៏ដោយ»។
ករណីនេះ ប្រធានអង្គភាព ឬ ប្រធានក្រុមប្រតិបត្តិការ ត្រូវចាត់តាំងមន្ត្រីសម្រាប់ថតសកម្មភាពទុកបម្រើការងារជំនាញ។
មន្ត្រីមានសមត្ថកិច្ច ត្រូវអនុវត្តវិធានការជំនាញ និងហាមឃាត់បុគ្គលគ្មានភារកិច្ច សាធារណជន និង ភ្នាក់ងារព័ត៌មានផ្សេងៗដែលនាំឱ្យប៉ះពាល់ដល់សមត្ថកិច្ចជំនាញដំណើរការនីតិវិធី និងសិទ្ធិបុគ្គល។
ពួកគេមិនត្រូវផ្តល់ ឬផ្សព្វផ្សាយជាសាធារណៈ តាមមធ្យោបាយនានានូវឯកសារ ជំនាញគ្រប់ដំណាក់កាលនីតិវិធីដល់ភាគីដែលគ្មានសមត្ថកិច្ចក្នុងសំណុំរឿងជាដាច់ខាត។ លើកលែង តែករណីចាំបាច់ដែលសម្រេចដោយថ្នាក់ដឹកនាំមានសមត្ថកិច្ច។
ក្រសួងមហាផ្ទៃបានឱ្យដឹងថា៖ «ក្នុងករណីទទួលបានគោលការណ៍អនុញ្ញាតឱ្យផ្តល់ ឬផ្សព្វផ្សាយព័ត៌មាន រាល់រូបភាព ឬវីដេអូពាក់ព័ន្ធ នឹងជនសង្ស័យ សាក្សី ជាពិសេសអនីតិជន និងជនរងគ្រោះពីបទល្មើសមួយចំនួន គប្បីបិតបាំង មុខ និង\ឬអត្តសញ្ញាណ»។
យ៉ាងណាមិញ ទាំងរូបភាព និងវីដេអូត្រូវធ្វើឱ្យព្រាលៗចំពោះជនសង្ស័យដែលមានដៃជាប់ខ្នោះ ឬចំណង និងគប្បីជ្រើសរើសរូបភាព ឬប្លង់វីដេអូណាដែលមិនបង្ហាញបច្ចេកទេសជំនាញរបស់សមត្ថ រួមទាំង រូបភាព ឬប្លង់វីដេអូហិង្សា ឬអ្វីដែលនាំឱ្យប៉ះពាល់សតិអារម្មណ៍ វប្បធម៌ និងប្រពៃណីល្អរបស់ជាតិ។
អាជ្ញាធរក្រោមឱវាទក្រសួងមហាផ្ទៃ ត្រូវរក្សាឱ្យបាននូវសិទ្ធិបុគ្គល នីតិវិធីនៃការ ស៊ើបអង្កេត សុវត្ថិភាពសំណុំរឿង និងចៀសឱ្យផុតពីការប៉ះពាល់ដល់ស្ថាប័នមានសមត្ថកិច្ចដទៃ ពេលរាល់ការធ្វើសន្និសីទសារព័ត៌មាន បង្ហាញជនសង្ស័យ ឬការបកស្រាយជាសាធារណៈ៕
