ការប្រមូលផលនេសាទ ដែលកំពុងតែត្រូវបានធ្វើឡើង នៅតាមដាយត្រី ចាប់ពីថ្ងៃទី៨ ដល់ថ្ងៃទី១៣ ខែធ្នូនេះ។ រូបថត អាជ្ញាធរទន្លេសាប។
ភ្នំពេញៈ ប្រជានេសាទបានអះអាងថាប្រាប់ប្រមុខរដ្ឋាភិបាលថា ទិន្នផលត្រីមានការកើនឡើងច្រើនជាងឆ្នាំកន្លងមក ខណៈពេលដែល មន្រ្តីជំនាញមិនទាន់អាចសន្និដ្ឋានជាផ្លូវការ បើទោះបីជាសន្ទុះនៃការប្រមូលផលត្រីកំពុងតែមានច្រើនលើសលុប។
លោកនាយករដ្ឋមន្រ្តីហ៊ុន ម៉ាណែត បានចុះទៅពិនិត្យការប្រមូលផលនេសាទទឹកសាបក្នុងខេត្តកណ្តាល នាថ្ងៃទី ៨ ខែធ្នូ ដែលជាថ្ងៃទី១ ដែលត្រីចាប់ផ្តើមត្រូវ។
ការចុះពិនិត្យនេះ ត្រូវបានអមដំណើរដោយ រដ្ឋមន្រ្តីក្រសួងកសិកម្មរុក្ខាប្រមាញ់ និងនេសាទ លោកឌិត ទីណា និង រដ្ឋមន្រ្តីក្រសួងធនធានទឹក និងឧតុនិយម លោកថោ ជេដ្ឋា។
យោងតាមបណ្តាញសង្គមរបស់លោកនាយករដ្ឋមន្រ្តីបានឱ្យដឹងថា នាថ្ងៃសៅរ៍ ទី៨ ខែធ្នូ លោកបានឆ្លៀតពេលចុះជួបសំណេះសំណាល និងមើលការប្រមូលផលនេសាទ របស់ប្រជានេសាទនៅក្នុងភូមិសាស្ត្រស្រុកពញាឮ ខេត្តកណ្តាល។
ប្រមុខរដ្ឋាភិបាលបញ្ជាក់ថា៖«តាមបងប្អូននៅទីនោះប្រាប់ថា ឆ្នាំនេះការប្រមូលផលត្រីមានការកើនឡើងច្រើន បើប្រៀបធៀបជាមួយនៃផលនេសាទនៅឆ្នាំកន្លងទៅ»។
រដ្ឋបាលជលផល នៃក្រសួងកសិកម្ម នាថ្ងៃសុក្រ ទី៦ ខែធ្នូបានជូនដំណឹងដល់ សាធារណជនថា ក្នុងរដូវនេសាទឆ្នាំ២០២៤-២០២៥ តាមការសង្កេត ត្រីចាប់ផ្តើមបន្លាស់ទី ចេញពីបឹងទន្លេសាប បឹង ស្ទឹង និងព្រែកនានា ចូលទន្លេសាប ទន្លេមេគង្គ និងទន្លេបាសាក់។
រដ្ឋបាលជលផលលើកឡើងថា៖«ការបន្លាស់ទីនេះ អំណោយផល ដល់ការធ្វើនេសាទបានត្រីច្រើន ជាពិសេសគន្លងដាយត្រីតាមដងទន្លេសាប ក្នុងខេត្តកណ្តាលនិង រាជធានីភ្នំពេញ ចាប់ពីថ្ងៃទី៨ ដល់ថ្ងៃទី១៣ ខែធ្នូ ឆ្នាំ២០២៤ ក្នុងករណីមេឃស្រឡះល្អ គ្មានភ្លៀងកក់ខែ ឬមិនទទួលរងឥទ្ធិពលព្យុះភ្លៀង»។
រដ្ឋបាលជលផល បានអំពាវនាវថា ប្រជាពលរដ្ឋ ដែលមានបំណងធ្វើប្រហុក ផ្អក ត្រីឆ្អើរ ឬទឹកត្រី សូមរួសរាន់ រក ទិញត្រី តាមពេលវេលា និងទីកន្លែង ដែលបានជម្រាបជូន។
អ្នកនេសាទ ដែលកំពុងតែប្រមូលផលត្រីបានលើកឡើងថា ទិន្នផលត្រីគឺគុណនឹង២។ ប៉ុន្តែនៅមិនទាន់មានការសន្និដ្ឋានជាផ្លូវការនោះទេ។ នេះបើយោងតាម ប្រតិភូរាជរដ្ឋាភិបាល ទទួលបន្ទុកប្រធានរដ្ឋបាលជលផល លោក ពុំ សុថានាថ្ងៃចន្ទ ទី៩ ខែធ្នូនេះ។
លោកមានប្រសាសន៍ថា៖«តែពិបាកសន្និដ្ឋានណាស់ ដោយមិនទាន់មានលទ្ធផលចុងក្រោយ។ តែបើតាមសន្ទុះនេះយើងថាលើសគុណនឹង២ផង។ ត្រីដាយនេះ វាត្រូវហួស លើសលុបពេក ដឹងតែកើនឡើងច្រើនហើយ រហូតដល់ដាយត្រីនៅលើៗ បង្ហូរចោល។ ភាគរយយើងមិនទាន់កំណត់ទេ តែលើសឆ្នាំទៅច្រើន។ លទ្ធផលដាច់ឆ្នាំសរុបប្រចាំឆ្នាំហើយ»។
លោកបន្តថា លទ្ធផលនៃទិន្នផលកើនឡើងនេះ គឺដោយសារតែការបង្រ្កាបបទល្មើសមានប្រសិទ្ធភាពល្អ ដែលមានការសហការគ្នាបានយ៉ាងល្អប្រសើរ ពីថ្នាក់ជាតិ ថ្នាក់ក្រោមជាតិ ក៏ដូចជាប្រជាពលរដ្ឋ។
លើសពីនោះ មន្រ្តីជំនាញ ក៏បានសហការជាមួយអគ្គស្នងការដ្ឋាននគរបាលជាតិ ធ្វើការបង្រ្កាបការផ្សព្វផ្សាយលក់ឧបករណ៍ឆក់ត្រីខុសច្បាប់នៅតាមបណ្តាញសង្គម ខណៈពេលដែលអ្នកប្រើប្រាស់ខ្លះបានស្ម័គ្រចិត្តប្រគល់ឧបករណ៍ឆក់ជូនមន្រ្តីជំនាញផងដែរ។
លោកថ្លែងដូច្នេះថា៖«ជាមួយត្រីកើនឡើងហ្នឹង គឺដោយសារតែ មានការយកចិត្តទុកដាក់ពីថ្នាក់ដឹកនាំ មហាជនទូទៅមានការចូលរួម ហើយមន្រ្តីជំនាញខិតខំទាំងអស់គ្នា....យើងសហការជាមួយអគ្គស្នងការនគរបាលជាតិ ព្រោះគាត់មានបច្ចេកវិទ្យាខាងស្រាវជ្រាវ ទៅដល់ទីតាំង ចាត់ការអ្នកផលិតឧបករណ៍ឆក់តាមនិតីវិធី»។
អាជ្ញាធរទន្លេសាបបានឱ្យដឹងថា ទិដ្ឋភាពផលនេសាទដាយត្រី និងសកម្មភាពចាប់ត្រីនៅថ្ងៃទី៧ ខែធ្នូ នៅជួរលេខ ១៤ លើកមួយដង បានបរិមាណប្រមាណ ១តោន ក្នុងរយៈពេល ៣០ នាទី និងជួរ ទី ១៥ លើកមួយដង បានបរិមាណប្រមាណ ១ ទៅ ២តោន ក្នុងរយៈពេល ៤៥ នាទី ។
មន្រ្តីស្រាវជ្រាវ នៃអាជ្ញាធរទន្លេសាប ដែលកំពុងឈរជើងប្រចាំការនៅតាមមាត់ឡូត៍ដាយបាន ឱ្យដឹងថា ភាគច្រើនត្រី ដែលចាប់បានជាប្រភេទត្រីខ្នងវែង អាចម៍កុក រៀលអង្គាម រៀលតុប ច្រកែង និងស្លឹកឫស្សីជាដើម។
អាជ្ញាធរទន្លេសាបបានលើកឡើងថា៖«ផលនេសាទពីដាយត្រីកើនឡើង ឬថយចុះ នៅតាមដងទន្លេសាប គឺមានទំនាក់ទំនងយ៉ាងជិតស្និត ជាមួយកម្រិតកម្ពស់ទឹក និងអាកាសធាតុ រួមជាមួយប្រសិទ្ធភាព នៃការគោរពអនុវត្តច្បាប់ ស្តីពីជលផល និងការបង្រ្កាបបទល្មើសនេសាទខុសច្បាប់ប្រកបដោយភាពម៉ឺងម៉ាត់ពីមន្រ្តីជំនាញពាក់ព័ន្ធ ក្នុងការពង្រឹងប្រសិទ្ធភាពការចូលរួមអនុវត្តគោលនយោបាយយុទ្ធសាស្រ្តគ្រប់គ្រងធនធានជលផល»។
ទិន្នផលនេសាទដាយត្រី នៅរាជធានីភ្នំពេញ និងខេត្តកណ្តាលឆ្នាំ ២០២២-២០២៣ សម្រេចបានបរិមាណ ១ ៤៨១ តោន ដែលបរិមាណនេះកើនឡើងប្រមាណ ៤០ ភាគរយ បើប្រៀបធៀបទៅនឹងផលនេសាទដាយត្រីនារដូវនេសាទឆ្នាំ ២០២១-២០២២ ដែលទទួលបានចំនួន ៨៩០ តោន។ ការកើនឡើងនេះ ត្រូវបានក្រសួងកសិកម្មលើកឡើងថា ដោយសារតែ លទ្ធផល នៃការទប់ស្កាត់បទល្មើសក្នុងបឹងទន្លេសាបប្រកបដោយប្រសិទ្ធភាពផងដែរ៕
