ជំនួបរវាងលោក អ៊ាង សុផល្លែត និងលោកស្រី លីហុង ឡាន ដេបូរាអាន់នី កាលពីថ្ងៃទី២១ កុម្ភៈ ។ រូបថត ក្រសួងបរិស្ថាន
ភ្នំពេញៈរដ្ឋមន្ត្រីក្រសួងបរិស្ថានលោក អ៊ាង សុផល្លែត បង្ហាញការគាំទ្រនិងលើកទឹកចិត្តឱ្យមានការវិនិយោគលើសំណល់ប្លាស្ទិកនៅកម្ពុជា ដើម្បីរួមចំណែកកាត់បន្ថយការបំពុលបរិស្ថានខណៈក្រុមហ៊ុនមួយ បានចាប់អារម្មណ៍ចំពោះឱកាសវិនិយោគលើការកែច្នៃសំណល់ប្លាស្ទិកឡើងវិញ។
លោករដ្ឋមន្ត្រីបានជំរុញបែបនេះ នៅក្នុងជំនួបពិភាក្សាការងារជាមួយលោកស្រី លីហុង ឡាន ដេបូរាអាន់នី (LEE Hong Lan Deborah Anne) ប្រធាននិងនាយិកាប្រតិបត្តិក្រុមហ៊ុនអេ១ប្លាស្ទិក រីសសន៍លីមីធីត កាលពីថ្ងៃទី២១ ខែកុម្ភៈ ឆ្នាំ២០២៤។ ជំនួបនេះបានពិភាក្សាលើការវិនិយោគលើសំណល់ប្លាស្ទិកនៅកម្ពុជា តាមរយៈការកែច្នៃសំណល់ប្លាស្ទិកឡើងវិញដែលមានលក្ខណៈជាពាណិជ្ជកម្ម និងមានលទ្ធភាពនាំចូលទៅកាន់ទីផ្សារអន្តរជាតិ។ នេះបើតាមហ្វេសប៊ុកក្រសួងបរិស្ថាន។
បើតាមក្រសួងបរិស្ថាន ក្នុងជំនួបនោះលោក អ៊ាង សុផល្លែត បានលើកឡើងថា៖«សម្រាប់ក្រសួងបរិស្ថានគាំទ្រចំពោះសកម្មភាពវិនិយោគទាំងឡាយណាដែលបានគិតគូរដល់ប្រយោជន៍ប្រជាពលរដ្ឋនិងប្រជាសហគមន៍មូលដ្ឋានជាធំដោយចាត់ទុកថានេះគឺជាការរួមចំណែកធ្វើឱ្យសហគមន៍និងប្រជាពលរដ្ឋមានភាពជាម្ចាស់ការឯករាជភាពគិតគូរដល់ផលប៉ះពាល់បរិស្ថាន»។
លោកបានបន្តថា ការគាំទ្រឱ្យមានការវិនិយោគលើសំណល់ប្លាស្ទិកនេះ ដើម្បីឆ្លើយតបទៅនឹងយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជាដំណាក់កាលទី១ដែលផ្តោតការយកចិត្តទុកលើការកាត់បន្ថយការបំពុលបរិស្ថានដោយបន្តពង្រឹងការគ្រប់គ្រងសំណល់ទីប្រជុំជនប្លាស្ទិក និងសំណល់គ្រោះថ្នាក់ការត្រួតពិនិត្យការបំពុលទឹកខ្យល់និងសំឡេងព្រមទាំងបន្តជំរុញថាមពលស្អាតប្រសិទ្ធភាពថាមពលធន់នឹងការប្រែប្រួលអាកាសធាតុការដឹកជញ្ជូនបៃតងនិងដំណើរការឧស្សាហកម្មស្អាតជាដើម។
នាឱកាសនោះលោកស្រី លីហុងឡាន ដេបូរាអាន់នី បានកោតសរសើរចំពោះកិច្ចខិតខំប្រឹងប្រែងរបស់ក្រសួងបរិស្ថានដែលធ្វើឱ្យការនាំចូលថង់ប្លាស្ទិកមានការថយចុះជាង៥០ភាគរយនាពេលថ្មីៗនេះ តាមរយៈយុទ្ធនាការដែលមានសិស្សានុសិស្សកម្មករកម្មការិនីព្រះសង្ឃអាជ្ញាធរនិងប្រជាពលរដ្ឋមូលដ្ឋានបានចូលរួមជាច្រើនលាននាក់ស្របតាមការដាក់ចេញយុទ្ធសាស្ត្រចក្រាក្នុងវិស័យបរិស្ថាន។
ទន្ទឹមគ្នានេះលោកស្រីក៏បានបញ្ជាក់ដែរថា៖ «ក្រុមហ៊ុនមានការចាប់អារម្មណ៍ខ្ពស់ ចំពោះឱកាសវិនិយោគលើការកែច្នៃប្លាស្ទិកឡើងវិញ ដោយប្រព័ន្ធ Recycled Polyethylene Terephthalate (RPET) ដើម្បីបានចូលរួមចំណែក ជាមួយក្រសួងបរិស្ថានក្នុងការកាត់បន្ថយចំនួនសំណល់ប្លាស្ទិកពីអាជីវកម្មនិងអ្នកប្រើប្រាស់»។
បន្ថែមពីនេះលោកស្រីបានអះអាងថាបំណងវិនិយោគលើដំណើរការផលិតកម្មនេះក៏នឹងផ្តល់អត្ថប្រយោជន៍ដល់ការលើកស្ទួយសេដ្ឋកិច្ចរបស់ប្រជាពលរដ្ឋផងដែរ។
ជុំវិញរឿងនេះដែរលោក ស៊ា សុផល ប្រធានអង្គការមូលនិធិទំពាំងស្នងឫស្សីជាអង្គការ ដែលធ្វើសកម្មភាពលើការសម្អាតសំណល់ប្លាស្ទិកនៅបឹងទន្លេសាបបានបង្ហាញការគាំទ្រឱ្យមានការវិនិយោគនិងកែច្នៃសំណល់ប្លាស្ទិកឡើងវិញដើម្បីធានាដល់និរន្តរភាពបរិស្ថាននិងលើកកម្ពស់សេដ្ឋកិច្ចជាតិ។
ជាមួយគ្នានេះលោកក៏បានស្នើឱ្យក្រសួងគួរតែបង្កើតជាគោលនយោបាយដើម្បីលើកទឹកចិត្តដល់អ្នកវិនិយោគក្នុងស្រុកបន្ថែមទៀត។
លោកបានបន្តថា៖ «ក្នុងនាមខ្ញុំជាអ្នកស្រឡាញ់សុខភាពនិងជីវចម្រុះបឹង ទន្លេសាប ខ្ញុំពេញចិត្តព្រោះវាជាសញ្ញាល្អសម្រាប់វិស័យបរិស្ថានកម្ពុជាហើយក្រសួងគួរតែលើកទឹកចិត្តដល់អ្នកមានលុយនៅស្រុកខ្មែរឱ្យមានការកែច្នៃឡើងវិញដើម្បីកាត់បន្ថយការនាំចូលពីបរទេសដូចជាថង់កែវកាហ្វេនិងសំណល់ប្លាស្ទិកផ្សេងៗដែលភាគច្រើនយើងនាំពីវៀតណាមនិងថៃហើយសម្ភារទាំងនេះសុទ្ធតែជាសំរាមដែលទាមទារឱ្យមានការកែច្នៃឡើងវិញ»។
ពាក់ព័ន្ធសំណល់ប្លាស្ទិកនេះ ក្រសួងបរិស្ថាន បានត្រៀមដាក់ចេញយុទ្ធនាការសម្អាតសំណល់ប្លាស្ទិកនៅបឹងទន្លេសាបចាប់ពីថ្ងៃទី១ ខែមីនា ឆ្នាំ២០២៤ ខាងមុខ ក្នុងបំណងឈានទៅការពារធនធានត្រីនៅក្នុងបឹងដើម្បីឈានទៅលើកកម្ពស់អាហារូបត្ថម្ភនៅកម្ពុជាបន្ថែមទៀត៕
