អ្នកចូលរួមក្នុងពិធីសម្ពោធដាក់ឱ្យប្រើប្រាស់បន្ទប់ពិគ្រោះយោបល់កុមារមេត្រី នៅខេត្តកំពង់ចាម កាលពីថ្ងៃទី២១ ខែកុម្ភៈ ។ រូបថត Save the Children
កំពង់ចាមៈ ក្រសួងអប់រំ យុវជន និងកីឡា សហការជាមួយអង្គការ Save the Children ប្រចាំកម្ពុជា បានប្រកាសដាក់ឱ្យដំណើរការបន្ទប់ពិគ្រោះយោបល់កុមារមេត្រី នៅសាលាចំនួន ៥ ក្នុងខេត្តកំពង់ចាមដែលបន្ទប់ទាំងនេះ នឹងផ្តល់ជាទីតាំងសុវត្ថិភាព និងឯកជនសម្រាប់កុមារ ដើម្បីចែករំលែកកង្វល់របស់ពួកគេ ក៏ដូចជាពិភាក្សាអំពីបញ្ហាដែលប៉ះពាល់ដល់ពួកគេ។
ពិធីសម្ពោធដាក់ឱ្យប្រើប្រាស់បន្ទប់ពិគ្រោះយោបល់កុមារមេត្រី បានធ្វើឡើងកាលពីថ្ងៃទី២១ ខែកុម្ភៈ នៅសាលាបឋមសិក្សាថ្លុកជ្រៅ ស្រុកកងមាស ខេត្តកំពង់ចាម ដោយមានការចូលរួមពីមន្រ្តីនៃក្រសួងអប់រំ អង្គការ អាជ្ញាធរមូលដ្ឋាន លោកគ្រូអ្នកគ្រូ និងសិស្សានុសិស្សជាច្រើនរូបផងដែរ។ នេះបើយោងតាមសេចក្តីប្រកាសព័ត៌មានSave the Children។
លោក ចាន់ សុភា ប្រធាននាយកដ្ឋានបឋមសិក្សា នៃក្រសួងអប់រំ បានលើកឡើងថា បន្ទប់ពិគ្រោះយោបល់កុមារមេត្រី មានតួនាទីសំខាន់ណាស់សម្រាប់កុមារមេត្រី ដែលជាផ្នែកមួយនៃយន្តការការពារកុមារ និងរាយការណ៍នៅតាមសាលារៀន ដែលស្របតាមគោលនយោបាយជាតិ និងយុទ្ធសាស្ត្រទី៤ នៃគោលនយោបាយកម្មវិធីកុមារមេត្រី។
លោកមានប្រសាសន៍ថា៖ «ក្រសួងអប់រំ សង្ឃឹមយ៉ាងមុតមាំថា បន្ទប់ពិគ្រោះយោបល់កុមារមេត្រីនេះ នឹងត្រូវបានប្រើប្រាស់ និងបន្តប្រើប្រាស់ជាកន្លែងសុវត្ថិភាពសម្រាប់កុមារ ហើយសាលាផ្សេងទៀត នឹងអាចចែករំលែក និងផ្លាស់ប្ដូរបទពិសោធន៍ពីការបង្កើត និងអនុវត្តបន្ទប់នេះ នាពេលខាងមុខជាក់ជាមិនខាន»។
ជាមួយគ្នានោះដែរ លោក ម៉ូត សាណា នាយកប្រតិបត្តិកម្មវិធីរបស់អង្គការ Save the Children ប្រចាំកម្ពុជា បានថ្លែងឱ្យដឹងថា បន្ទប់ទាំងនេះ ត្រូវបានបង្កើតឡើងដោយគ្រោងលុបបំបាត់អំពើហិង្សាលើកុមារនៅក្នុងសាលារៀន(EVACiS) ដែលផ្តល់មូលនិធិដោយក្រសួងការបរទេសជប៉ុន។
ការបង្កើតឱ្យមានបន្ទប់នេះគឺដើម្បីផ្តល់ជាកន្លែងឯកជនមួយ ដែលកុមារ អាចពិភាក្សាបញ្ហា ដែលប៉ះពាល់ដល់ពួកគេ ជាមួយគ្រូរបស់ពួកគេ ជនបង្គោលកិច្ចគាំពារកុមារ និងមនុស្សពេញវ័យដែលគួរឱ្យទុកចិត្តផ្សេងទៀត។ លោក ម៉ូត សាណា ថ្លែងថា ៖ «ការរក្សាការសម្ងាត់ គឺជាកត្តាសំខាន់ក្នុងការបង្កើតបរិយាកាសសុវត្ថិភាពសម្រាប់កុមារ ក្នុងការចែករំលែកកង្វល់របស់ពួកគេ។
លោកបានបន្តថា៖ «យើងសង្ឃឹមថា បន្ទប់នេះ នឹងធ្វើឱ្យកុមារមានអារម្មណ៍សុវត្ថិភាព និងបង្កើនឱកាសសម្រាប់កុមារក្នុងការស្វែងរកការគាំទ្រពីមនុស្សពេញវ័យ ដោយមិនស្ទាក់ស្ទើរនៅពេលចាំបាច់»។
ជាមួយគ្នានោះដែរ លោក ម៉ូត សាណា ក៏បង្ហាញនូវក្តីសង្ឃឹមផងដែរថា បន្ទប់ទាំង៥ ដែលបង្កើតដោយគម្រោង EVACiS នឹងបង្ហាញពីសារៈសំខាន់ នៃវត្តមានរបស់បន្ទប់ពិគ្រោះយោបល់កុមារមេត្រីនៅតាមសាលារៀន ហើយសាលារៀនដទៃផ្សេងទៀត នឹងអាចចម្លងការអនុវត្តនេះ ដើម្បីជួយឱ្យឱកាសនៃការស្វែងរកការគាំទ្រពីកុមារ អាចកើនឡើងនៅសាលាផ្សេងៗទៀត។
កុមារី អឿន រីយ៉ា អាយុ ១២ឆ្នាំ ជាសិស្សថ្នាក់ទី៦ និងជាប្រធានក្រុមប្រឹក្សាកុមារ នៃសាលាបឋមសិក្សាថ្លុកជ្រៅ បានឡើងថ្លែងសុន្ទរកថា អរគុណចំពោះការចូលរួមពីភាគីពាក់ព័ន្ធ និងបានលើកឡើងពីសកម្មភាពផ្សេងៗដែលគាំទ្រដោយគម្រោង EVACiS ដែលបានជួយបង្កើនចំណេះដឹង និងការយល់ដឹងរបស់កុមារអំពីសិទ្ធិកុមារ និងរបៀបដែលពួកគេការពារខ្លួនពីអំពើហិង្សា។ រីយ៉ា ថ្លែងថា៖ «ជាការកត់សម្គាល់ឃើញរបស់ខ្លួនខ្ញុំផ្ទាល់ កុមារភាគច្រើនមានការយល់ដឹង ពាក់ព័ន្ធនឹងសិទ្ធិកុមារ របៀបការពារខ្លួនពីហានិភ័យ និង មធ្យោបាយរាយការណ៍នៅក្នុងសាលារៀន»។
ចំណែក លោក KAMEGAI Einosuke លេខាទូតទី២នៃស្ថានទូតជប៉ុន ប្រចាំកម្ពុជា ជឿជាក់ថា បន្ទប់ពិគ្រោះយោបល់កុមារមេត្រីនេះ នឹងជួយដល់សិស្ស និយាយអំពីកង្វល់របស់ពួកគេ ពាក់ព័ន្ធនឹងអំពើហិង្សា ទៅកាន់មនុស្ស ដែលពួកគេទុកចិត្ត និងស្វែងរកជំនួយ។
លោកមានប្រសាសន៍នាពិធីនោះថា កាលពីឆ្នាំមុន គឺជាខួបលើកទី៧០ នៃការបង្កើតទំនាក់ទំនងការទូតរវាងប្រទេសជប៉ុន និងកម្ពុជា ហើយដើម្បីរំឭកដល់ឱកាសនេះ ទំនាក់ទំនងទ្វេភាគី ត្រូវបានធ្វើឱ្យប្រសើរឡើងទៅជាភាពជាដៃគូយុទ្ធសាស្ត្រគ្រប់ជ្រុងជ្រោយ។
លោកបានបន្តថា ៖ «យើងពេញចិត្តចំពោះទំនាក់ទំនងជាប្រវត្តិសាស្ត្រ និងមិត្តភាព ដែលមានរវាងប្រទេសទាំង២របស់យើង ហើយយើងជឿថា បន្ទប់ទាំងនេះ នឹងតំណាងឱ្យស្ពានមួយបន្ថែមទៀត សម្រាប់ពួកយើង ដែលនឹងពង្រឹងទំនាក់ទំនងរបស់យើងនាពេលអនាគត»។
សូមបញ្ជាក់ផងដែរថា ក្រោមកិច្ចសហការជាមួយក្រសួងអប់រំ យុវជន និងកីឡាអង្គការ Save the Children ប្រចាំកម្ពុជា បានអនុវត្តគម្រោងលុបបំបាត់អំពើហិង្សាលើកុមារនៅក្នុងសាលារៀន (EVACiS) នៅក្នុងសាលាបឋមសិក្សាចំនួន៤៣ ក្នុងស្រុកកងមាស ខេត្តកំពង់ចាម ដោយមានមូលនិធិគាំទ្រពីក្រសួងការបរទេសជប៉ុនសម្រាប់រយៈពេល ៣ឆ្នាំ ចាប់តាំងពីឆ្នាំ២០២២។
សេចក្តីប្រកាសព័ត៌មានដដែលបានឱ្យដឹងថា ការស្ទង់មតិដែលធ្វើឡើងនៅដើមដំបូងនៃគម្រោងក្នុងឆ្នាំ ២០២២ ដែលផ្តោតលើសាលាបឋមសិក្សាទាំង ៤៣ បានបង្ហាញថា ៣០% នៃសិស្ស បានជួបប្រទះនូវអំពើហិង្សាមួយចំនួននៅក្នុងខែមុនតែមួយ។ បន្ទាប់ពីអនុវត្តគម្រោងរយៈពេល១ឆ្នាំ ការស្ទង់មតិមួយផ្សេងទៀតបានបង្ហាញថា អត្រាប្រេវ៉ាឡង់នៃអំពើហិង្សាបានកាត់បន្ថយមកត្រឹម ២២%៕
