លោក ហេង រតនា និង លោក Jun KATO ក្នុងពិធីចុះហត្ថលេខាផ្ដល់ជំនួយ កាលពីថ្ងៃទី ១៤ កុម្ភៈ។ រូបថត ស៊ីម៉ាក់
ភ្នំពេញៈ រាជរដ្ឋាភិបាលជប៉ុនបានផ្ដល់ជំនួយហិរញ្ញប្បទានឥតសំណងដល់កម្ពុជាប្រមាណ ១៤ លានដុល្លារ តាមរយៈមជ្ឈមណ្ឌលសកម្មភាពកំចាត់មីនកម្ពុជាស៊ីម៉ាក់ (CMAC) ដើម្បីអនុវត្តគម្រោងសាងសាង់ចំនួន ២ នៅខេត្តកំពង់ឆ្នាំង និងខេត្តសៀមរាប ក្នុងបំណងជួយលើកកម្ពស់សមត្ថភាពអង្គភាពCMACនិងបង្កើនការអប់រំយល់ដឹងបន្ថែមពីបញ្ហាមីនដល់សាធារណជន។
ពិធីចុះហត្ថលេខាផ្តល់ជំនួយឥតសំណងដែលមានថវិកាសរុបចំនួន ២ ០៧៩ ៨០០ ០០០ យ៉េន (ប្រមាណជិត ១៤ លានដុល្លារអាមេរិក) ធ្វើឡើងក្រោមវត្តមានរវាង លោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់ និងលោក Jun KATO អគ្គនាយកក្រុមហ៊ុន SATO KOGYO CO., LTD កាលពីថ្ងៃទី ១៤ ខែកុម្ភៈ ឆ្នាំ ២០២៤។
ជំនួយនេះដើម្បីអនុវត្តគម្រោងចំនួន ២ គឺគម្រោងសាងសង់អគារហ្វឹកហ្វឺននៅវិទ្យាស្ថានបច្ចេកទេសសកម្មភាពកំចាត់មីនក្នុងខេត្តកំពង់ឆ្នាំង និងអគារផ្សព្វផ្សាយ អប់រំយល់ដឹងពីសង្គ្រាម (សារមន្ទីរតេជោសន្តិភាព) នៅខេត្តសៀមរាប។ នេះបើយោងតាមហ្វេសប៊ុករបស់អង្គភាពស៊ីម៉ាក់។
សូមជម្រាបថា អគារដែលត្រូវសាងសង់នៅខេត្តកំពង់ឆ្នាំង រួមមាន អគារសាលប្រជុំ (ចំណុះ ៤០០ នាក់) ១ ខ្នង អគារសិក្សា ១ ខ្នង ២ ជាន់មាន ១០ បន្ទប់ អគារអន្ដេវាសិកដ្ឋាន ២ ខ្នង (សម្រាប់សិក្ខាកាមចំនួន ១២០ នាក់) អគារអាហារដ្ឋាន ១ ខ្នង ព្រមទាំងសម្ភារបំពាក់ដូចជា កុំព្យូទ័រ ទូរទស្សន៍ សម្ភារសិក្សាតុកៅអីជាដើម។
ចំពោះអគារសារមន្ទីរតេជោសន្ដិភាពស្ថិតនៅខេត្តសៀមរាប ជាអគារសំណង់មានរាងការ៉េ ខាងក្រោមមានទំហំ ១០៨ ម៉ែត្រគុណ ១០៨ ម៉ែត្រ និងខាងលើរាងមូលមានអង្កត់ផ្ចិត ៥២ ម៉ែត្រ មាន ២ ជាន់ កម្ពស់ ១៧ ម៉ែត្រ មានទំហំជាង ១៥ ០០០ ម៉ែត្រការ៉េ ហើយអាចក្លាយជាអគារមានរាងគ្រាប់មីនប្រឆាំងមនុស្សធំជាងគេក្នុងពិភពលោក។
CMAC បានបញ្ជាក់ថា៖ «អគារសារមន្ទីរនេះក៏អាចក្លាយជាមរតកជាតិមួយក្នុងការដាក់បង្ហាញជូនសាធារណជនជាតិនិងអន្ដរជាតិ ឱ្យយល់កាន់តែច្បាស់ថែមទៀតនូវការខិតខំពុះពារប្ដូរផ្ដាច់របស់សម្ដេចអគ្គមហាសេនាបតីតេជោ ហ៊ុន សែន ក្នុងការបញ្ចប់សង្គ្រាមនៅកម្ពុជា និងបានកសាងសន្ដិភាពយ៉ាងពេញលេញពិតប្រាកដមួយសម្រាប់ប្រជាជននិងប្រទេសជាតិដ៏កម្សត់»។
ជាមួយគ្នានេះ ក្នុងនាមប្រជាជននិងរាជរដ្ឋាភិបាលកម្ពុជា លោក ហេង រតនា ថ្លែងអំណរគុណយ៉ាងជ្រាលជ្រៅដល់ប្រជាជននិងរាជរដ្ឋាភិបាលជប៉ុនដែលតែងតែគាំទ្រលើវិស័យសកម្មភាពមីននៅកម្ពុជាជាពិសេសការផ្តល់ជំនួយជាថវិកា ទីប្រឹក្សាបច្ចេកទេស និងសម្ភារបច្ចេកទេសដល់អង្គភាព CMAC ក្នុងការអនុវត្តភារកិច្ចរបស់ខ្លួនប្រកបដោយជោគជ័យ និងមានប្រសិទ្ធភាពខ្ពស់។
លោកបានថ្លែងថា៖ «ជំនួយទាំងនេះបានចូលរួមក្នុងការលុបបំបាត់ការគំរាមកំហែងដោយសារគ្រាប់មីន និងយុទ្ធភណ្ឌមិនទាន់ផ្ទុះសំណល់សង្គ្រាម ការចូលរួមផ្តល់សុខដុមរមនារបស់ប្រជាជនកម្ពុជាឡើងវិញ និងការចូលរួមកសាងអនាគតកម្ពុជាប្រកបដោយក្តីសង្ឃឹម និងភាពជឿជាក់នៅកម្ពុជាក៏ដូចជាកិច្ចសហប្រតិបត្តិការជាមួយប្រទេសនានាលើវិស័យកម្ចាត់មីននេះ»។
នៅក្នុងឱកាសនោះដែរ តាងនាមថ្នាក់ដឹកនាំនិងមន្ត្រីទាំងអស់នៃអង្គភាព CMAC លោក ហេង រតនា ក៏បានថ្លែងអំណរគុណ និងគោរពដឹងគុណចំពោះអតីតនាយករដ្ឋមន្ត្រី ហ៊ុន សែន ដែលតែងតែយកចិត្តទុកដាក់ក្នុងការស្នើសុំរាជរដ្ឋាភិបាលជប៉ុនឱ្យបន្តផ្តល់ការគាំទ្រដល់គម្រោងបោសសម្អាតមីននៅកម្ពុជា ជាពិសេសគម្រោងសាងសង់អគារទាំង ២ នេះ៕
