សត្វទោចថ្ពាល់លឿង ដែលប្រភេទសត្វជិតផុតពូជជាសកល នៅក្នុងគម្រោងទេសចរណ៍ធម្មជាតិ Jahoo ឈ្នះពានរង្វាន់និរន្តរភាព ក្នុងតំបន់អាស៊ីអាគ្នេយ៍។ រូបថត អង្គការ WCS
មណ្ឌលគិរីៈ ជំរំសត្វទោចចាហ៊ូ (Jahoo) ដែលជាគម្រោងទេសចរណ៍ធម្មជាតិ គ្រប់គ្រងដោយសហគមន៍ជនជាតិដើមភាគតិចព្នង ត្រូវបានជ្រើសរើសជាអ្នកឈ្នះពានរង្វាន់និរន្តរភាព នៃមូលនិធិ EXO ជាលើកដំបូង ក្នុងការទទួលស្គាល់កិច្ចខិតខំប្រឹងប្រែង ដែលកំពុងធ្វើជារៀងរាល់ថ្ងៃ ដើម្បីធ្វើឱ្យJahoo ក្លាយជាកន្លែងទេសចរណ៍លំដាប់ពិភពលោកសម្រាប់ការអភិរក្ស និងអេកូទេសចរណ៍តែមួយគត់នៅកម្ពុជា។
អង្គការសមាគមអភិរក្សសត្វព្រៃ (WCS) កម្ពុជា និង ក្រសួងបរិស្ថាន ជាដៃគូ នាថ្ងៃទី៥ ខែធ្នូនេះ បានប្រកាស និងសម្តែង សេចក្តីសោមនស្សរីករាយ ចំពោះJahoo ដែលត្រូវបានជ្រើសរើសជាអ្នកឈ្នះ ពានរង្វាន់និរន្តរភាព មូលនិធិ EXO ឆ្នាំ២០២៤ (2024 EXO Foundation Sustainability Awards) ក្នុង ប្រភេទ'Planet - មិនរកប្រាក់ចំណេញ/សហគ្រាសសង្គម'។
ក្នុងនោះ រួមមានរង្វាន់ធំចំនួន៧ពាន់ដុល្លារ ដែលផ្តល់ ដោយទទួលស្គាល់ការប្តេជ្ញាចិត្តរបស់ពួកគេ ចំពោះនិរន្តរភាព ការអនុវត្ត និងគំនិតផ្តួចផ្តើមទេសចរណ៍។ មូលនិធិEXO គឺជាអង្គការមិនរកប្រាក់ចំណេញ ដែលគាំទ្រគម្រោងមូលដ្ឋានក្នុងតំបន់អាស៊ីអាគ្នេយ៍។
បន្ថែមពីលើនេះ Jahoo ក៏ទទួលបានការបោះឆ្នោតច្រើនជាងគេ សម្រាប់ពានរង្វាន់ 'ជម្រើសរបស់ប្រជាជន' (the ‘People’s Choice’ award) នៅក្រោមចំណាត់ថ្នាក់នៃ Planet ជាមួយនឹងការបោះឆ្នោតចំនួន ៤៤១ មកពីជុំវិញពិភពលោកផងដែរ។
នាយកប្រចាំប្រទេស នៃអង្គការសមាគមអភិរក្សសត្វព្រៃ (WCS) កម្ពុជា លោកAlistair Mould បាននិយាយថា ពួកគេពិតជាមានក្តីរំភើបរីករាយ ដោយឃើញ Jahoo ត្រូវបានជ្រើសរើសជាអ្នកឈ្នះនេះ ដែលនេះបង្ហាញថា កិច្ចខិតខំប្រឹងប្រែងរួមគ្នារបស់ពួកគេទាំងនេះបានសំរេចជាលទ្ធផលហើយ។
លោកបានថ្លែងថា៖«តាមរយៈរង្វាន់ទាំងនេះ យើងជឿជាក់ថា នឹងមានអ្នកទេសចរកាន់តែច្រើននឹងមក Jahoo ដើម្បីទទួលបទពិសោធន៍ នៃការដើរតាមផ្លូវ Gibbon ដោយផ្ទាល់ ដែលផ្តល់អត្ថប្រយោជន៍ដល់សកម្មភាពអភិរក្សព្រៃឈើ ដោយសហគមន៍ជនជាតិដើមភាគតិចអណ្តូងក្រឡឹង»។
លោកបានលើកឡើងថា សត្វទោចថ្ពាល់លឿង ដែលជិតផុតពូជជាសកលទាំងនេះ គឺជាការទាក់ទាញដ៏សំខាន់សម្រាប់អ្នកទេសចរ។
ដូច្នេះហើយ ការការពារជម្រក និងសុខុមាលភាពរបស់ពួកគេ គឺជាគន្លឹះក្នុងការកំណត់ភាពជោគជ័យរយៈពេលវែង និងនិរន្តរភាព នៃគំនិតផ្តួចផ្តើមអេកូទេសចរណ៍នេះ។
នៅពេលដែល ប្រារព្ធខួបលើកទី២៥ឆ្នាំរបស់ខ្លួននៅក្នុងប្រទេសកម្ពុជា អង្គការWCS បានចែករំលែកព័ត៌មាន នៃការឈ្នះពានរង្វាន់នេះ ដល់ភាគីពាក់ព័ន្ធទាំងអស់ ដែលគាំទ្រ Jahoo។ អង្គការWCSបាន ថ្លែងអំណរគុណអ្នកបោះឆ្នោតគាំទ្រ គណៈកម្មាធិការសហគមន៍ជនជាតិដើមភាគតិចអណ្តូងក្រឡឹង សម្រាប់ការគ្រប់គ្រងរបស់ពួកគេ។
ចំពោះភាពជោគជ័យរបស់Jahoo នាពេលបច្ចុប្បន្ននេះ អង្គការWCSក៏បាន អរគុណចំពោះការគាំទ្រយូរអង្វែងរបស់ក្រសួងបរិស្ថាន, ទីភ្នាក់ងារUSAID កម្ពុជា, គម្រោងរេដបូកកែវសីមា និងអង្គការ World Hope International តាមរយៈការផ្តួចផ្តើមជាច្រើននៅក្នុងតំបន់កែវសីមា។
អនុរដ្ឋលេខាធិការ និងជាអ្នកនាំពាក្យក្រសួងបរិស្ថាន លោកខ្វៃ អាទិត្យា បានឱ្យដឹងថា ការបង្កើតសហគមន៍តំបន់ការពារធម្មជាតិបែបនេះ គឺជាការជួយលើកកម្ពស់ជីវភាពសហគមន៍ និងការចូលរួមការអភិរក្សធនធានធម្មជាតិ ជាពិសេសនោះគឺ អភិរក្សវប្បធម៌ ទំនៀមទម្លាប់ប្រពៃណីរបស់សហគមន៍ជនជាតិដើមភាគតិច តែម្ដង។
លោកមានប្រសាសន៍ថា៖«ពលរដ្ឋនៅតាមសហគមន៍តំបន់ការពារធម្មជាតិហ្នឹង គឺបានទទួលនូវការលើកកម្ពស់ជីវភាព។ ទីមួយគឺយើងផ្ដល់នូវជំនាញ។ ទោះមានអង្គការគាំទ្រ ក៏យើងគៀងគរការគាំទ្រ ទៅដល់សហគមន៍ ដូចជាការបណ្ដុះបណ្ដាលជំនាញ បង្កើតជាអេកូទេសចរណ៍នេះ គេហៅថាគោលដៅលំហែបៃតងរបស់យើង»។
លោកបន្តថាក្រៅពីនោះ មានការ ផ្តល់នូវពូជសត្វចិញ្ចឹម ការដាំបន្លែ និងរៀបចំបង្កើតជាគណៈកម្មការ ដើម្បីពួកគាត់ធ្វើជាម្ចាស់ និង គ្រប់គ្រងតំបន់សហគមន៍របស់គាត់ដោយខ្លួនឯង។
លោកបន្ថែមថា ការងារនេះកំពុងតែ ជួយឱ្យសហគមន៍ គេចផុតពីការចូលព្រៃ ដើម្បីចិញ្ចឹមជីវិត ងាកមក ការបម្រើទេសចរណ៍វិញ តាមរយៈព្រៃសហគមន៍របស់គាត់ ដែលបានថែទាំសម្រាប់កូនចៅរបស់គាត់។
សហគមន៍តំបន់ការពារធម្មជាតិ សរុបមានចំនួន ១៩៣សហគមន៍ ត្រូវបានបង្កើតឡើង ដែលមានសមាជិកសរុបចំនួន ៧៣ ១៤៩គ្រួសារ និង គ្របដណ្តប់លើផ្ទៃដីព្រៃជាង ៣៣ម៉ឺនហិកតា នៅក្នុងខេត្តចំនួន១៥ គិតត្រឹម ឆ្នាំ២០២៤នេះ។
អង្គការ WCSបានឱ្យដឹងថា សត្វទោចថ្ពាល់លឿងប្រមាណ ១ ១២៩ក្បាលត្រូវបានធ្វើកំណត់ត្រានៅក្នុងដែនជ ម្រក សត្វព្រៃកែវសីមា ដែលជាចំនួនមួយថេរ និងបង្ហាញសញ្ញាវិជ្ជមានមួយ ក្នុងរយៈពេល ១២ឆ្នាំចុងក្រោយនេះ។
ជំរំសត្វទោច ចាហ៊ូ ស្ថិតក្នុងភូមិអណ្តូងក្រឡឹង ឃុំសែនមនោរម្យ ស្រុកអូរាំង ត្រូវបានពង្រីកទីជម្រកទំហំ ៤៤៥,៥ហិកតា បន្ថែមទៀត សម្រាប់សត្វទោចថ្ពាល់លឿង នៅឆមាសទីមួយ នៃឆ្នាំ២០២៤នេះ។
ការពង្រីកនេះបានធ្វើឱ្យតំបន់រស់នៅរបស់សត្វទោចសរុបបានកើនឡើងរហូតដល់ ៦៩១,៣ហិកតា នាពេលបច្ចុប្បន្ននេះ។ គម្រោងនេះមានគោលបំណងបន្តពង្រីកទីជម្រករបស់សត្វទោចឱ្យឈានដល់គោលដៅចំនួន ១ ០០០ហិកតានៅចុងឆ្នាំនេះ។ នេះបើយោងតាមគម្រោងUSAID មរតកបៃតង៕
