លោក ជាម យៀប និងសមាជិករដ្ឋសភាកម្ពុជាក្នុងជំនួបពិភាក្សាការងារជាមួយគណៈប្រតិភូរដ្ឋសភាឡាវនៅថ្ងៃទី២៦កុម្ភៈ។ រូបថត រដ្ឋសភា
ភ្នំពេញៈ សមាជិកគណៈអចិន្រ្តៃយ៍ និងជាប្រធានគណៈកម្មាធិការកិច្ចការជនជាតិភាគតិចរបស់រដ្ឋសភាឡាវលោក ខាំចាន់ សុដាប៉ាសឺត បានថ្លែងថា បេសកកម្មរបស់គណៈប្រតិភូរដ្ឋសភាឡាវមកបំពេញទស្សនកិច្ចនៅកម្ពុជា នាពេលនេះ ដើម្បីរឹតចំណងមិត្តភាព សាមគ្គីភាព និងកិច្ចសហប្រតិបត្តិការលើគ្រប់វិស័យ ជាពិសេសស្ថាប័ននីតិប្បញ្ញត្តិ ឡាវនិងកម្ពុជា។
លោក ខាំចាន់ សុដាប៉ាសឺត បានថ្លែងបែបនេះ ក្នុងគ្រាដែលលោកដឹកនាំគណៈប្រតិភូរដ្ឋសភាឡាវចូលជួបពិភាក្សាការងារជាមួយ លោក ជាម យៀប អនុប្រធានទី១រដ្ឋសភា នៅព្រឹកថ្ងៃទី២៦ ខែកុម្ភៈ ឆ្នាំ២០២៤ នៅវិមានរដ្ឋសភាកម្ពុជា។ នេះបើយោងតាមសេចក្តីប្រកាសព័ត៌មានរបស់រដ្ឋសភា។
សេចក្តីប្រកាសព័ត៌មានបានលើកឡើងថា លោក ខាំចាន់ សុដាប៉ាសឺត ក៏ចង់សិក្សាស្វែងយល់ ជាមួយគណៈកម្មការអប់រំ យុវជនកីឡា ធម្មការ កិច្ចការសាសនា វប្បធម៌ និងទេសចរណ៍ នៃរដ្ឋសភាកម្ពុជា ដើម្បីផ្លាស់ប្តូរបទពិសោធន៍គ្នាទៅវិញទៅមក ក្នុងការអភិវឌ្ឍវិស័យទាំងនោះឱ្យមានការរីកចម្រើនឡើង។
នាឱកាសនោះដែរ លោក ជាម យៀប បានថ្លែងប្រាប់គណៈប្រតិភូរដ្ឋសភាឡាវ ពីសភាពការណ៍ ភូមិសាស្រ្តនយោបាយ សេដ្ឋកិច្ចសង្គមរបស់ប្រទេសកម្ពុជា ពិសេសរាល់ស្នាដៃជោគជ័យរបស់ស្ថាប័នរដ្ឋ ដូចជា ដំណើរការបោះឆ្នោតជ្រើសតាំងតំណាងរាស្រ្ត នីតិកាលទី៧ នៃរដ្ឋសភា កន្លងមក ដែលបានប្រព្រឹត្តទៅដោយរលូន សេរី ត្រឹមត្រូវ ដែលបានទទួលស្គាល់និងការគាំទ្រពីអ្នកសង្កេតការណ៍ជាតិនិងអន្តរជាតិ រួមនឹងការខិតខំរបស់រាជរដ្ឋាភិបាលកម្ពុជា ក្នុងការទប់ស្កាត់ជំងឺកូវីដ១៩ដោយជោគជ័យផងដែរ។
លោក ជាម យៀប បានបញ្ជាក់ថា ៖«ការធ្វើជាម្ចាស់ផ្ទះរៀបចំប្រជុំកំពូល ASEAN លើកទី៤០ និង៤១ និង AIPA លើកទី៤៣ ផងដែរ កម្ពុជាទទួលបានជោគជ័យយ៉ាងត្រចះត្រចង់នៅលើឆាកអន្តរជាតិ នៅឆ្នាំ២០២២ កន្លងទៅ។ កម្ពុជាក៏បានធ្វើជាម្ចាស់ផ្ទះរៀបចំប្រកួតកីឡាស៊ីហ្គេម ដោយជោគជ័យនិងទទួលបានការកោតសរសើរពីមតិជាតិ និងអន្តរជាតិយ៉ាងគគ្រឹកគគ្រេងផងដែរ»។
ទាក់ទងនឹងការងាររដ្ឋសភាកម្ពុជា លោក ជាម យៀប ក៏បានលើកឡើងដែរថា ក្នុងរយៈពេលជាង៥ខែកន្លងទៅ តំណាងរាស្រ្តនីតិកាលទី៧ នៃរដ្ឋសភាបានបំពេញតួនាទី និងភារកិច្ចរបស់ខ្លួនក្នុងការបម្រើជាតិ និងប្រជាជនទទួលបានលទ្ធផលគួរជាទីមោទនៈ។
លោក ជាម យៀប ថា៖«ក្រៅពីបំពេញតួនាទី និងភារកិច្ចជាតំណាងរាស្រ្តក្នុងការពិភាក្សាអនុម័តច្បាប់ តំណាងរាស្ត្រ បានចុះមូលដ្ឋានដើម្បីរាយការណ៍ និងផ្សព្វផ្សាយនូវលទ្ធផលនៃសម័យប្រជុំរដ្ឋសភា ព្រមទាំងការងារថ្មីៗមួយចំនួនទៀត។ ក្រៅពីនេះសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា ក៏បានដឹកនាំរដ្ឋសភាកម្ពុជា ចូលរួមក្នុងការងារការទូតរដ្ឋសភាយ៉ាងទូលំទូលាយផងដែរ»។
សូមបញ្ជាក់ដែរថា គណៈប្រតិភូរដ្ឋសភានៃសាធារណរដ្ឋប្រជាធិបតេយ្យប្រជាមានិតឡាវ ដឹកនាំដោយ លោក ខាំ ចាញ់សុដាប៉ាសឺត (Khamchanh SODAPASEUTH) បានមកបំពេញទស្សនកិច្ចជាផ្លូវការនៅកម្ពុជា ចាប់ពីថ្ងៃទី២៥-២៩ ខែកុម្ភៈ ឆ្នាំ២០២៤។
តាមរយៈកម្មវិធីដែលបានគ្រោងទុក គណៈប្រតិភូរដ្ឋសភាឡាវ នឹងចូលជួបពិភាក្សាការងារជាមួយលោក ប៉ា សុជាតិវង្ស ប្រធានគណៈកម្មការអប់រំ យុវជន កីឡា ធម្មការ សាសនា វប្បធម៌ វិចិត្រសិល្បៈ និងទេសចរណ៍ នៃរដ្ឋសភា, ជួបពិភាក្សាការងារជាមួយ លោក លូ គឹមឈន់ ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានអគ្គនាយកកំពង់ផែស្វយ័តក្រុងព្រះសីហនុ, ទស្សនាព្រះបរមរាជវាំង រមណីយដ្ឋានវត្តភ្នំ និងអញ្ជើញទៅទស្សនកិច្ចនៅកំពង់ផែស្វយ័តក្រុងព្រះសីហនុ តំបន់សេដ្ឋកិច្ចពិសេសក្រុងព្រះសីហនុ និងរោងចក្រផលិតស្រាបៀរអង្គរផងដែរ៕
