ការបង្ហាញរូបភាពបទល្មើសតាមបច្ចេកវិទ្យាក្នុងកិច្ចប្រជុំកាលពីថ្ងៃទី ៣១ មករា។ រូបថត Sar Thet FB
ភ្នំពេញៈ លោក ស ថេត អគ្គស្នងការនគរបាលជាតិបានឱ្យដឹងថា ក្រុមការងារ Hotline Scam ដែលមានមន្ត្រីជំនាញប្រចាំការ ២៤ ម៉ោងលើ ២៤ ម៉ោង កំពុងរង់ចាំទទួលព័ត៌មានពីពលរដ្ឋដែលចាញ់បោកឧក្រិដ្ឋជនតាមប្រព័ន្ធបច្ចេកវិទ្យា ដើម្បីជួយអន្តរាគមន៍ឱ្យបានទាន់ពេលពីករណីឆបោកទាំងនេះ។
លោកថ្លែងបែបនេះនៅក្នុងកិច្ចប្រជុំជាមួយក្រុមការងារ «ង» ផ្នែកសេវាធនាគារ និងហិរញ្ញវត្ថុ ដើម្បីពង្រឹងសុវត្ថិភាពទប់ស្កាត់បទល្មើសហិរញ្ញវត្ថុតាមប្រព័ន្ធបច្ចេកវិទ្យា និងបទល្មើសសម្អាតប្រាក់កាលពីថ្ងៃទី ៣១ ខែមករា ឆ្នាំ ២០២៤។ នេះបើយោងតាមហ្វេសប៊ុករបស់អគ្គស្នងការដ្ឋាននគរបាលជាតិ។
ក្នុងកិច្ចប្រជុំនោះ លោក ស ថេត បានលើកឡើងថា ក្នុងយុគសម័យទំនើបនេះ ពលរដ្ឋជាច្រើនបានធ្លាក់ក្នុងអន្ទាក់របស់ក្រុមឧក្រិដ្ឋជនតាមប្រព័ន្ធបច្ចេកវិទ្យា ហើយបទល្មើសឆបោកនេះក៏បានកើតឡើងស្ទើររាល់ថ្ងៃនៅតាមមូលដ្ឋាន។
លោកបានបន្តថា ដូច្នេះហើយអគ្គស្នងការដ្ឋាននគរបាលជាតិបានបង្កើតក្រុមការងារ Hotline Scam នេះបន្ថែមលើយន្ដការដែលមានស្រាប់ដើម្បីជួយអន្តរាគមន៍និងជួយសម្រួលដល់ពលរដ្ឋក្នុងការដាក់ពាក្យបណ្ដឹងនិងផ្ដល់ព័ត៌មានតាមប្រព័ន្ធអនឡាញ។
ក្រៅពីនេះ លោកក៏បានស្នើសុំការគាំទ្របន្ថែមពីសំណាក់វិស័យឯកជន ពិសេសធនាគារ គ្រឹះស្ថានមីក្រូហិរញ្ញវត្ថុទាំងអស់ ដោយត្រូវសហការឱ្យបានល្អជាមួយសមត្ថកិច្ច ពិសេសក្រុមការងារ Hotline Scam ដើម្បីជួយអន្ដរាគមន៍បានទាន់ពេលនិងដើម្បីធានាដល់ប្រសិទ្ធភាពនៃការបង្ក្រាប។
លោកបានបញ្ជាក់ថា៖ «នៅក្នុងយុគសម័យថ្មីនេះ ការរងនូវការឆបោកតាមប្រព័ន្ធបច្ចេកវិទ្យា ទោះបីជាមិនមែនបទល្មើសប្រពៃណី ប៉ុន្ដែឈានទៅដល់ការបោកប្រជាពលរដ្ឋនៅតាមមូលដ្ឋាន។ដូច្នេះវិស័យធនាគារ ត្រូវសហការគ្នាជាមួយក្រុមការងារអគ្គស្នងការដ្ឋាននគរបាលជាតិ ដើម្បីបង្ការទប់ស្កាត់រាល់បទល្មើសទាំងអស់នេះ»។
ជាមួយគ្នានេះ លោក ស ថេត ក៏បានអំពាវនាវដល់ពលរដ្ឋក្នុងករណីចាញ់បោកឧក្រិដ្ឋជនតាមប្រព័ន្ធបច្ចេកវិទ្យា សូមផ្ដល់ព័ត៌មានឱ្យបានលឿនមកកាន់ក្រុមការងារ Hotline Scam ដែលមានមន្ត្រីជំនាញប្រចាំការ ២៤ ម៉ោងលើ ២៤ ម៉ោង ឬចូលទៅកាន់តំណភ្ជាប់ hotline.police.gov.kh ក៏ដូចជា អាចឆាតទៅផេកហ្វេសប៊ុករបស់អគ្គស្នងការដ្ឋាននគរបាលជាតិ។
ជុំវិញរឿងនេះ លោក អំ សំអាត នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូបានប្រាប់នៅថ្ងៃទី ១ ខែកុម្ភៈថា បច្ចុប្បន្នទម្រង់នៃការឆបោកតាមប្រព័ន្ធបច្ចេកវិទ្យាភាគច្រើនជនល្មើសបន្លំជារូបភាពផ្ដល់ជារង្វាន់ និងទ្រព្យសម្បត្តិដើម្បីឱ្យប្រជាពលរដ្ឋដែលមានចំណេះដឹងតិចតួចផ្ញើលុយទៅឱ្យជនល្មើសដើម្បីទទួលបានរង្វាន់ និងទ្រព្យសម្បត្តិទាំងនោះ។
លោកបន្តថា បន្ថែមពីនេះការឆបោកក៏មានទម្រង់ជាលក្ខណៈផ្ដល់កម្ចីប្រាក់ ដែលមានអត្រាការប្រាក់ទាប មានភាពងាយស្រួលក្នុងការខ្ចី ប៉ុន្តែបន្ទាប់មកអ្នកដែលបានខ្ចីប្រាក់ទាំងនោះ នឹងក្លាយទៅជាជនរងគ្រោះ ដោយសារត្រូវបានជនល្មើសបង្ខំឱ្យថតរូបអាក្រាតកាយដើម្បីផ្ញើជាការដោះដូរជាមួយការបង់កម្ចីជាដើម។
លោកបានឱ្យដឹងទៀតថា ចំពោះការឆបោកនេះដែរ គឺច្រើនតែកើតឡើងនៅតាមមូលដ្ឋានរបស់ប្រជាពលរដ្ឋ ហេតុនេះនៅពេលមានក្រុមការងារ Hotline សម្រាប់ជួយអន្តរាគមន៍បន្ថែមជួយដល់ប្រជាពលរដ្ឋរងគ្រោះគឺជារឿងមួយល្អ ខណៈដែលកន្លងមកប្រជាពលរដ្ឋដែលរងគ្រោះមានការលំបាកក្នុងការស្វែងរកសេវាអន្តរាគមន៍។
លោកបានបញ្ជាក់ថា៖ «ទន្ទឹមនឹងមានក្រុមការងារនេះកំពុងដំណើរការ ប៉ុន្តែយើងក៏មានក្ដីបារម្ភខ្លះដែរលើសុវត្ថិភាព និងសន្តិសុខរបស់ប្រជាពលរដ្ឋនៅពេលបានដាក់ពាក្យតាមរយៈអនឡាញ ហើយអាជ្ញាធរដែលទទួលបណ្ដឹងតាមអនឡាញនេះ ក៏ត្រូវមានចំណាត់ការបង្ក្រាបលើការឆបោកតាមអនឡាញ ជាពិសេសគឺការពារសុវត្ថិភាពប្រជាពលរដ្ឋដែលរងគ្រោះ»។
យ៉ាងណាក្ដី លោក អំ សំអាត ទទួលស្គាល់ថា ការចាប់ជនល្មើសដែលប្រើប្រាស់ប្រព័ន្ធបច្ចេកវិទ្យាទៅប្រព្រឹត្តបទល្មើសឆបោកផ្សេងៗគឺមានភាពលំបាកខ្លះសម្រាប់អាជ្ញាធរ ប៉ុន្តែលោកជឿថា តាមរយៈសមត្ថភាពរបស់អាជ្ញាធរបច្ចុប្បន្ន ប្រាកដជាស្រាវជ្រាវរកឃើញក្រុមជនល្មើសទាំងនោះ។
លោកថា៖ «ដូច្នេះបញ្ហាទាំងអស់នេះគឺវាអាស្រ័យទៅលើឆន្ទៈនិងការតាំងចិត្តស្វែងរករបស់អាជ្ញាធរ ដើម្បីកុំឱ្យមានពលរដ្ឋយើងរងគ្រោះបន្តទៀតលើការឆបោកតាមប្រព័ន្ធអនឡាញនេះ»៕
