លោកលី ធុជ នៅក្នុងសន្និសីទនាទីក្រុងអូតាវ៉ា នៅថ្ងៃទី២៧ កុម្ភៈ ។ រូប Ly Thuch FB
ភ្នំពេញៈក្នុងនាមកម្ពុជាជាប្រធាននៃកិច្ចប្រជុំត្រួតពិនិត្យឡើងវិញលើកទី៥នៃអនុសញ្ញាអូតាវ៉ា លោកទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន និងជាប្រធានអនុសញ្ញាអូតាវ៉ាឆ្នាំ២០២៤ បានដឹកនាំគណៈប្រតិភូអាជ្ញាធរមីនបំពេញបេសកកម្មនៅទីក្រុងហ្សឺណែវ ប្រទេសស្វ៊ីសចាប់ពីថ្ងៃទី២៧ ខែកុម្ភៈ ដល់ថ្ងៃទី៧ ខែមីនា ឆ្នាំ២០២៤។
លោក លី ធុជ បានលើកឡើងថា គណៈប្រតិភូអាជ្ញាធរមីនទៅបំពេញបេសកកម្មនៅទីក្រុងហ្សឺណែវ ប្រទេសស្វ៊ីស ដើម្បីចូលរួមដឹកនាំសន្និសីទកៀរគរធនធានប្រចាំឆ្នាំនៃអនុសញ្ញាអូតាវ៉ា និងកិច្ចប្រជុំត្រៀមរៀបចំកិច្ចប្រជុំកំពូលសៀមរាប-អង្គរស្តីពីពិភពលោកមួយដែលគ្មានមីន។
លោកបានបន្តថា ក្រៅពីដឹកនាំសន្និសីទ និងកិច្ចប្រជុំដែលជាកាតព្វកិច្ចរបស់ប្រធានអនុសញ្ញាអូតាវ៉ាឆ្នាំ២០២៤ លោកនឹងចូលរួមដឹកនាំកិច្ចប្រជុំសំខាន់ៗមួយចំនួនផ្សេងទៀតរួមមាន កិច្ចប្រជុំគណៈកម្មការជំរុញអនុលោមភាពកិច្ចសហប្រតិបត្តិការ កិច្ចប្រជុំគណៈកម្មការសម្របសម្រួល និងកិច្ចប្រជុំក្រុមការងារសម្របសម្រួលកិច្ចការសកលភាវូបនីយកម្ម។
យោងតាមសេចក្តីប្រកាសព័ត៌មានរបស់អាជ្ញាធរមីននៅថ្ងៃទី២៧ ខែកុម្ភៈ បានឱ្យដឹងដែរថា សន្និសីទកៀរគរធនធាននៃអនុសញ្ញាអូតាវ៉ា នឹងប្រព្រឹត្តទៅក្នុងគោលបំណងស្វែងរកការគាំទ្រហិរញ្ញវត្ថុសម្រាប់សកម្មភាពការងាររបស់អង្គភាពគាំទ្រការអនុវត្តអនុសញ្ញាអូតាវ៉ាក្នុងឆ្នាំ២០២៤។
ប្រភពដដែលបន្តថា៖ «កិច្ចប្រជុំត្រៀមរៀបចំ កិច្ចប្រជុំកំពូលសៀមរាប-អង្គរ ស្ដីពីពិភពលោកមួយដែលគ្មានមីន នឹងធ្វើឡើងក្នុងគោលបំណងបង្ហាញពីវឌ្ឍនភាពនៃការរៀបចំកិច្ចប្រជុំកំពូលសៀមរាប-អង្គរ ជូនដល់រដ្ឋភាគី និងអង្គការពាក់ព័ន្ធដែលកម្ពុជានឹងធ្វើជាម្ចាស់ផ្ទះ»។
អាជ្ញាធរមីនបានបន្តថា ក្រៅពីដឹកនាំសន្និសីទ និងកិច្ចប្រជុំដែលជាកាតព្វកិច្ចរបស់ប្រធានអនុសញ្ញាអូតាវ៉ាឆ្នាំ២០២៤ លោកទេសរដ្ឋមន្ត្រី នឹងចូលរួមដឹកនាំកិច្ចប្រជុំសំខាន់ៗមួយចំនួនផ្សេងទៀតរួមមាន កិច្ចប្រជុំគណៈកម្មការជំរុញអនុលោមភាព កិច្ចសហប្រតិបត្តិការ កិច្ចប្រជុំគណៈកម្មការសម្របសម្រួល និងកិច្ចប្រជុំក្រុមការងារសម្របសម្រួលកិច្ចការ សកលភាវូបនីយកម្មជាដើម។
បន្ថែមលើនេះ លោកទេសរដ្ឋមន្ត្រី លី ធុជ នឹងជួបពិភាក្សាការងារជាមួយ ឯកអគ្គរាជទូត/រដ្ឋទូតនានានៅទីក្រុងហ្សឺណែវ ប្រទេសស្វ៊ីស ដើម្បីស្វែងរកការគាំទ្រដល់កម្ពុជាជាប្រធាន និងម្ចាស់ផ្ទះ រៀបចំកិច្ចប្រជុំកំពូលសៀមរាប-អង្គរ និងជួបពិភាក្សាការងារជាមួយឯកអគ្គរាជទូត/រដ្ឋទូតនានា ដែលមិនទាន់ចូលជា សមាជិកអនុសញ្ញាអូតាវ៉ៅ ដើម្បីកៀរគរ និងជំរុញការធ្វើសកលភាវូបនីយកម្ម។
សូមបញ្ជាក់ដែរថា កម្ពុជានឹងធ្វើជាម្ចាស់ផ្ទះនៃកិច្ចប្រជុំអនុសញ្ញាអូតាវ៉ាឆ្នាំ២០២៤ដែលនឹងប្រារព្ធធ្វើឡើងចាប់ពីថ្ងៃទី២៥ ដល់២៩ ខែវិច្ឆិកា ឆ្នាំ២០២៤ នៅខេត្តសៀមរាប ដែលប្រមុខរាជរដ្ឋាភិបាលកម្ពុជា លោកនាយករដ្ឋមន្ត្រី ហ៊ុន ម៉ាណែត ក៏នឹងចូលរួមផងដែរ៕
