កិច្ចប្រជុំរដ្ឋមន្ត្រីការបរទេសអាស៊ាន-សហភាពអឺរ៉ុប លើកទី២៤ និងវេទិកាថ្នាក់រដ្ឋមន្ត្រីសហភាពអឺរ៉ុប-តំបន់ឥណ្ឌូប៉ាស៊ីហ្វិក លើកទី៣ នៅទីក្រុងប្រ៊ុចសែល ប្រទេសបែលហ្ស៊ិក កាលពីថ្ងៃទី១-២ ខែកុម្ភៈ ឆ្នាំ២០២៤។ រូបថត MFAIC
កម្ពុជាតាមរយៈលោកសុខ ចិន្តាសោភា រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានបង្ហាញការប្តេជ្ញាចិត្តពង្រឹងភាពជាដៃគូយុទ្ធសាស្ត្រអាស៊ាន-សហភាពអឺរ៉ុប ផ្អែកលើការគោរព យោគយល់ និងការផ្តល់ផលប្រយោជន៍ដល់គ្នាទៅវិញទៅមក ដើម្បីធានាឱ្យទំនាក់ទំនងរវាងភាគីទាំង២ ឈានឡើងបន្ថែមទៀត។
ការប្តេជ្ញាចិត្តរបស់រដ្ឋមន្ត្រីការបរទេសកម្ពុជា ធ្វើឡើងតាមរយៈកិច្ចប្រជុំរដ្ឋមន្ត្រីការបរទេសអាស៊ាន-សហភាពអឺរ៉ុប លើកទី២៤ និងវេទិកាថ្នាក់រដ្ឋមន្ត្រីសហភាពអឺរ៉ុប-តំបន់ឥណ្ឌូប៉ាស៊ីហ្វិក លើកទី៣ នៅទីក្រុងប្រ៊ុចសែល ប្រទេសបែលហ្ស៊ិក កាលពីថ្ងៃទី១-២ ខែកុម្ភៈ ឆ្នាំ២០២៤។ នេះបើយោងតាមសេចក្តីប្រកាសព័ត៌មានស្តីពីលទ្ធផលនៃកិច្ចប្រជុំ នៃក្រសួងការបរទេសនៅថ្ងៃទី៤ ខែកុម្ភៈ។
សេចក្តីប្រកាសព័ត៌មានបានលើកឡើងថា លោកសុខ ចិន្តាសោភា បានបញ្ជាក់ពីការប្តេជ្ញាចិត្តរបស់កម្ពុជាទៅលើការពង្រឹងទំនាក់ទំនងភាពជាដៃគូយុទ្ធសាស្ត្ររវាងអាស៊ាននិងសហភាពអឺរ៉ុប ក៏ដូចជាការបន្តធ្វើការជាមួយបណ្តាសមាជិកអាស៊ាន និងសហភាពអឺរ៉ុប ដើម្បីធានាការចួលរួមកម្រិតថ្នាក់ដឹកនាំជាទៀងទាត់ ដើម្បីរុញច្រានទំនាក់ទំនងនៃតំបន់ទាំង២។
នៅចំពោះមុខការប្រណាំងប្រជែងភូមិសាស្ត្រនយោបាយ និងសន្តិសុខមិនប្រពៃណី លោកក៏បានសង្កត់ធ្ងន់ថា៖ «តំបន់ទាំង២ ត្រូវមានភាពប្រុងប្រយ័ត្ន រហ័សរហួន និងភាពធន់ តាមរយៈការរិះរកប្រភពធនធានថ្មីៗនៃកំណើន ប្រកបដោយចីរភាពនិងភាពរឹងមាំ ព្រមទាំងការពង្រឹងកិច្ចខិតខំប្រឹងប្រែង ដើម្បីរៀបចំក្របខ័ណ្ឌ និងប៉ារ៉ាម៉ែត្រ សម្រាប់កិច្ចព្រមព្រៀងពាណិជ្ជកម្មអាស៊ាន-សហភាពអឺរ៉ុបនាពេលអនាគត»។
លោករដ្ឋមន្ត្រីក៏បានថ្លែងអំណរគុណដល់ សហភាពអឺរ៉ុបដែលបន្តគាំទ្រមជ្ឈភាពអាស៊ាន និងយន្តការដឹកនាំរបស់អាស៊ាន ហើយលោកបានអំពាវនាវឱ្យតំបន់ទាំង២ ពង្រឹងការតភ្ជាប់ តាមរយៈការអនុវត្តពេញលេញនូវសេចក្តីប្រកាសរួមរដ្ឋមន្ត្រីការបរទេសអាស៊ាន-សហភាពអឺរ៉ុបស្តីពីការតភ្ជាប់។
លទ្ធផលដដែលបានបញ្ជាក់ថា៖ «រដ្ឋមន្ត្រីការបរទសអាស៊ាន និងសហភាពអឺរ៉ុប បានអះអាងជាថ្មីនូវគុណតម្លៃនិងផលប្រយោជន៍រួមក្នុងទំនាក់ទំនងដៃគូសន្ទនាអាស៊ាន-សហភាពអឺរ៉ុប ក្នុងរយៈពេល ៤៧ឆ្នាំ កន្លងមក និងបានកោតសរសើរចំពោះវឌ្ឍនភាពដ៏ល្អក្នុងការអនុវត្តផែនការសកម្មភាពអាស៊ាន-សហភាពអឺរ៉ុប(២០២៣-២០២៧)»។
ប្រមុខការទូតអាស៊ាន និងសហភាពអឺរ៉ុប ទទួលស្គាល់ថា តំបន់ទាំង២ ផ្តល់កាលានុវត្តភាពនៃកំណើន និងសក្តានុពលលើកិច្ចសហប្រតិបត្តិការក្រោមសសរស្តម្ភសហគមន៍ទាំង៣ របស់អាស៊ាន និងសហភាពអឺរ៉ុប ដែលជាទំនាក់ទំនងភាពជាដៃគូយុទ្ធសាស្ត្រ។
ក្រៅពីនេះ ភាគីទាំង២ បានផ្លាស់ប្តូរទស្សនៈលើបញ្ហាតំបន់ និងអន្តរជាតិ ដែលជាកង្វល់និងផលប្រយោជន៍រួម ព្រមទាំងបានអនុម័តសេចក្តីប្រកាសរួមរដ្ឋមន្ត្រីការបរទេសអាស៊ាន-សហភាពអឺរ៉ុបផង។
ដោយឡែក នៅក្នុងវេទិកាថ្នាក់រដ្ឋមន្ត្រីសហភាពអឺរ៉ុប-ឥណ្ឌូប៉ាស៊ីហ្វិកលើកទី៣ វិញ ប្រធានបទសំខាន់៣ ត្រូវបានលើកឡើងរួមមាន វិបុលភាពរួមគ្នា ភាពធន់នៃសេដ្ឋកិច្ចនិងការវិនិយោគអន្តរកាលបៃតង-ភាពជាដៃគូសម្រាប់អនាគតប្រកបដោយចីរភាព និងបញ្ហាប្រឈមនៃភូមិសាស្ត្រនយោបាយនិងសន្តិសុខ។
ជាមួយគ្នានេះ រដ្ឋមន្ត្រីការបរទេសកម្ពុជាក៏បានជំរុញការពង្រឹងភាពជាដៃគូ និងកិច្ចសហប្រតិបត្តិការរវាងសហភាពអឺរ៉ុប អាស៊ាន និងបណ្តាប្រទេសតំបន់ប៉ាស៊ីហ្វិក ដើម្បីឆ្លើយតបបញ្ហាប្រឈមនានា ដែលបង្កឡើងពីសង្គ្រាមរុស្ស៊ី-អ៊ុយក្រែន កូវីដ១៩ សង្គ្រាមនៅតំបន់កាហ្សា និងវិបត្តិនៅសមុទ្រក្រហម។
លោកសេង វណ្ណលី សាស្ត្រាចារ្យផ្នែកទំនាក់ទំនងអន្តរជាតិ និងជាអ្នកតាមដាននយោបាយតំបន់ លើកឡើងថា អាស៊ាន និងសហភាពអឺរ៉ុប ជាតំបន់២ ដែលលូតលាស់បំផុតនៅក្នុងពិភពលោក ដែលតំបន់ទាំង២ នឹងមានការវិវត្តទំនាក់ទំនងជាវិជ្ជមានទៅមុខ។
លោកបន្តថា អាស៊ានកំពុងមានសក្តានុពល មានស្ថិរភាពនិងស្ថានភាពសន្តិសុខល្អជាងតំបន់ផ្សេងៗទៀត ហើយអាស៊ានទៀតសោតក៏មានសក្តានុពលខ្លាំងណាស់ដែរលើផ្នែកសេដ្ឋកិច្ច ជាទីសំខាន់ដែលសហភាពអឺរ៉ុបយកចិត្តទុកដាក់។
លោកបានថ្លែងថា៖ «អាស៊ាន ជាអង្គការតំបន់ដែលសហភាពអឺរ៉ុបផ្តល់សារៈសំខាន់ខ្លាំង ខណៈប្រទេសនីមួយៗជាសមាជិកអាស៊ានសុទ្ធសឹងតែទទួលបានផលប្រយោជន៍ពីទំនាក់ទំនងនៃតំបន់ទាំង២ ទាំងវិស័យសេដ្ឋកិច្ច និងការអភិវឌ្ឍសង្គម។ ដោយឡែកកម្ពុជាទទួលផលប្រយោជន៍នានា ក្នុងវិស័យអប់រំ សន្តិសុខប្រព័ន្ធអ៊ីនធឺណិត និងពាណិជ្ជកម្ម ជាដើម»។
លោកយល់ថា ការពង្រឹងទំនាក់ទំនងរវាងអាស៊ាន និងសហភាពអឺរ៉ុប នឹងជះផលល្អដល់អាស៊ានខ្លួនឯងនៅក្នុងការបង្កើនសមត្ថភាពលើវិស័យអាទិភាពរបស់ខ្លួន ខណៈលោកមើលឃើញពីផ្លូវវិជ្ជមាននៃទំនាក់ទំនងនេះ ជាពិសេសកិច្ចសហប្រតិបត្តិការថ្នាក់រដ្ឋមន្ត្រីតាមវិស័យនីមួយៗរវាងតំបន់ទាំង២។
លោក សេង វណ្ណលី បន្ថែមថា សហភាពអឺរ៉ុបជាដៃគូមិនអាចខ្វះបានរបស់អាស៊ាន ហើយសហភាពអឺរ៉ុបជាតំបន់គំរូសម្រាប់អាស៊ានយកគំរូតាមលើការធ្វើសមាហរណកម្មសេដ្ឋកិច្ច សង្គម និងនយោបាយ ខណៈអាស៊ានក៏កំពុងព្យាយាមសិក្សាតាមផងដែរ។
សូមជម្រាបថា នៅក្នុងកិច្ចប្រជុំរដ្ឋមន្ត្រីការបរទេសអាស៊ានលើកទី២៤ និងវេទិកាថ្នាក់រដ្ឋមន្ត្រីសហភាពអឺរ៉ុប-តំបន់ឥណ្ឌូប៉ាស៊ីហ្វិក លើកទី៣ នេះដែរ លោកសុខ ចិន្តាសោភា បានជួបពិភាក្សាទ្វេភាគីជាមួយរដ្ឋមន្ត្រីការបរទេសឆែក, ឡេតូនី, ហុងគ្រី, តំណាងជាន់ខ្ពស់សហភាពអឺរ៉ុបទទួលបន្ទុកកិច្ចការបរទេស និងគោលនយោបាយសន្តិសុខ ព្រមទាំងជាអនុប្រធានគណៈកម្មការអឺរ៉ុបផង, ស្នងការអឺរ៉ុបទទួលបន្ទុកភាពជាដៃគូអន្តរជាតិ, រដ្ឋមន្ត្រីការបរទេសបែលហ្ស៊ិក, បារាំង និងលុចសំបួ ព្រមទាំងឯកអគ្គរាជទូតជប៉ុនប្រចាំប្រទេសបែលហ្ស៊ិកផងដែរ៕
