ទិដ្ឋភាពសាលាដំបូងខេត្ដកំពតនាពេលបច្ចុប្បន្ន។ រូបថត ហ្វេសប៊ុក
ភ្នំពេញៈ រយៈពេល ២៣ ថ្ងៃ សាលាដំបូងរាជធានី-ខេត្ត ទូទាំងប្រទេសបានដោះស្រាយរួចរាល់នូវសំណុំរឿងអត្រានុកូលដ្ឋានបានចំនួនសរុប ៤៧,២០ ភាគរយនៃសំណុំរឿង ខណៈប្រធានសាលាឧទ្ធរណ៍ភ្នំពេញ ជំរុញឱ្យអនុប្រធាន ចៅក្រម និងក្រឡាបញ្ជី ត្រូវកំណត់កាលបរិច្ឆេទជំនុំជម្រះឱ្យបានឆាប់រហ័សលើសំណុំរឿងក្តី បទល្មើសគ្រឿងញៀន បទល្មើសចរាចរណ៍ និងរឿងក្ដីអត្រានុកូលដ្ឋាន។
យោងតាមក្រុមការងារព័ត៌មាននិងទំនាក់ទំនងសាធារណៈនៃគណៈបញ្ជាការដឹកនាំយុទ្ធនាការជំរុញនិងពន្លឿនការដោះស្រាយរឿងក្តីនៅតាមតុលាការនិងយុទ្ធនាការត្រួតពិនិត្យនិងដោះស្រាយភាពមិនប្រក្រតីនៅតាមតុលាការនៃក្រសួងយុត្តិធម៌ កាលពីថ្ងៃទី ៣ ខែកុម្ភៈ បានឱ្យដឹងថា សំណុំរឿងអត្រានុកូលដ្ឋាននៅសាលាដំបូងរាជធានី-ខេត្ត នៅមុនពេលមានយុទ្ធនាការសរុបមានចំនួន ៦ ៨៥០ សំណុំរឿង។
ប្រភពដដែលបានឱ្យដឹងដែរថា សំណុំរឿងចូលថ្មីក្រោយពេលប្រកាសបើកយុទ្ធនាការទាំង ២ ខាងលើ គិតត្រឹមថ្ងៃទី ៣១ ខែមករា ឆ្នាំ ២០២៤ មានចំនួនសរុប ១ ៨៨០ សំណុំរឿង ដោយសរុបទាំងអស់មានចំនួន ៨ ៧៣០ សំណុំរឿង។
ក្រសួងយុត្តិធម៌បានឱ្យដឹងទៀតថា៖ «រយៈពេល ២៣ ថ្ងៃ បន្ទាប់ពីថ្ងៃប្រកាសបើកយុទ្ធនាការសាលាដំបូងរាជធានី-ខេត្ត ទូទាំងប្រទេស បានដោះស្រាយរួចរាល់នូវសំណុំរឿងអត្រានុកូលដ្ឋានបានចំនួនសរុប ៤៧,២០ ភាគរយនៃសំណុំរឿងសរុបនៅទូទាំងប្រទេស»។
តាមរយៈយុទ្ធនាការចំនួន ២ នោះគឺផ្តល់អាទិភាពលើការពន្លឿនដំណោះស្រាយសំណុំរឿងចំនួន ៣ គឺការពន្លឿននីតិវិធីទៅលើសំណុំរឿងអត្រានុកូលដ្ឋាន គ្រឿងញៀន និងសំណុំរឿងគ្រោះថ្នាក់ចរាចរណ៍។
ជុំវិញលទ្ធផលនៃការដោះស្រាយសំណុំរឿងនេះ លោក អំ សំអាត នាយកទទួលបន្ទុកកិច្ចការទូទៅនៃអង្គការលីកាដូ បានប្រាប់នៅថ្ងៃទី ៤ ខែកុម្ភៈថា បើយោងតាមរបាយការណ៍លទ្ធផលដែលឃើញមុនគេគឺការពន្លឿនសំណុំរឿងអត្រានុកូលដ្ឋាន ជាអ្វីដែលលោកចាត់ទុកថា ជាសំណុំរឿងចាំបាច់សម្រាប់ជីវភាពរស់នៅប្រចាំថ្ងៃរបស់ប្រជាជាពលរដ្ឋ។
យ៉ាងណាក្ដី លោកបានលើកឡើងថា ការពន្លឿនលើសំណុំរឿងទាំង ៣ នេះក៏នៅមិនទាន់ធ្វើឱ្យមានភាពល្អប្រសើរសម្រាប់សាលាដំបូងរាជធានី ខេត្តនៅឡើយទេ តែគួរពន្លឿនលើគ្រប់សំណុំរឿងទាំងអស់ដែលពលរដ្ឋរង់ចាំភាពយុតិ្តធម៌ ទោះបីជាសំណុំរឿងទាំង ៣ នោះចាំបាច់ ប៉ុន្តែសំណុំរឿងផ្សេងទៀតគួរតែមានការជំនុំជម្រះឱ្យបានលឿនដូចគ្នាផងដែរ។
លោកបាននិយាយថា៖ «តុលាការ ដើម្បីឱ្យមានជំនឿទុកចិត្តពីប្រជាពលរដ្ឋទាល់តែតុលាការចាត់ការតាមនីតិវិធីឱ្យបានលឿនដែលអាចធ្វើទៅបានដើម្បីឱ្យប្រជាពលរដ្ឋមានជំនឿទុកចិត្ត និងទទួលបានភាពយុត្តិធម៌លើភាគីពាក់ព័ន្ធក៏ដូចជាធានាភាពស្មើគ្នាចំពោះមុខច្បាប់ និងយុត្តិធម៌នៅក្នុងសង្គម»។
លោក អំ សំអាត បានបញ្ជាក់បន្ថែមថា អង្គការសង្គមស៊ីវិលនៅតែទាមទារ និងជំរុញឱ្យរាជរដ្ឋាភិបាលធ្វើកំណែទម្រង់ប្រព័ន្ធច្បាប់ និងប្រព័ន្ធតុលាការដោយធ្វើយ៉ាងម៉េចឱ្យមានឯករាជ្យដែលអាចរក្សាបានភាពស្មើគ្នាចំពោះមុខច្បាប់ និងលុបបំបាត់ភាពមិនប្រក្រតី។
ក៏ប៉ុន្ដែសម្រាប់លោក យង់ ពៅ អគ្គលេខាធិការរាជបណ្ឌិត្យសភាកម្ពុជា និងជាអ្នកតាមដានព្រឹត្តិការណ៍សង្គម បានថ្លែងថា តាមការកត់សម្គាល់ឃើញថា ការដាក់ចេញយុទ្ធនាការទាំងនេះពិតជាមានប្រសិទ្ធភាពដែលក្រសួងបានដាក់គោលដៅពន្លឿនការដោះស្រាយបញ្ហាជូនប្រជាពលរដ្ឋ។
លោកបន្តថា ការដោះស្រាយសំណុំឯកសារដែលមានសារៈសំខាន់សម្រាប់ការប្រើប្រាស់ក្នុងជីវភាពសង្គមប្រចាំថ្ងៃរបស់ប្រជាពលរដ្ឋ។
លោកបានបញ្ជាក់ថា៖ «ព្រោះពលរដ្ឋត្រូវការយកអត្រានុកូលដ្ឋានទៅប្រើប្រាស់ផ្សេងជាចាំបាច់បំផុត ដូច្នេះប្រសិនបើមានការជាប់គាំងសំណុំរឿងអត្រានុកូលដ្ឋានរាប់ពាន់សំណុំរឿងដូចកន្លងមកវាធ្វើឱ្យអាក់ខានដំណើរសង្គមកិច្ច និងសេដ្ឋកិច្ចសង្គមរបស់ពលរដ្ឋនៅមូលដ្ឋាន»។
ជុំវិញលទ្ធផលនេះដែរ លោក យង់ ពៅ បានចូលរួមសាទរ និងលើកទឹកចិត្តឱ្យដោះស្រាយកិច្ចការអត្រានុកូលដ្ឋានឱ្យបានលឿនរហ័ស បន្ថែមទៀត។ដើម្បីចូលរួមចំណែកដោះស្រាយរឿងក្ដីឱ្យបានឆាប់រហ័សនិងមានប្រសិទ្ធភាព ធានាបានគោលការណ៍យុត្តិធម៌ ប្រធានសាលាឧទ្ធរណ៍ភ្នំពេញ លោក សេង ស៊ីវុត្ថា បានជំរុញទៅកាន់អនុប្រធានសាលាឧទ្ធរណ៍ ចៅក្រម និងក្រឡាបញ្ជីឱ្យខិតខំពន្លឿនការដោះស្រាយសំណុំរឿងឱ្យបានឆាប់រហ័ស។ នេះបើយោងតាមលិខិតរបស់លោក សេង ស៊ីវុត្ថា ចុះថ្ងៃទី ២ ខែកុម្ភៈ ឆ្នាំ ២០២៤។
លោកបានសង្កត់ធ្ងន់ថា៖ «សូមអនុប្រធានសាលាឧទ្ធរណ៍ និងចៅក្រមទទួលបន្ទុកសំណុំរឿងបទល្មើសគ្រឿងញៀនមុនឆ្នាំ ២០២៤ ដាក់កម្មវិធីជំនុំជម្រះឱ្យបានចប់សព្វគ្រប់នៅត្រឹមខែមីនា ឆ្នាំ ២០២៤»៕
