អ្នកមានឥទ្ធិពលលើបណ្ដាញសង្គម ឬ អ្នកផលិតមាតិកា ជួបជាមួយរដ្ឋមន្ត្រីក្រសួងព័ត៌មាន កាលពីថ្ងៃទី៣ ខែធ្នូ ២០២៤។ ក្រសួងព័ត៌មាន
រដ្ឋមន្ត្រីក្រសួងព័ត៌មានមើលឃើញពីសារៈសំខាន់នៃអ្នកផលិតមាតិកានៅលើបណ្ដាញសង្គម ដែលបានផលិតមាតិកាកម្សាន្តនិងអប់រំផ្សេងៗ ខុសពីអ្នកផលិតមាតិកាដើម្បីតែរកប្រាក់ ឬ MMO មួយចំនួនដែលផលិតមាតិកាដើម្បីតែរកប្រាក់ ដោយប្រាសចាកពីការពិត និងមិនគោរពក្រមសីលធម៌។
លោក នេត្រ ភក្ត្រា រដ្ឋមន្ត្រីក្រសួងព័ត៌មានបានជួបពិភាក្សានិងផ្ដល់ជូននូវបណ្ណែសរសើរដល់អ្នកបង្កើតមាតិកាជាង ១០០នាក់ នៅរសៀលថ្ងៃទី០៣ ខែធ្នូ ដោយលោកថ្លែងថា ក្រៅពីកម្សាន្តនិងផ្ដល់ជាព័ត៌មាន អ្នកផលិតមាតិកាថែមទាំងជួយរក្សាបាននូវសណ្តាប់ធ្នាប់នៅក្នុងសង្គមផងដែរ។
លោកត្រូវបានស្រង់សម្ដីដោយប្រព័ន្ធផ្សព្វផ្សាយរបស់ក្រសួងថា៖ « អ្នកផលិតមាតិកា Content Creator ខុសពីក្រុម MMO (Make Money Online) ដែលគេមិនខ្វល់ពីក្រមសីលធម៌វិជ្ជាជីវៈអ្វីនោះទេ គេគិតត្រឹមតែចង់បាន Like, Comment, Shares ដើម្បីទទួលបានលុយពី Facebook, TikTok ឬប្រព័ន្ធផ្សេងៗទៀត»។
លោក នេត្រ ភក្ត្រា ក៏បាន នេត្រ ភក្ត្រា បានលើកទឹកចិត្តដល់ក្រុម អ្នកផ្សព្វផ្សាយតាមបណ្តាញសង្គម ឬ អ្នកមានឥទ្ធិពលនៅលើបណ្ដាញសង្គម (Influencers) ឲ្យបន្តផលិតមាតិកា មិនត្រឹមតែសម្រាប់ប្រជាជនក្នុងស្រុកប៉ុណ្ណោះទេ គឺមាតិកាដែលមានតម្លៃជាសកល ដើម្បីចូលរួមផ្សព្វផ្សាយអំពីការពិតរបស់កម្ពុជាទៅកាន់ពិភពលោក ដែលជាការផ្តល់ផលប្រយោជន៍ដល់ជាតិ ប្រជាជន និងចូលរួមថែរក្សាសុខសន្តិភាព ស្ថិរភាពបានរឹងមាំ។
លោករដ្ឋមន្ត្រី ក៏លើកទឹកចិត្តឲ្យអ្នកផលិតមាតិកាគោរពក្រមសីលធម៌វិជ្ជាជីវៈក្នុងការប្រើប្រាស់ប្រព័ន្ធផ្សព្វផ្សាយសង្គម ដោយមិនផ្សាយរូបអាក្រាត រូបហិង្សា ការធ្វើឲ្យមានការស្អប់រើសអើងជាតិសាសន៍ផ្សេងៗ។ ពួកគេត្រូវគោរពក្រមសីលធម៌ក្នុងវិជ្ជាជីវៈសារព័ត៌មាន និងសោតទស្សន៍។
លោកថ្លែងថា អ្នកផលិតមាតិកា «ត្រូវប្រុងប្រយ័ត្នខ្ពស់ គឺប្រសិនបើមានភាព មិនច្បាស់នោះ សូមកុំផ្សព្វផ្សាយ ព្រោះនៅពេលដែលយើងផ្សព្វផ្សាយនូវព័ត៌មានដែលមិនត្រឹមត្រូវ មិនពិត ព័ត៌មានអាក្រក់ វានឹងសាយភាយលឿនយ៉ាងលឿន ហើយការផ្សាយកែតម្រូវមិនសូវមានអ្នកមើលនោះទេ»។
កាលពីពេលថ្មីៗ ការសិក្សាស្រាវជ្រាវមួយដោយអង្គការយូណេស្កូ បានរកឃើញថា ២ភាគ៣នៃអ្នកផលិតមាតិកានៅលើបណ្ដាញសង្គមមិនបានផ្ទៀងផ្ទាត់ព័ត៌មានមុននឹងបង្ហោះនៅលើបណ្ដាញសង្គម។ ដោយមើលឃើញពីភាពចាំបាច់នៃការផ្ទៀងផ្ទាត់ព័ត៌មាន យូណេស្កូបានបើកវគ្គបណ្ដុះបណ្ដាលសម្រាប់អ្នកផលិតមាតិកានៅលើពិភពលោក រួមទាំងនៅកម្ពុជាផងដែរ។
លោក ប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជា ដែលបានឃ្លាំមើលពីការប្រើប្រាស់បណ្ដាញសង្គមនៅកម្ពុជា យល់ឃើញថា អ្នកផលិតមាតិកានៅសម្រាប់បណ្ដាញសង្គមមិនសូវបានយកចិត្តទុកដាក់លើក្រមសីលធម៌ក្នុងមាតិការបស់ពួកគេទេ ពីព្រោះអ្នកខ្លះមិនបានឆ្លងកាតការបណ្ដុះបណ្ដាលអំពីវិជ្ជាជីវៈសារព័ត៌មាន សីលធម៌ក្នុងការបង្កើតមាតិកា ហើយភាគច្រើនគឺដើម្បីទទួលបានចំណូលពីបណ្ដាញសង្គម ឬពីអ្នកឧបត្ថម្ភ (sponsors)។
លោកបន្តថា៖ «ខ្ញុំសង្កេតឃើញថា ភាគច្រើនប្រើប្រាស់តាកទិចក្នុងការទាក់ទាញអារម្មណ៍បែបអវិជ្ជមានច្រើន ដើម្បីទទួលបាន view បាន like និង share ច្រើន។ ដូច្នេះហើយ ដើម្បីឲ្យអ្នកប្រើប្រាស់បណ្ដាញសង្គមចៀសផុតពីការយល់ខុសលើព័ត៌មានមិនគ្រប់ជ្រុងជ្រោយ ឬមិនបានត្រួតពិនិត្យលើប្រភព ឬ ភាពត្រឹមត្រូវ ឬ ព័ត៌មានក្លែងក្លាយ ខ្ញុំជំរុញឲ្យអ្នកផលិតមាតិការៀនសូត្របន្ថែមទាក់ទងនឹងវិជ្ជាជីវៈសារព័ត៌មាន និងក្រមសីលធម៌ក្នុងការផ្សព្វផ្សាយ»៕
