ពលរដ្ឋចូលរួមពិធីចាប់ត្រីក្នុងត្រពាំងអភិរក្ស នៅខេត្ដសៀមរាប នាថ្ងៃទី១១ កុម្ភៈ។ រូបថត អាជ្ញាធរអប្សរា
សៀមរាបៈ ប្រជាពលរដ្ឋប្រមាណជាង ២ ០០០ នាក់ បានចូលរួមចាប់ត្រីរួមគ្នាក្នុងត្រពាំងអភិរក្សបុរាណ នៅព្រឹកថ្ងៃទី១១ ខែកុម្ភៈ ដើម្បីយកត្រីមកធ្វើម្ហូបក្នុងពិធីបុណ្យឡើងមាឃ ឬឡើងអ្នកតា ទៅតាមប្រពៃណី និងទម្លាប់របស់អ្នកភូមិរស់នៅតំបន់រមណីយដ្ឋានអង្គរ រីឯនៅខេត្តត្បូងឃ្មុំនឹងធ្វើពិធីចាប់ត្រីដ៏ធំដូចគ្នានេះ នៅថ្ងៃទី១៧ កុម្ភៈ ខាងមុខ។
លោក សូរ ប្លាតុង អភិបាលស្រុកប្រាសាទបាគង បានប្រាប់នៅថ្ងៃទី១១ ខែកុម្ភៈថា ប្រជាពលរដ្ឋមកពីគ្រប់ទិសទី និងគ្រប់ស្រទាប់វណ្ណៈប្រមាណជាង ២ ០០០នាក់ មិនមែនតែប្រជាពលរដ្ឋនៅក្នុងភូមិបង្កោង ឃុំអម្ពិលនេះទេ តែមានមកពីក្រុងសៀមរាបបានចូលរួមពិធីចាប់ត្រីយ៉ាងសប្បាយរីករាយ ដោយមិនបានប្រកាន់វណ្ណៈឡើយ ខណៈនៅឆ្នាំនេះ ប្រជាពលរដ្ឋចូលរួមច្រើនជាងឆ្នាំមុន។
លោកបានពន្យល់ថា ពិធីចាប់ត្រីនេះត្រូវបានធ្វើឡើងរាល់ឆ្នាំទៅតាមទម្លាប់នៅក្នុងត្រពាំងបុរាណដែលអ្នកភូមិបានអភិរក្សត្រីរួមគ្នាទុកមិនឱ្យមានការនេសាទផ្តេសផ្តាសកន្លងមក ដោយទុកសម្រាប់ធ្វើពិធីចាប់ត្រីរួមគ្នាក្នុងឱកាសធ្វើពិធីបុណ្យឡើងមាឃ ឬឡើងអ្នកតា តែប៉ុណ្ណោះ។ ប៉ុន្ដែក្រោយពីអ្នកភូមិបង្កោងធ្វើពិធីចាប់ត្រីរួមគ្នារួចហើយ ទើបអ្នកភូមិផ្សេងមានសិទ្ធិមករកត្រីនៅក្នុងត្រពាំងបឹងនេះ នៅថ្ងៃបន្ទាប់ទៀតបាន។
លោកបានបញ្ជាក់ថា៖«ពិធីចាប់ត្រីរួមគ្នានេះត្រូវបានអ្នកភូមិធ្វើឡើងជារៀងរាល់ឆ្នាំ បន្ទាប់ពីបញ្ចប់ការងារច្រូតកាត់ និងដាក់ស្រូវក្នុងជង្រុករួចរាល់។ ការចាប់ត្រីនេះ ប្រជាពលរដ្ឋទាំងអស់ក្នុងភូមិបង្កោងអាចរកត្រីទុកសម្រាប់ខ្លួនឯងផ្ទាល់ និងមួយផ្នែកទៀតនៃបឹងដែលមានដាក់សម្រាស់ការពារមិនឱ្យចាប់ពីដំបូងនោះត្រូវទុកចាប់រួមសម្រាប់ធ្វើជាម្ហូបក្នុងពិធីបុណ្យរួម»។
អាជ្ញាធរជាតិអប្សរានៅថ្ងៃទី១១ ខែកុម្ភៈ ក៏បានលើកឡើងតាមរយៈហ្វេសប៊ុកថា រមណីយដ្ឋានអង្គរ ប្រមូលផ្តុំទៅដោយបេតិកភណ្ឌរស់ដែលសម្បូរទាំងមរតកអរូបី និងរូបីជាច្រើន ហើយត្រូវបានអ្នកស្រុកអង្គរបន្តប្រតិបត្តិយ៉ាងខ្ជាប់ខ្ជួនរហូតមកទល់បច្ចុប្បន្ន។
អាជ្ញាធរជាតិអប្សរាបានបន្តថា៖«ជាក់ស្តែងជារៀងរាល់ឆ្នាំ ក្រោយពេលប្រមូលផលស្រូវរួចរាល់ ឱ្យតែមកដល់ខែមាឃ ប្រជាពលរដ្ឋរស់នៅក្នុងភូមិបង្កោង ឃុំអម្ពិល ស្រុកប្រាសាទបាគង ខេត្តសៀមរាប តែងតែនាំគ្នាប្រារព្ធពិធីចាប់ត្រីរួមមិនដែលខកខានជាលក្ខណៈសហគមន៍ គឺសម្រាប់តែសមាជិកក្នុងភូមិបង្កោងតែប៉ុណ្ណោះដើម្បីត្រៀមរៀបចំពិធីឡើងមាឃឬឡើងអ្នកតានៅថ្ងៃបន្ទាប់តាមទំនៀមទម្លាប់ពីបុរាណមក»។
លោក ពេជ្រ ឃិន មេភូមិបង្កោងបានលើកឡើងថា ការចាប់ត្រីរួមគ្នាធ្វើឡើងនៅត្រពាំងបុរាណធំមួយមានទឹកខួបប្រាំងខួបវស្សាដែលអ្នកភូមិបានអភិរក្សទុកការពារមិនអនុញ្ញាតឱ្យនរណាម្នាក់ចូលមកនេសាទផ្តេសផ្តាសខុសពីខែមាឃនេះឡើយ លុះត្រាតែមានការសម្រេចគណៈកម្មការរៀបចំបុណ្យជាមុន។
លោកបានបន្តថា នៅពេលគណៈកម្មការរៀបចំបុណ្យបានកំណត់ថ្ងៃនេសាទរួម រួចអ្នកភូមិអាចទៅរកចាប់បាន ប៉ុន្តែត្រូវតែប្រើឧបករណ៍នេសាទបុរាណ រួមមាន សំណាញ់ អង្រុត ឈ្នាង ជាដើម។
លោក ពេជ្រ ឃិន បានបញ្ជាក់ថា ៖ «ត្រីដែលចាប់បាននោះ មួយផ្នែកទុករួមសម្រាប់ធ្វើម្ហូបជាលក្ខណៈគ្រួសាររៀងៗខ្លួន មួយផ្នែកទៀតទុកសម្រាប់ធ្វើទឹកនំបញ្ចុក ម្ហូបអាហារ និងចង្ហាន់ជាដើម សម្រាប់ប្រគេនព្រះសង្ឃនៅថ្ងៃធ្វើកិច្ចពិធីឡើងមាឃឬបុណ្យឡើងអ្នកតានៅសាលាឆាន់ក្នុងភូមិតាមទំនៀមបុរាណមិនដែលខកខាន»។
សូមរំឭកដែរថា រដ្ឋបាលខេត្តត្បូងឃ្មុំក៏ត្រៀមរៀបចំពិធីចាប់ត្រីក្នុងបឹងត្រពាំងក្រម ក្នុងស្រុកមេមត់ផងដែរ ដែលនឹងធ្វើឡើងនៅថ្ងៃទី១៧ ខែកុម្ភៈ ខាងមុខ៕
