ការបណ្ដុះបណ្ដាលដល់ថ្នាក់ដឹកនាំនិងមន្ត្រីជំនាញ ថ្នាក់ក្រោមជាតិ កាលពីថ្ងៃទី៣០ មករា ។ រូបថត ក្រសួងអប់រំ
ភ្នំពេញៈ ក្រសួងអប់រំយុវជន និងកីឡា បានបន្តរៀបចំវគ្គបណ្ដុះបណ្ដាលស្ដីពីគោលការណ៍បែបបទនិងនីតិវិធីនៃការអនុវត្តមុខងារអប់រំដល់ថ្នាក់ដឹកនាំនិងមន្ត្រីជំនាញនៃរដ្ឋបាលក្រុង ស្រុកខណ្ឌ ក្នុងខេត្ដចំនួន ៤ ផ្សេងទៀត ដើម្បីជំរុញគុណភាពអប់រំឱ្យកាន់តែប្រសើរ បន្ទាប់ពីបានអនុវត្ដចប់នៅក្នុងខេត្ដ ៤ កាលពីសប្ដាហ៍មុន។
វគ្គបណ្ដុះបណ្តាលនេះមានរយៈពេល ៣ ថ្ងៃ ចាប់ពីថ្ងៃទី ៣០ ខែមករា ដល់ថ្ងៃទី ១ ខែកុម្ភៈ ឆ្នាំ ២០២៤ ដោយមានការចូលរួមពីតំណាងលេខាធិការដ្ឋាននៃគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិក្រសួងសេដ្ឋកិច្ច និងហិរញ្ញវត្ថុរដ្ឋបាលខេត្តមន្ត្រីជំនាញនិងអ្នកពាក់ព័ន្ធមកពីខេត្តចំនួន ៤ រួមមានខេត្តបាត់ដំបង ពោធិ៍សាត់ បន្ទាយមានជ័យ និងខេត្តប៉ៃលិន សរុប ១៧០ នាក់។ នេះបើយោងតាមហ្វេសប៊ុករបស់ក្រសួងអប់រំ។
បើតាមក្រសួងអប់រំ នៅក្នុងពិធីបើកវគ្គនោះ លោក សេរី ជំនះ រដ្ឋលេខាធិការក្រសួងអប់រំយុវជន និងកីឡា បានលើកឡើងថា វគ្គបណ្ដុះបណ្ដាលនេះគឺជាជំហានថ្មីមួយទៀតនៅក្នុងការអនុវត្តកម្មវិធីកំណែទម្រង់វិមជ្ឈការវិសហមជ្ឈការកំណែទម្រង់វិស័យអប់រំព្រមទាំងបានបង្ហាញអំពីឆន្ទៈ និងការប្ដេជ្ញាចិត្តដ៏មុតមាំរបស់រាជរដ្ឋាភិបាលកម្ពុជាក្នុងការផ្ដល់អាទិភាព និងការគាំទ្រដល់វិស័យអប់រំផងដែរ។
លោកបញ្ជាក់ថា ការផ្ទេរមុខងារអប់រំទៅថ្នាក់ក្រោមជាតិនេះ គឺដើម្បីលើកកម្ពស់ប្រសិទ្ធភាពនៃការគ្រប់គ្រងនិងបង្កើនគុណភាពនៃសេវាអប់រំជូនដល់ប្រជាជនគ្រប់រូប។
ជុំវិញរឿងនេះ លោក គង់ សំនៀង ប្រធានសហព័ន្ធសេវាអប់រំនៅកម្ពុជា បានថ្លែងថាការរៀបចំនីតិវិធីតម្រង់ទិសនានា ដើម្បីអភិវឌ្ឍមន្ត្រីជំនាញពាក់ព័ន្ធក្នុងវិស័យអប់រំនៅកម្ពុជាជារឿងល្អមួយផ្នែក។
លោកថា វិស័យអប់រំទាំងរដ្ឋនិងឯកជននៅតែត្រូវការគ្រូ វិធីសាស្ត្របង្រៀននិងការពង្រឹងជំនាញបន្ថែម ហើយលោកក៏រំពឹងដែរថា តាមរយៈការរៀបចំវគ្គបណ្តុះបណ្តាលនេះ នឹងធ្វើឱ្យគ្រូនៅកម្ពុជាកាន់តែមានគុណភាពប្រសើរឡើង។
លោកបានបញ្ជាក់ថា៖ «ជាការពិតដើម្បីឱ្យគុណភាពបង្រៀនបានល្អប្រសើរ គឺទាមទារឱ្យមានការកែលម្អនៅវិធីសាស្ត្របណ្តុះបណ្តាលល្អៗ និងថ្មីៗដើម្បីដើរទាន់សម័យកាលបច្ចុប្បន្ន ហើយខ្ញុំស្នើឱ្យយកចិត្តទុកដាក់លើកម្រិតជីវភាពគ្រូបង្រៀនបន្ថែមទៀត ដើម្បីជាកាតាលីករជំរុញវិស័យអប់រំរបស់យើងកាន់តែប្រសើរ»។
យ៉ាងណាក្ដី លោកបានអំពាវនាវឱ្យក្រសួងអប់រំរាប់បញ្ចូលគ្រូមកពីវិស័យឯកជននិងសាលារៀនឯកជន ដើម្បីឱ្យមានលទ្ធភាពទទួលបានការបណ្តុះបណ្តាលជំនាញឬវិធីសាស្ត្រថ្មីៗដូចគ្រូមកពីសាលារដ្ឋដែរ។
គួររំឭកដែរថា វគ្គបណ្តុះបណ្តាលនេះក៏ធ្លាប់បានធ្វើអស់រយៈពេល ៣ ថ្ងៃផងដែរ នៅសាលមហោស្រពខេត្តក្រចេះចាប់ពីថ្ងៃទី ២៤ ដល់ថ្ងៃទី ២៦ ខែមករា ឆ្នាំ ២០២៤ ដោយមានការចូលរួមពីមន្ត្រីពាក់ព័ន្ធមកពីខេត្តក្រចេះ ស្ទឹងត្រែង រតនគិរី និងខេត្តមណ្ឌលគិរីជាង ១៥០ នាក់ ។
សូមជម្រាបថា ការរៀបចំវគ្គបណ្តុះបណ្តាលនេះផ្តោតលើការប្រគល់មុខងារគ្រប់គ្រងចំនួន ៣ រួមមានការអប់រំកុមារតូចការអប់រំបឋមសិក្សា និងការអប់រំក្រៅប្រព័ន្ធ ព្រមទាំងការធ្វើប្រតិភូកម្មមុខងារគាំទ្រផ្នែករដ្ឋបាលចំនួន ៣ ដល់គ្រឹះស្ថានមធ្យមសិក្សាចំណេះទូទៅការងារអភិវឌ្ឍន៍យុវជន និងការងារអប់រំកាយនិងកីឡាទៅឱ្យរដ្ឋបាលក្រុងស្រុកខណ្ឌ ដែលត្រូវធ្វើនៅទូទាំងប្រទេស៕
