កម្មករកំពុងធ្វើការក្នុងសិប្បកម្មកែច្នៃគ្រាប់ស្វាយចន្ទី១កន្លែងក្នុងខេត្តកំពង់ធំពីខែវិច្ឆិកាឆ្នាំមុន។ ហុង មិនា
ភ្នំពេញៈ សមាគមស្វាយចន្ទីកម្ពុជា (ស.ស.ក) បានចុះអនុស្សរណៈនៃការយោគយល់គ្នា (MoU) ជាមួយសម្ព័ន្ធអ្នកដាំដុះស្វាយចន្ទីនៅតំបន់អាហ្រ្វិក (The African Cashew Alliance) ដើម្បីជំរុញកិច្ចសហប្រតិបត្តិការលើការដាំដុះ និងរកទីផ្សារ ក្នុងនាមជាប្រទេសអ្នកផលិតគ្រាប់ស្វាយចន្ទីច្រើនជាងគេរបស់ពិភពលោក។
លោក ស៊ុយ កុកធាន អនុប្រធានសមាគមស្វាយចន្ទីកម្ពុជា បានប្រាប់ឱ្យដឹងនៅថ្ងៃទី ៤ ខែកុម្ភៈ ឆ្នាំ ២០២៤ ថា អនុស្សរណៈនៃការយោគយល់គ្នា បានធ្វើឡើងកាលពីថ្ងៃទី ៣ ខែកុម្ភៈ ពោលគឺថ្ងៃចុងក្រោយនៃការបញ្ចប់សន្និសីទស្វាយចន្ទីពិភពលោក នៅខេត្តសៀមរាប។
លោកបានឱ្យដឹងបន្ថែមថា ការចុះ MoU នេះ ភាគីទាំង ២ មានគោលបំណងជំរុញកិច្ចសហប្រតិបត្តិការ ក្នុងសកម្មភាពមួយចំនួនដូចជា៖ ការផ្លាស់ប្តូរការសិក្សារវាងប្រទេសផលិតគ្រាប់ស្វាយចន្ទីនៃទ្វីបអាហ្រ្វិក និងកម្ពុជា,ការជួយសម្រួលដល់ការចូលទៅកាន់កសិដ្ឋាន និងកន្លែងកែច្នៃក្នុងប្រទេសរៀងៗខ្លួន,ការចូលរួមក្នុងវេទិកាសិក្សា និងសន្និសីទដែលរៀបចំដោយស្ថាប័នទាំង ២។
លោកបានលើកឡើងទៀតថា ជួយបណ្តុះបណ្តាល ឬអ្នកសិក្សានៅក្នុងកម្មវិធីបណ្តុះបណ្តាលឧស្សាហកម្មដែលរៀបចំដោយស្ថាប័នទាំង ២, ការសម្របសម្រួលការផ្លាស់ប្តូរការស្រាវជ្រាវជាមួយគ្នា, ការរៀបចំវគ្គបណ្តុះបណ្តាលរយៈពេលខ្លី និងរយៈពេលវែង សិក្ខាសាលា និងការបង្រៀន ព្រមទាំងការប្រជុំវិទ្យាសាស្ត្រ និងបច្ចេកទេស និងការផ្លាស់ប្តូរអ្នកជំនាញ និងអ្នកបច្ចេកទេស រវាងគ្នាជាដើម។
លោក ស៊ុយ កុកធាន បញ្ជាក់ថា៖ «សម្ព័ន្ធអ្នកដាំដុះស្វាយចន្ទីនៅតំបន់អាហ្រ្វិកគឺជាសម្ព័ន្ធដ៏ធំមួយ ដែលក្រោយពីការចុះ MoU នេះ ភាគីទាំង ២ នឹងបន្តពិភាក្សាឱ្យកាន់តែស៊ីជម្រៅក្នុងការជួយឱ្យកសិករដែលដាំដុះស្វាយចន្ទីនៃភាគីទាំង ២ យល់ដឹងពីបច្ចេកទេស ដើម្បីផ្គត់ផ្គង់ទៅឱ្យប្រទេសដែលជាអ្នកកែច្នៃ ដូចជាវៀតណាម និងឥណ្ឌាជាដើម»។
ចំពោះលទ្ធផលដែលកម្ពុជា និងអ្នកនៅក្នុងវិស័យស្វាយចន្ទី ទទួលបានពីសន្និសីទស្វាយចន្ទីពិភពលោក ក្នុងរយៈពេល ៣ ថ្ងៃកន្លងទៅនេះ លោក កុកធាន បានប្រាប់ឱ្យដឹងថា នាសន្និសីទស្វាយចន្ទីនៅឆ្នាំមុន គេគ្រាន់តែបានឮពីកិត្តិនាម នៃស្វាយចន្ទីរបស់កម្ពុជា តែឆ្នាំនេះ ប្រតិភូប្រមាណ ៤០ ប្រទេស ដែលមានប្រមាណជាង ៥០០ នាក់ បានមកឃើញដោយផ្ទាល់ពីពូជស្វាយចន្ទី M23 របស់កម្ពុជាថា ពិតជាមានគ្រាប់ធំៗ និងគុណភាពល្អប្រាកដមែន។
លោកបានបញ្ជាក់ថា៖ «សមាគមបានធ្វើបទបង្ហាញពីការលើកទឹកចិត្តដល់វិនិយោគិនបរទេសទាំងនោះ ដើម្បីឱ្យគិតគូរពិចារណាជ្រើសរើសកម្ពុជាសម្រាប់វិនិយោគលើការកែច្នៃ ខណៈដែលក្រុមការងារក៏បាននាំគណៈប្រតិភូទៅទស្សនានៅចម្ការស្វាយចន្ទីដោយផ្ទាល់ផងដែរ។ នេះគឺជាអត្ថប្រយោជន៍មួយដ៏ធំណាស់នៅក្នុងការអភិវឌ្ឍវិស័យស្វាយចន្ទីនៅកម្ពុជាយើងនៅលើឆាកអន្តរជាតិ»។
លោក ស៊ុយ កុកធាន បញ្ជាក់ដែរថា កម្ពុជាចំណេញច្រើនមែនទែនពីសន្និសីទនេះ ក្នុងការផ្សព្វផ្សាយពីសក្តានុពលស្វាយចន្ទីរបស់កម្ពុជាទៅកាន់ពិភពលោក ខណៈកម្ពុជា បានចាប់យកចំណែកទីផ្សារគ្រាប់ស្វាយចន្ទីឆៅប្រមាណ ២០ ភាគរយនៅលើពិភពលោក បន្ទាប់ពី Ivory Coast និងឥណ្ឌា។
លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម បានឱ្យដឹងថា សន្និសីទស្វាយចន្ទីពិភពលោក មានសារៈសំខាន់ណាស់សម្រាប់កម្ពុជា ក្នុងការបង្ហាញពីសក្តានុពលស្វាយចន្ទីកម្ពុជាទៅកាន់ពិភពលោក ព្រោះថា យ៉ាងហោចណាស់ វាបានធ្វើឱ្យពិភពលោក បានស្គាល់ពីសក្តានុពលស្វាយចន្ទីកម្ពុជា ហើយពួកគាត់អាចងាកមករកតំបន់ប្រទេសដែលជាម្ចាស់ នៃផលិតផលវត្ថុធាតុដើមស្វាយចន្ទី។
លោកបានបញ្ជាក់ទៀតថា៖ «សន្និសីទនេះ បានប្រមូលផ្តុំអ្នកពាក់ព័ន្ធក្នុងវិស័យស្វាយចន្ទីទាំងក្នុងស្រុក និងអន្តរជាតិ ដើម្បីពិភាក្សាចែករំលែកបទពិសោធន៍ សម្រាប់ជំរុញវិស័យស្វាយចន្ទី ស្វែងរកទីផ្សារក្នុងតំបន់ និងពិភពលោករួមនឹងការដាក់តាំងពិព័រណ៍ និងការកសាងបណ្តាញវិស័យស្វាយចន្ទីលើពិភពលោក»។
បើតាមរបាយការណ៍ពីក្រសួងកសិកម្ម រុក្ខាប្រមាញ់ និងនេសាទ កម្ពុជាមានផ្ទៃដីដាំដុះស្វាយចន្ទីប្រមាណ ៤៧២ ៩៤៦ ហិកតា និងទទួលបានទិន្នផលសរុបចំនួន ៧០៩ ៤១៩ តោន ចំណែកឯការនាំចេញគ្រាប់ស្វាយចន្ទីឆៅទៅទីផ្សារអន្តជាតិបានចំនួនប្រមាណ ៦៥៦ ០០០ តោន ទៅកាន់ប្រទេស ចិន ជប៉ុន បង់ក្លាដែស ឥណ្ឌា វៀតណាម និងថៃ និងគ្រាប់ស្វាយចន្ទីកែច្នៃត្រូវបានបញ្ជូនទៅកាន់ប្រទេសចិន សាធារណរដ្ឋឆែក ជប៉ុន កូរ៉េខាងត្បូង ហូឡង់ វៀតណាម និងសហរដ្ឋអាមេរិក៕
