លោកនាយករដ្ឋមន្ត្រី ហ៊ុន ម៉ាណែត និងព្រះអង្គម្ចាស់ Sultan Ibrahim ibni Almarhum Sultan Iskandar។ រូប STPM
ភ្នំពេញៈ មន្ត្រីជាន់ខ្ពស់នៃរាជរដ្ឋាភិបាលកម្ពុជាបានលើកឡើងថា លោកនាយករដ្ឋមន្ត្រី ហ៊ុន ម៉ាណែត បានបញ្ចប់ការបំពេញទស្សនកិច្ចផ្លូវការ នៅប្រទេសម៉ាឡេស៊ី ក្នុងរយៈពេលខ្លី សកម្ម និងមមាញឹកតែជាឱកាសដ៏វិសេសវិសាលដើម្បីពង្រឹងកិច្ចសហប្រតិបត្តិការទ្វេភាគីឱ្យកាន់តែខ្ពស់ឈានឡើងបន្ថែមទៀត។
នេះជាការថ្លែងឱ្យដឹងពីលោក តាន់ ហ្សង់ ហ្រ្វង់ស័រ រដ្ឋមន្ត្រីប្រតិភូអមនាយករដ្ឋមន្ត្រីទទួលបន្ទុកកិច្ចការអន្តរជាតិ នាសន្និសីទសារព័ត៌មាននៅយប់ថ្ងៃទី ២៧ ខែកុម្ភៈ បន្ទាប់ពីបញ្ចប់ដំណើរបំពេញទស្សនកិច្ចផ្លូវការ នៅប្រទេសម៉ាឡេស៊ីរបស់លោកនាយករដ្ឋមន្ដ្រី ហ៊ុន ម៉ាណែត។
លោកថ្លែងថា ប្រទេសម៉ាឡេស៊ីទី៣ នៅក្នុងអាស៊ានដែលរាជរដ្ឋាភិបាលកម្ពុជាបានទៅបំពេញទស្សនកិច្ចបន្ទាប់ពីប្រទេសវៀតណាម កាលពីខែធ្នូ ឆ្នាំ ២០២៣ និងនៅប្រទេសថៃ នាដើមខែកុម្ភៈ ឆ្នាំ ២០២៤។លោក តាន់ ហ្សង់ ហ្រ្វង់ស័រ បានថ្លែងថា «ទស្សនកិច្ចនៅម៉ាឡេស៊ីរបស់សម្តេចធិបតីជាទស្សនកិច្ចខ្លី សកម្ម និងមមាញឹក ដែលស្រដៀងគ្នានឹងទស្សនកិច្ចនៅថៃកាលពីដើមខែកុម្ភៈកន្លងទៅថ្មីៗនេះផងដែរ»។
លោកថ្លែងបន្តថា គ្រប់គ្នាប្រហែលជាដឹងហើយថា លោក ហ៊ុន ម៉ាណែត និងលោកដាតុ ស៊េរី អាន់វ៉ា ប៊ីន អ៊ីប្រាហ៊ីម នាយករដ្ឋមន្ត្រី នៃប្រទេសម៉ាឡេស៊ីបានស្គាល់គ្នា ឬផ្តើមស្គាល់គ្នាច្បាស់ ដ្បិតនាយករដ្ឋមន្ត្រីទាំង ២ បានជួបគ្នាជាលើកទី ៣ ហើយ ដែលកាលលើកទី១ នៅក្នុងកិច្ចប្រជុំកំពូលអាស៊ានលើកទី៤៣ នៅប្រទេសឥណ្ឌូនេស៊ី នៅក្នុងខែកញ្ញា ឆ្នាំ ២០២៣ និងលើកទី២ នាប្រទេសជប៉ុនក្នុងខែធ្នូ ឆ្នាំ ២០២៣។
លោកបានបញ្ជាក់ទៀតថា៖ «ទស្សនកិច្ចរបស់សម្តេចធិបតីនៅទីក្រុងគូឡាឡាំពួ ប្រទេសម៉ាឡេស៊ី នាពេលនេះ គឺជាឱកាសដ៏វិសេសវិសាលដើម្បីពង្រឹងកិច្ចសហប្រតិបត្តិការទ្វេភាគី រីឯគោលដៅគឺបន្តនាំមកនូវផលប្រយោជន៍ជាក់ស្តែងជូនប្រជាជន និងប្រជាជាតិទាំង ២ ក្នុងនោះកម្ពុជា និងម៉ាឡេស៊ីមានទំនាក់ទំនងការទូតនឹងគ្នារយៈពេល ៦៧ ឆ្នាំមកហើយ ដោយបានប្តេជា្ញពង្រឹងកិច្ចសហប្រតិបត្តិការទ្វេភាគីក្នុងគ្រប់វិស័យ ពិសេសផ្នែកសេដ្ឋកិច្ច»។
លោក តាន់ ហ្សង់ ហ្រ្វង់ស័រ ថ្លែងថា លោក ហ៊ុន ម៉ាណែត និងលោកដាតុ ស៊េរី អាន់វ៉ា ប៊ីន អ៊ីប្រាហ៊ីមបានជជែកពិភាក្សា និងចរចាពីសំណុំរឿងជាច្រើនរួមមាន៖ នយោបាយ ការពារជាតិ សន្តិសុខ ពាណិជ្ជកម្ម និងវិនិយោគ ទេសចរណ៍ ឧស្សាហកម្មអាហារហាឡាល់ ការងារ ទូរគមនាគមន៍ និងបច្ចេកវិទ្យាព័ត៌មាន បច្ចេកវិទ្យាឌីជីថល និងសន្តិសុខថាមពល។
លោកបានបញ្ជាក់ថា៖ «កិច្ចចរចាជាទូទៅ ប្រព្រឹត្តទៅដោយរលូន ល្អ និងបាននាំមកនូវលទ្ធផលជាក់ស្តែងជាច្រើនផងដែរ»។
លោកថ្លែងថា ក្នុងឱកាសនៃការជួបពិភាក្សាការងារ លោក ហ៊ុន ម៉ាណែត បានអញ្ជើញលោក ដាតុ ស៊េរី អាន់វ៉ា ប៊ីន អ៊ីប្រាហ៊ីមមកបំពេញទស្សនកិច្ចនៅកម្ពុជាផងដែរ ហើយលោកនាយករដ្ឋមន្ត្រីម៉ាឡេស៊ី បានបញ្ជាក់ថា លោកនឹងពិនិត្យមើលលទ្ធភាពឱ្យសមស្របទៅតាមពេលវេលា ប៉ុន្តែមិនបានបញ្ជាក់នៅពេលណានោះទេ។
លោក ហ៊ុន ម៉ាណែត និងប្រធានសភាម៉ាឡេស៊ី។ រូបថត STPM
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានថ្លែងថា ដំណើរទស្សនកិច្ចរយៈពេលខ្លីទៅកាន់ប្រទេសម៉ាឡេស៊ីនាពេលនេះ គឺពិតជាទទួលបាននូវលទ្ធផលជាផ្លែផ្កាដ៏ធំធេងសម្រាប់ផលប្រយោជន៍ជាតិ និងប្រជាជនកម្ពុជា ជាពិសេសគឺដំណើរទស្សនកិច្ចនេះ ក៏រំលេចឱ្យឃើញពីទំនាក់ទំនង និងកិច្ចសហប្រតិបត្តិការយ៉ាងជិតស្និទ្ធទ្វេឡើងថែមទៀតរវាងកម្ពុជា និងម៉ាឡេស៊ី។
លោក ភា បញ្ជាក់ថា៖«ទំនាក់ទំនងខាងនយោបាយការទូត សន្តិសុខរវាងប្រទេសទាំង ២ កាន់តែមានលក្ខណៈស៊ីជម្រៅ ហើយវាជាកាលានុវត្តភាពក្នុងការជំរុញ លើកកម្ពស់ពាណិជ្ជកម្មទ្វេភាគី ការវិនិយោគ និងទំនាក់ទំនងរវាងប្រជាជន និងប្រជាជននៃប្រទេសយើងទាំង ២»។
លោក គិន ភា ក៏បានថ្លែងដោយបង្ហាញក្តីសង្ឃឹមដែរថា បន្ទាប់ពីដំណើរទស្សនកិច្ចនេះទៅ ទំហំពាណិជ្ជកម្មរវាងកម្ពុជា និងម៉ាឡេស៊ីកាន់តែមានតួលេខកើនឡើងខ្ពស់ថែមទៀត ហើយការវិនិយោគផ្ទាល់ពីប្រទេសម៉ាឡេស៊ីមកកាន់កម្ពុជា ក៏នឹងកើនទំហំ ព្រមជាមួយនឹងកិច្ចសហការលើវិស័យផ្សេងៗជាច្រើនទៀតក្នុងទំនាក់ទំនងរវាងប្រទេសទាំង ២ ក្នុងការពង្រឹង និងពង្រីកផងដែរ។
យោងតាមលទ្ធផលនៃដំណើរទស្សនកិច្ចផ្លូវការនេះដែរ លោកហ៊ុន ម៉ាណែត បានដឹកនាំគណៈប្រតិភូជាន់ខ្ពស់រាជរដ្ឋាភិបាល ចូលក្រាបថ្វាយបង្គំគាល់ ព្រះចៅ SULTAN IBRAHIM IBNI ALMARHUM SULTAN ISKANDAR ព្រះមហាក្សត្រទី ១៧ នៃប្រទេសម៉ាឡេស៊ី នៅព្រះបរមរាជវាំង ISTANA NEGARA។ លោកក៏បានចូលជួបសម្តែងការគួរសមជាមួយ លោក DATUK MULTANG TAGAL ប្រធានព្រឹទ្ធសភា និងលោក YB TAN SRI DATO JOHARI BIN ABDUL ប្រធានរដ្ឋសភាម៉ាឡេស៊ី។ នេះជាដំណើរទស្សនកិច្ចក្រៅប្រទេសលើកទី ១១ របស់ លោក ហ៊ុន ម៉ាណែត ក្នុងនាមជានាយករដ្ឋមន្ត្រី៕
