ពិធីចុះហត្ថលេខាលើអនុស្សរណៈរវាងភាគីកម្ពុជានិងកាណាដា នៅថ្ងៃទី២០ កុម្ភៈ ។ រូបថត ក្រសួងការបរទេស
ភ្នំពេញៈកម្ពុជា និងកាណាដា បានចុះហត្ថលេខាលើអនុស្សរណៈនៃការយោគយល់គ្នាស្តីពីការបង្កើតកិច្ចពិគ្រោះយោបល់ទ្វេភាគីរវាងក្រសួងការបរទេសទាំង ២ ដើម្បីជំរុញការវិនិយោគ ពាណិជ្ជកម្ម និងវិស័យអាទិភាពមួយចំនួនទៀត ខណៈកំណើនភ្ញៀវទេសចរកាណាដាមកកាន់កម្ពុជាកើនឡើងទ្វេដងក្នុងឆ្នាំ២០២៣។
ពិធីចុះហត្ថលេខានេះធ្វើឡើងរវាងលោក ឈូក ប៊ុណ្ណា អគ្គនាយកនៃអគ្គនាយកដ្ឋានអឺរ៉ុប អាមេរិក និងអាហ្វ្រិក-មជ្ឈិមបូព៌ា និងលោក អាឡិន បូមិន អគ្គនាយកប្រចាំតំបន់អាស៊ីអាគ្នេយ៍ និងអូសេអានី នៃក្រសួងការបរទេស ពាណិជ្ជកម្ម និងអភិវឌ្ឍន៍នៃប្រទេសកាណាដាកាលពីថ្ងៃទី ២០ ខែកុម្ភៈ ឆ្នាំ ២០២៤។ នេះបើយោងតាមសេចក្តីប្រកាសព័ត៌មានរបស់ក្រសួងការបរទេសកម្ពុជា។
ការចុះអនុស្សរណៈនេះធ្វើឡើងស្របពេលដែលគណៈប្រតិភូកាណាដា មកបំពេញទស្សនកិច្ចការងារនៅប្រទេសកម្ពុជាពីថ្ងៃទី ១៩ ដល់ថ្ងៃទី ២១ ខែកុម្ភៈ ឆ្នាំ ២០២៤ ដោយក្នុងនោះភាគីទាំង២បានផ្លាស់ប្តូរទស្សនៈក្នុងការលើកកម្ពស់ទំនាក់ទំនង និងកិច្ចសហប្រតិបត្តិការទាំងក្នុងក្របខ័ណ្ឌទ្វេភាគី និងពហុភាគី។
សេចក្តីប្រកាសព័ត៌មានក្រសួងការបរទេសកម្ពុជាចុះថ្ងៃទី ២០ កុម្ភៈ បានឱ្យដឹងថាការចុះហត្ថលេខាលើអនុស្សរណៈនៃការយោគយល់គ្នានេះ គឺជាព្រឹត្តិការណ៍ដ៏សំខាន់មួយទៀតសម្រាប់ទំនាក់ទំនងទ្វេភាគីរវាងកម្ពុជា និងកាណាដា ហើយភាគីទាំង ២ ក៏បានពិភាក្សាពីរបៀបវារៈនិងកាលបរិច្ឆេទសម្រាប់កិច្ចប្រជុំដំបូងនៃកិច្ចពិគ្រោះយោបល់ទ្វេភាគីដែលនឹងប្រព្រឹត្តទៅក្នុងឆ្នាំនេះផងដែរ។
បើតាមក្រសួងការបរទេស នៅក្នុងឱកាសនោះ លោកជុំ សុន្ទរី រដ្ឋលេខាធិការក្រសួងការបរទេសនិងសហប្រតិបត្តិការអន្តរជាតិបានចាត់ទុកការចុះអនុស្សរណៈនេះថាជាជំហានដ៏សំខាន់មួយក្នុងទិសដៅពង្រឹងកិច្ចសហប្រតិបត្តិការទ្វេភាគីឆ្ពោះទៅកាន់កម្រិតថ្មីមួយបន្ថែមទៀត។
លោកបានបញ្ជាក់ថា៖ «កម្ពុជាត្រៀមខ្លួនរួចជាស្រេចក្នុងការរៀបចំនិងសម្របសម្រួលជាមួយក្រសួងស្ថាប័នពាក់ព័ន្ធនានា ដើម្បីអនុវត្តសេចក្តីសម្រេចនានារវាងភាគីទាំង ២»។
ដោយកត់សម្គាល់និងពេញចិត្តខ្លាំងចំពោះភ្ញៀវទេសចរកាណាដាដែលមកកាន់ប្រទេសកម្ពុជាមានការកើនឡើងទ្វេដងក្នុងឆ្នាំ ២០២៣ ធៀបនឹងឆ្នាំ២០២២ លោក ជុំ សន្ទរី បានវាយតម្លៃខ្ពស់ចំពោះការសម្ពោធស្ថានកុងស៊ុលកិត្តិយសកាណាដាប្រចាំខេត្តសៀមរាប កាលពីថ្ងៃទី ១៣ ខែកុម្ភៈ ថ្មីៗនេះ។
តាមរយៈកំណើនភ្ញៀវទេសចរកាណានេះលោកបានបង្ហាញការជឿជាក់ថា ការសម្រេចបើកស្ថានកុងស៊ុលកិត្តិយសរបស់កាណាដានឹងចូលរួមចំណែកក្នុងការជំរុញកិច្ចសហប្រតិបត្តិការឱ្យកាន់តែខ្លាំងឡើងក្នុងវិស័យទេសចរណ៍ ពាណិជ្ជកម្ម និងការវិនិយោគរវាងប្រទេសទាំង២។
ពាក់ព័ន្ធក្នុងក្របខ័ណ្ឌអាស៊ាន-កាណាដាវិញ លោករដ្ឋលេខាធិការ ជុំ សុន្ទរី បានសន្យាថានឹងបន្តផ្តល់ការគាំទ្ររបស់កម្ពុជាក្នុងការពង្រឹងបន្ថែមទៀតនូវទំនាក់ទំនងដៃគូសន្ទនាអាស៊ាន-កាណាដា រួមទាំងការឈានទៅសម្រេចបានការបញ្ចប់ការចរចាលើកិច្ចព្រមព្រៀងពាណិជ្ជកម្មសេរីអាស៊ាន-កាណាដា។
ពាក់ព័ន្ធនឹងទំនាក់ទំនងកម្ពុជា-កាណាដានេះ លោក យង់ ពៅ អគ្គលេខាធិការនៃរាជបណ្ឌិត្យសភាកម្ពុជា បានថ្លែងថាជារួមកិច្ចសហប្រតិបត្តិការរវាងប្រទេសទាំង២ដែលបង្កើតឱ្យមានយន្តការជជែកពិភាក្សាពិគ្រោះយោបល់គ្នានោះនឹងផ្តល់ផលប្រយោជន៍ឱ្យគ្នាទៅវិញទៅមកទោះតិចឬច្រើនក្តី។
សម្រាប់កិច្ចសហប្រតិបត្តិការរវាងកម្ពុជានិងកាណាដាវិញលោកកត់សម្គាល់ថាភាគីទាំង២កន្លងទៅមិនទាន់មានទំនាក់ទំនងច្រើនជាមួយគ្នាទេ ប៉ុន្តែការចុះអនុស្សរណៈនេះ នឹងផ្តល់ផលប្រយោជន៍ឱ្យគ្នាទៅវិញទៅមកតាមរយៈការបង្កើនការវិនិយោគរបស់កាណាដាមកកម្ពុជា ក៏ដូចជាលក់ទំនិញកម្ពុជាទៅកាណាដាវិញផងដែរ។
លោកយង់ ពៅ បានថ្លែងថា៖«ម្យ៉ាងទៀតក៏ជាផលប្រយោជន៍នៅក្នុងកិច្ចការនយោបាយអន្តរជាតិកាលណាមានទំនាក់ទំនងគ្នាកាន់តែខ្លាំងនោះកិច្ចគាំពារអន្តរជាតិក៏កាន់តែមានការគាំពារកាន់តែច្រើនដែរ។កាណាដាគឺជាប្រទេសនៅទ្វីបអាមេរិកខាងជើងដែលមានតួនាទីសំខាន់នៅក្នុងកិច្ចការអន្តរជាតិ»។
សូមរំឭកថា កម្ពុជា និងកាណាដា បានបង្ហាញពីបំណងក្នុងការបង្កើតកិច្ចពិគ្រោះយោបល់ទ្វេភាគីកាលពីអំឡុងខែមិថុនា ឆ្នាំ២០២៣ ដើម្បីជាវេទិកាស្វែងរកឱកាសបង្កើនកិច្ចសហប្រតិបត្តិការលើវិស័យផ្សេងៗ បន្ទាប់ពីភាគីទាំង២បានកត់សម្គាល់ពីកំណើនជាបន្តបន្ទាប់នៃការផ្លាស់ប្តូរពាណិជ្ជកម្មនិងការកើនឡើងជាលំដាប់នៃភ្ញៀវទេសចរកាណាដាដែលមកទស្សនាកម្ពុជា។
សួមបញ្ជាក់ដែរថា ក្រោមឥទ្ធិពលវិបត្តិនយោបាយនិងសេដ្ឋកិច្ចសកលដែលកំពុងតែកើតមានឡើង បានធ្វើឱ្យពាណិជ្ជកម្មទ្វេភាគីកម្ពុជានិងកាណាដានៅក្នុងឆ្នាំ២០២៣សម្រេចបានត្រឹមតែ៩៤០,៤៩លានដុល្លារប៉ុណ្ណោះ គឺធ្លាក់ចុះ១៨,៥ភាគរយបើធៀបឆ្នាំ២០២២ ដែលមានចំនួន១,១៥ពាន់លានដុល្លារ៕
