អ្នកទេសចរនៅប្រាសាទអង្គរវត្តនាឆ្នាំកន្លងទៅ។ ហុង មិនា
ភ្នំពេញៈ លោក សុខ សូកេន រដ្ឋមន្ត្រីក្រសួងទេសចរណ៍ បានប្រកាសឱ្យដឹងថា កម្ពុជាបានទទួលពានរង្វាន់ជាគោលដៅទេសចរណ៍វប្បធម៌ឈានមុខគេ នៅអាស៊ីជាថ្មីម្តងទៀតក្នុងឆ្នាំ ២០២៣ ពីWorld Travel Awards ខណៈដែលពានរង្វាន់គោលដៅទេសចរណ៍យុវជនឈានមុខគេរបស់អាស៊ី ២០២៤ ក៏ត្រូវបាន World Travel Awards សម្រេចប្រគល់ជូនកម្ពុជាផងដែរ។
លោក សុខ សូកេន បានសរសេរលើបណ្តាញតេឡេក្រាមរបស់លោកនាថ្ងៃទី ២៧ ខែកុម្ភៈ នេះថា៖ «ព្រះរាជាណាចក្រកម្ពុជាបានទទួលពានរង្វាន់ជាគោលដៅទេសចរណ៍វប្បធម៌ឈានមុខគេ នៅអាស៊ីជាថ្មីម្តងទៀតក្នុងឆ្នាំ ២០២៣។ សមិទ្ធផល ដ៏គួរឱ្យកត់សម្គាល់នេះ បញ្ជាក់សាជាថ្មីអំពីភាពទាក់ទាញរបស់ យើង ថាជាគោលដៅទេសចរណ៍ដែលដាច់ខាតត្រូវតែទៅទស្សនា សម្រាប់អ្នកមានចំណាប់អារម្មណ៍អំពីវប្បធម៌»។
ជាមួយគ្នានេះដែរ លោកនាយករដ្ឋមន្ត្រី ហ៊ុន ម៉ាណែត រួមនឹងស្ថាប័នជាតិសំខាន់ៗទៀត បានចូលរួមអបអរសាទរចំពោះប្រទេសកម្ពុជា ដែលបានឈ្នះពានរង្វាន់នេះផងដែរ។
យោងតាមគេហទំព័ររបស់ World Travel Awards បានលើកឡើងថា កម្ពុជា និងប្រទេសចំនួន ៦ ផ្សេងទៀតដូចជាប្រទេសឥណ្ឌា ជប៉ុន នេប៉ាល់ ស្រីលង្កា ថៃ និងប្រទេសវៀតណាម ស្ថិតនៅក្នុងបញ្ជីឈ្មោះរបស់ World Travel Awards ដែលបានជ្រើសរើសសម្រាប់ការវាយតម្លៃពានរង្វាន់ជាគោលដៅទេសចរណ៍វប្បធម៌ឈានមុខគេនៅអាស៊ី ឆ្នាំ ២០២៣ ហើយជាការសម្រេចចុងក្រោយរបស់ World Travel Awards គឺសម្រេចប្រគល់ពានរង្វាន់នេះដល់ប្រទេសកម្ពុជា។
ទន្ទឹមគ្នានេះដែរ World Travel Awards ក៏បានសម្រេចផ្តល់ពានរង្វាន់គោលដៅទេសចរណ៍យុវជនឈានមុខគេរបស់អាស៊ី ២០២៤ ផងដែរ ដែលកម្ពុជាជាប្រទេសមួយស្ថិតក្នុងចំណោមប្រទេស៣ផ្សេងទៀតរួមមាន ឡាវ ថៃ និងវៀតណាម។
លោក តុប សុភ័ក អ្នកនាំពាក្យក្រសួងទេសចរណ៍ បានប្រាប់ឱ្យដឹងនៅថ្ងៃទី ២៨ ខែកុម្ភៈថា ចំពោះពានរង្វាន់គោលដៅទេសចរណ៍វប្បធម៌ឈានមុខគេនៅអាស៊ី កម្ពុជាទទួលបាន ២ ឆ្នាំជាប់ៗគ្នា គឺឆ្នាំ ២០២២ និង ២០២៣) តាមរយៈការបោះឆ្នោតរបស់អ្នកធ្វើដំណើរជាច្រើននៅជុំវិញពិភពលោក។
ស្រដៀងគ្នានេះដែរ លោក តាំង សុចិត្រគ្រឹស្នា ប្រធានមន្ទីរទេសចរណ៍ខេត្តព្រះសីហនុ បានឱ្យដឹងថា ការដែលកម្ពុជាទទួលបានពានរង្វាន់នេះ ព្រោះកម្ពុជាទទួលបានការវាយតម្លៃ ពីអ្នកធ្វើដំណើរ និងភ្ញៀវទេសចរ ដែលបានមកលេងកម្សាន្តនៅតាមគោលដៅទេសចរណ៍របស់កម្ពុជា ជាពិសេសទីតាំងគោលវប្បធម៌ ដូចនៅខេត្តសៀមរាបជាដើម។
លោក តាំង សុចិត្រគ្រឹស្នា បានបញ្ជាក់ថា ពានរង្វាន់ដែលកម្ពុជាទទួលបាននេះ នឹងជួយបង្កើនការផ្សព្វផ្សាយពីកម្ពុជា និងទាក់ទាញភ្ញៀវទេសចរកាន់តែច្រើនថែមទៀតឱ្យមកលេងកម្សាន្ត និងវិនិយោគនៅកម្ពុជា ជាពិសេសនឹងធ្វើឱ្យគេស្គាល់កម្ពុជាបានមួយកម្រិតថែមទៀត។
លោកបានថ្លែងថា៖ «ពានរង្វាន់នេះ វានឹងជួយផ្សព្វផ្សាយ និងទាក់ទាញភ្ញៀវទេសចរ និងវិនិយោគផ្សេងៗ ឱ្យចូលមកកម្ពុជា»។
នៅក្នុងសារលិខិតរបស់លោកនាយករដ្ឋមន្ត្រី ហ៊ុន ម៉ាណែត នាទិវាជាតិទីក្រុងស្អាត លើកទី១២ ឆ្នាំ ២០២៤ កាលពីថ្ងៃទី ២៧ ខែកុម្ភៈ បានលើកឡើងថា ដោយមើលឃើញពីការរួមចំណែកយ៉ាងសំខាន់នៃវិស័យទេសចរណ៍ក្នុងការអភិវឌ្ឍសេដ្ឋកិច្ច សង្គម រាជរដ្ឋាភិបាលនីតិកាលទី៧ បានបន្តកំណត់វិស័យទេសចរណ៍ជាវិស័យអាទិភាព នៅក្នុងយុទ្ធសាស្ត្រ បញ្ចកោណដំណាក់កាលទី១។
យោងតាមស្ថិតិទេសចរណ៍នៃក្រសួងទេសចរណ៍បានឱ្យដឹងថា ក្នុងឆ្នាំ ២០២៣ ព្រះរាជាណាចក្រកម្ពុជាទទួលបានអ្នកទេសចរអន្តរជាតិចំនួនជាង ៥ លាន ៤៥ ម៉ឺននាក់ ដែលកើនឡើងចំនួន ១៣៩,៥% ចំណែកទេសចរជាតិមានចំនួនជាង ១៨ លាន ៧៤ ម៉ឺននាក់ បានកើនឡើង ៣៤,៥%៕
