គ.ជ.ប បើកវគ្គបណ្ដុះបណ្ដាលដល់គណបក្សនយោបាយ មន្ត្រី គ.ជ.ប និងភាគីពាក់ព័ន្ធនឹងការបោះឆ្នោត។ រូបថត NEC
បន្ទាប់ពីបានដាក់ឱ្យដំណើរការប្រកបដោយជោគជ័យក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ និងការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ កម្មវិធីរៀបចំបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ ត្រូវបានដាក់ឱ្យប្រើប្រាស់ជាថ្មីទៀតសម្រាប់ការបោះឆ្នោតជ្រើសរើសក្រុមប្រឹក្សា អាណត្តិទី៤ ឆ្នាំ២០២៤ នេះ។
នេះជាការថ្លែងឱ្យដឹងតាមរយៈលោក កែ រឹទ្ធិ អគ្គលេខាធិការរងគណៈកម្មាធិការជាតិរៀបចំការបោះឆ្នោត (គ.ជ.ប) ក្នុងពិធីបិទវគ្គបណ្ដុះបណ្ដាលដល់គណបក្សនយោបាយ មន្ត្រី គ.ជ.ប និងភាគីពាក់ព័ន្ធនឹងការបោះឆ្នោត ស្ដីពីរបៀបប្រើប្រាស់កម្មវិធីរៀបចំបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ កាលពីថ្ងៃទី៥ ខែកុម្ភៈ ឆ្នាំ២០២៤។
យោងតាមសេចក្តីប្រកាសព័ត៌មានរបស់គ.ជ.បបានឱ្យដឹងដែរថា ពាក់ព័ន្ធនឹងការធ្វើទំនើបកម្មការងារបោះឆ្នោតនេះ គ.ជ.ប បានចេញសេចក្ដីសម្រេចដាក់ឱ្យប្រើប្រាស់ប្រព័ន្ធបច្ចេកវិទ្យា ក្នុងដំណើរការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ អាណត្តិទី៤ ឆ្នាំ២០២៤ ដែលមានកម្មវិធី ចំនួន ៣។
សេចក្តីប្រកាសបន្តថា កម្មវិធីទាំងនោះរួមមាន៖កម្មវិធីគ្រប់គ្រងការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ, កម្មវិធីត្រួតពិនិត្យ ផ្ទៀងផ្ទាត់ និងបូកសរុបលទ្ធផលនៃការបោះឆ្នោតនិងកម្មវិធីគ្រប់គ្រងសំណុំរឿង និងរបាយការណ៍ពាក់ព័ន្ធនឹងពាក្យបណ្តឹង។
ទាក់ទងនឹងកម្មវិធីនេះដែរ លោក កែ រឹទ្ធិ បានបញ្ជាក់ថា៖«ការដាក់ឱ្យប្រើប្រាស់កម្មវិធីរៀបចំបញ្ជីគណបក្ស គឺដើម្បីផ្ដល់ភាពងាយស្រួល និងបញ្ចៀសនូវកំហុសឆ្គងមួយចំនួន ដូចជា បេក្ខជនខុសឈ្មោះ និងទិន្នន័យ, មិនគ្រប់អាយុសម្រាប់ការឈរឈ្មោះ, ឈរឈ្មោះច្រើនជាងមួយគណបក្សនយោបាយ, ឈរឈ្មោះច្រើនមណ្ឌល និងបេក្ខជនមិនបានអនុវត្តសិទ្ធិបោះឆ្នោតសម្រាប់ការបោះឆ្នោតជាសកលលើកចុងក្រោយជាដើម»។
លោកបានបន្ថែមថា គណបក្សនយោបាយអាចរៀបចំការចុះបញ្ជីដោយដៃ ឬតាមកម្មវិធីប្រព័ន្ធកុំព្យូទ័រដែលដាក់ឱ្យដំណើរការនេះក៏បាន។
បើតាម លោក កែ រឹទ្ធិ គណបក្សនយោបាយដែលមានបំណងបង្កើតគណនីប្រើប្រាស់កម្មវិធីរៀបចំការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះនេះ ត្រូវដាក់ពាក្យស្នើសុំមក គ.ជ.ប ចាប់ផ្ដើមពីថ្ងៃទី១ដល់ថ្ងៃទី២៧ ខែកុម្ភៈ។ដោយឡែក កាលបរិច្ឆេទនៃការដាក់ និងការទទួលពាក្យសុំចុះបញ្ជីគណបក្សនយោបាយសម្រាប់ការបោះឆ្នោតជ្រើសរើសក្រុមប្រឹក្សា អាណត្តិទី៤ ឆ្នាំ២០២៤ ចាប់ពីថ្ងៃទី២ ដល់ថ្ងៃទី៦ ខែមីនា ឆ្នាំ២០២៤ នៅតាមគណៈកម្មការ រាជធានី ខេត្តរៀបចំការបោះឆ្នោត (គធ.ខប)។
លោក លី សុធារ៉ាយុត្តិ អគ្គលេខាធិការគណបក្សភ្លើងទៀន បានប្រាប់ឱ្យដឹងនៅថ្ងៃទី៦ ខែកុម្ភៈថា ការរៀបចំបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ សម្រាប់ការបោះឆ្នោត ក្នុងទម្រង់ណាមួយនោះ មិនជាសំខាន់ទេ ប៉ុន្តែអ្វីដែលសំខាន់ គឺគណបក្សនយោបាយនីមួយៗ ត្រូវទទួលព័ត៌មានឱ្យបានច្បាស់ពីគ.ជ.ប។
លោកបានថ្លែងថា៖ «សម្រាប់ខ្ញុំ ខ្ញុំយល់ថាមិនជាបញ្ហាទេ ប៉ុន្តែអ្វីដែលសំខាន់គណបក្សនយោបាយនីមួយៗ ត្រូវទទួលបានព័ត៌មានច្បាស់លាស់ រួមទាំងសេចក្តីណែនាំច្បាស់លាស់ពីគណៈកម្មាធិការជាតិរៀបចំការបោះឆ្នោត ព្រោះនៅពេលទទួលបានព័ត៌មានច្បាស់មុនកាលបរិច្ឆេទគឺជារឿងសំខាន់ ដើម្បីឱ្យគណបក្សនយោបាយនីមួយៗ មានពេលវេលាគ្រាប់គ្រាន់ក្នុងការស្វែងយល់ និងអនុវត្តទៅតាមសេចក្តីណែនាំរបស់គ.ជ.ប»៕
