ក្រសួងអប់រំ យុវជន និងកីឡា និងធនាគារជាតិនៃកម្ពុជា បានរៀបចំសិក្ខាសាលាស្ដីពី “ការអនុវត្តគម្រោងបញ្ជ្រាបចំណេះដឹងផ្នែកហិរញ្ញវត្ថុ ទៅក្នុងកម្មវិធីសិក្សាចំណេះទូទៅ ដំណាក់កាលទី៣” ដែលកម្មវិធីនេះ មិនមែនគ្រាន់តែផ្ដោតលើលេខនព្វន្ត និងការគណនាប៉ុណ្ណោះទេ តែនឹងរួមបញ្ចូលនូវជំនាញ និងចំណេះដឹងជាច្រើនសម្រាប់សុខុមាលភាពហិរញ្ញវត្ថុផ្ទាល់ខ្លួនផងដែរ។
សិក្ខាសាលានេះ ត្រូវបានរៀបចំឡើងក្រោមអធិបតីភាពលោកស្រី គឹម សេដ្ឋានី រដ្ឋលេខាធិការប្រចាំការ ក្រសួងអប់រំ យុវជន និងកីឡា លោកស្រី ជា សិរី ទេសាភិបាល ធនាគារជាតិ នៃកម្ពុជា និងមានការចូលរួមពីតំណាង ដៃគូអភិវឌ្ឍន៍ មន្ត្រីមកពីស្ថាប័នពាក់ព័ន្ធ រដ្ឋ និងឯកជន កាលពីថ្ងៃទី ១ ខែកុម្ភៈ ឆ្នាំ ២០២៤។ នេះបើតាមហ្វេសប៊ុករបស់ក្រសួងអប់រំ។
ក្នុងឱកាសនោះ លោកស្រី គឹម សេដ្ឋានី បានថ្លែងអំណរគុណចំពោះធនាគារជាតិនៃកម្ពុជា ដែលបានសហការជាមួយក្រសួងអប់រំ ក្នុងការបញ្ជ្រាបចំណេះដឹងផ្នែកហិរញ្ញវត្ថុទៅក្នុងកម្មវិធីសិក្សារបស់ជាតិ រហូតសម្រេចបានលទ្ធផលជាបន្តបន្ទាប់ នាពីរដំណាក់កាលកន្លងមក ដោយក្រសួងបានដាក់ឱ្យសាកល្បងអនុវត្តការបញ្ជ្រាបមេរៀនមួយចំនួននៅកម្រិតថ្នាក់ទី៤ និងទី៧ ក្នុងឆ្នាំសិក្សា ២០២២-២០២៣។
លោកស្រីបានបញ្ជាក់ថា៖ «គោលដៅបញ្ជ្រាបចំណេះដឹងអក្ខរកម្មហិរញ្ញវត្ថុ មិនមែនគ្រាន់តែផ្ដោតលើលេខនព្វន្ត និងការគណនាប៉ុណ្ណោះទេ តែនឹងរួមបញ្ចូលនូវជំនាញ និងចំណេះដឹងជាច្រើនដែលចាំបាច់សម្រាប់សុខុមាលភាពហិរញ្ញវត្ថុផ្ទាល់ខ្លួនផងដែរ។ ឧទាហរណ៍ ការយល់ដឹងអំពីគំនិតថវិកា ការសន្សំ ការវិនិយោគ ធនាគារ និងការខ្ចីប្រាក់ជាដើមដែលតម្រូវឱ្យអនុវត្តប្រកបដោយការទទួលខុសត្រូវ»។
លោកស្រីបានថ្លែងថា ជំនាញទាំងនេះ មានសារៈសំខាន់សម្រាប់បុគ្គលម្នាក់ៗ ក្នុងការគ្រប់គ្រងហិរញ្ញវត្ថុរបស់ពួកគេប្រកបដោយប្រសិទ្ធភាព ចៀសវាងអន្ទាក់បំណុល និងធ្វើការសម្រេចចិត្តផ្នែកហិរញ្ញវត្ថុខុស។ លើសពីនេះទៅទៀត តាមរយៈការរួមបញ្ចូលការអប់រំផ្នែកហិរញ្ញវត្ថុទៅក្នុងកម្មវិធីសិក្សា យើងអាចជួយបណ្តុះវប្បធម៌ទំនួលខុសត្រូវផ្នែកហិរញ្ញវត្ថុ និងភាពប្រុងប្រយ័ត្នខ្ពស់រួមទាំង Crypto-currency ផងដែរ។
លោកស្រីបានសង្កត់ធ្ងន់ទៀតថា ការអប់រំផ្នែកហិរញ្ញវត្ថុ នឹងផ្ដល់ឱ្យសិស្សនូវជំនាញក្នុងការរុករកទិដ្ឋភាពហិរញ្ញវត្ថុដ៏ស្មុគស្មាញ រៀនពីរបៀបបង្កើត និងគ្រប់គ្រងថវិកា ស្វែងយល់ពីផលប៉ះពាល់នៃការសម្រេចចិត្តហិរញ្ញវត្ថុ និងវាយតម្លៃជម្រើសនៃការវិនិយោគផ្សេងៗ។ ដូច្នេះវាពិតជាចាំបាច់ដែលត្រូវបញ្ជ្រាបការអប់រំផ្នែកហិរញ្ញវត្ថុទៅក្នុងមុខវិជ្ជាដែលមានស្រាប់ ដើម្បីឆ្លើយតបនឹងយុទ្ធសាស្ត្របញ្ចកោណ ដំណាក់កាលទី១ ដែលផ្ដោតលើការអភិវឌ្ឍមូលធនមនុស្សជាអាទិភាព ឈានទៅប្រែក្លាយកម្ពុជា ជាប្រទេសមានចំណូលមធ្យមកម្រិតខ្ពស់ក្នុងឆ្នាំ ២០៣០។
គួរបញ្ជាក់ដែរថា ការដាក់បញ្ចូលចំណេះដឹងផ្នែកហិរញ្ញវត្ថុទៅក្នុងកម្មវិធីសិក្សាចំណេះទូទៅ គឺជាគំនិតផ្ដួចផ្ដើមរបស់អតីតនាយករដ្ឋមន្ត្រី ហ៊ុន សែន ដោយលោកយល់ឃើញថា ចំណេះដឹងផ្នែកហិរញ្ញវត្ថុគឺជា កត្តាគន្លឹះមួយក្នុងការអភិវឌ្ឍវិស័យហិរញ្ញវត្ថុប្រកបដោយចីរភាព ដើម្បីរួមចំណែកដល់ការអភិវឌ្ឍជីវភាពរស់នៅរបស់ប្រជាជន និងសេដ្ឋកិច្ចជាតិ៕
