ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រកម្ពុជា និងសម្តេចព្រះមហាក្សត្រីនរោត្តម មុនិនាថ សីហនុ មុនយាងចេញពីរាជធានីភ្នំពេញ។ រូបថត SHS
ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រកម្ពុជា និងសម្តេចព្រះមហាក្សត្រី នរោត្តម មុនិនាថ សីហនុ នៅថ្ងៃទី២៦ ខែកុម្ភៈ ឆ្នាំ២០២៤ បានយាងចាកចេញពីរាជធានីភ្នំពេញទៅទីក្រុងប៉េកាំងមួយរយៈ ដើម្បីពិនិត្យព្រះរាជសុខភាព តាមកាលវិភាគ និងវេជ្ជបញ្ជារបស់គ្រូពេទ្យ ដែលដំណើរយាងនេះធ្វើឡើងជារៀងរាល់ ៦ ខែម្តង។
ក្នុងការថ្វាយព្រះរាជដំណើរទ្រង់ មានវត្តមានលោកសាយ ឈុំ ប្រធានព្រឹទ្ធសភា, លោកហ៊ុន ម៉ាណែត នាយករដ្ឋមន្ត្រី, លោកស្រី ឃួន សុដារី ប្រធានរដ្ឋសភា, លោក ហេង សំរិន ប្រធានកិត្តិយសនៃឧត្ដមប្រឹក្សាផ្ទាល់ព្រះមហាក្សត្រ, លោក ហ៊ុន សែន ប្រធានក្រុមឧត្ដមប្រឹក្សាផ្ទាល់ព្រះមហាក្សត្រ និងឥស្សរជនជាន់ខ្ពស់របស់រដ្ឋាភិបាលកម្ពុជា ជាច្រើនរូបទៀត រួមនឹងវត្តមានឯកអគ្គរាជទូតចិនប្រចាំកម្ពុជា និងមន្ត្រីស្ថានទូតផងដែរ។
នាថ្ងៃទី២៤ ខែកុម្ភៈ ព្រះករុណាព្រះបាទសម្តេចព្រះបរមនាថ នរោត្តម សីហមុនី បានចេញព្រះរាជសារជូនជនរួមជាតិ ដោយព្រះអង្គបានបញ្ជាក់ថា ទ្រង់នឹងអវត្តមានពីប្រទេសកម្ពុជាមួយរយៈ ចាប់ពីថ្ងៃទី២៦ ខែកុម្ភៈ ដើម្បីពិនិត្យព្រះរាជសុខភាពនៅទីក្រុងប៉េកាំង ប្រទេសចិន។
ព្រះអង្គមានព្រះបន្ទូលថា៖ «នៅក្នុងឱកាសអវត្តមានរបស់ទូលព្រះបង្គំ ខ្ញុំព្រះករុណា សម្ដេចវិបុលសេនាភក្ដី សាយ ឈុំ ប្រធានព្រឹទ្ធសភា នឹងទទួលជួយទូលព្រះបង្គំ ខ្ញុំព្រះករុណា ខ្ញុំក្នុងឋានៈជាប្រមុខរដ្ឋស្ដីទីនៃព្រះរាជាណាចក្រកម្ពុជា»។
សូមជម្រាបថា សម្តេចព្រះបរមនាថ នរោត្តម សីហមុនី និងសម្តេចព្រះមហាក្សត្រី តែងមានព្រះរាជដំណើរយាងទៅពិនិត្យសុខភាពនៅទីក្រុងប៉េកាំង ប្រទេសចិន នេះជាទៀងទាត់នៅរៀងរាល់ ៦ខែម្តង ដែលព្រះរាជដំណើរគ្រាមុនធ្វើឡើងកាលពីថ្ងៃទី២៨ ខែសីហា ឆ្នាំ២០២៣។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា ថ្លែងថា ព្រះរាជដំណើររបស់ព្រះមហាក្សត្រនិងសម្តេចម៉ែ យាងចេញក្នុងអំឡុងពេលចំពេលបោះឆ្នោតជ្រើសតាំងសមាជិកព្រឹទ្ធសភានីតិកាលទី៥។
លោកថ្លែងថា៖ «ការបោះឆ្នោតលើកនេះ មិនចោទជាបញ្ហាប្រឈមលើស្ថានភាពនយោបាយ ឬទាមទារឱ្យមានព្រះរាជអន្តរាគមន៍សម្រាប់ដោះស្រាយវិបត្តិនយោបាយណាមួយរវាងគណបក្សដែលចូលរួមប្រកួតប្រជែងទេ។ យើងឃើញបរិយាកាសបោះឆ្នោតតាំងពីដើមទី រហូតមកទល់ឥឡូវ យើងមិនឃើញមានភាពមិនប្រក្រតីណាមួយឡើយ ដែលមិនឃើញសញ្ញាណជាប់គាំងនយោបាយ ការតវ៉ាពាក់ព័ន្ធនឹងលទ្ធផលបោះឆ្នោតដែរ ដែលការយាងចាកចេញរបស់ព្រះអង្គ មិនចោទជាបញ្ហាទេ»។
ចំពោះមតិសាធារណៈកន្លងមក ដែលលើកឡើងថា ព្រះមហាក្សត្រតែងយាងចាកចេញពីប្រទេសកម្ពុជា ទៅទីក្រុងប៉េកាំងអំឡុងប្រទេសមានព្រឹត្តិការណ៍នយោបាយធំៗ ដូចជាការបោះឆ្នោតជាដើម លោកគិន ភា ចាត់ទុកជាមតិរិះគន់ដែលមិនមានមូលដ្ឋានច្បាស់លាស់។
លោក មាស នី អ្នកស្រាវជ្រាវការអភិវឌ្ឍសង្គម និងជាអ្នកតាមដាននយោបាយក្នុងស្រុក ថ្លែងថា ដំណើរព្រះមហាក្សត្រនិងសម្តេចម៉ែទៅទីក្រុងប៉េកាំងដើម្បីព្រះរាជសុខភាពជារឿងសំខាន់ បើសិនស្ថានភាពព្រះរាជសុខភាពទ្រង់ចាំបាច់មានការពិនិត្យ។
លោកបានថ្លែងថា៖ «តាមផ្លូវច្បាប់ ក្នុងរដ្ឋធម្មនុញ្ញកម្ពុជា ព្រះមហាក្សត្រជានិមិត្តរូបនៃយុត្តិធម៌សង្គម ជានិមិត្តរូបនៃភាពជាអាជ្ញាកណ្តាលនៅក្នុងដំណើរការបោះឆ្នោតរបស់គណបក្សនយោបាយ»។
លោក មាស នី ថ្លែងថា ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ នេះ គណបក្សប្រជាជនកម្ពុជាដែលជាគណបក្សកាន់អំណាចនឹងទទួលបានជ័យជម្នះ ហើយអាចគ្រប់គ្រងស្ថានការណ៍ប្រទេសបាន ដែលនឹងមិនកើតចលាចលសង្គមណាមួយឡើយ ហើយក៏មិនទាមទារវត្តមានព្រះមហាក្សត្រដែរ៕
