កុមារកំពុងលេងនៅមជ្ឈមណ្ឌលថែទាំកុមារក្នុងសហគមន៍ចំបក់មាស កាលពីថ្មីៗនេះ។ រូប សហការី
ភ្នំពេញៈមន្ត្រីជាន់ខ្ពស់ក្រសួងការងារ និងបណ្តុះបណ្តាលវិជ្ជាជីវៈបានឱ្យដឹងថា ក្រសួងនឹងសហការជាមួយស្ថាប័នពាក់ព័ន្ធ ដើម្បីបង្កើតទារកដ្ឋាន និងមត្តេយ្យសិក្សាសហគមន៍នៅគ្រប់តំបន់សេដ្ឋកិច្ចពិសេស និងជិតបណ្តារោងចក្រនៅទូទាំងប្រទេសដើម្បីផ្តល់ភាពងាយស្រួលសម្រាប់កម្មការិនីដែលមានកូនតូចបំពេញការងារ។
លោក កត្តា អ៊ន អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានលើកឡើងនៅក្នុងកិច្ចពិភាក្សាមួយកាលពីថ្ងៃទី៥ ខែកុម្ភៈថា សម្រាប់ឆ្នាំ២០២៤-២០២៥ ក្រសួងការងារ នឹងសហការជាមួយក្រសួងកិច្ចការនារី ក្រសួងអប់រំ យុវជន និងកីឡា ភាគីនិយោជក និងកម្មករនិយោជិត ដើម្បីពិភាក្សាគ្នាជំរុញឱ្យមានការបង្កើតទារកដ្ឋាន និងមត្តេយ្យសហគមន៍នៅតាមតំបន់រោងចក្រ។
លោកបានបញ្ជាក់ថា៖«យើងចង់ឱ្យភាគីទាំងពាក់ព័ន្ធទាំងអស់រួមគ្នាបង្កើតទារកដ្ឋាននិងមត្តេយ្យសហគមន៍នៅក្បែរតំបន់រោងចក្រ ក្បែរតំបន់សេដ្ឋកិច្ចពិសេសដើម្បីងាយស្រួល ហើយអាចឱ្យកម្មករ កម្មការិនីដែលមានកូនក្នុងបន្ទុកបានផ្ញើកូន ថែទាំក្នុងទារកដ្ឋាន ដែលអាចឱ្យពួកគាត់មានអារម្មណ៍ល្អក្នុងការបំពេញការងារ ដោយសារមានអ្នកទទួលខុសត្រូវខ្ពស់ដូចជា ចំណីអាហារ មានការអប់រំជាដើម»។
មន្ត្រីអ្នកនាំពាក្យក្រសួងការងារដដែលបានបន្ថែមថា ក្រសួងចង់ឱ្យមានទារកដ្ឋានដើម្បីមើលកូនៗកម្មករកម្មការិនី ហើយមត្តេយ្យសិក្សាសហគមន៍វិញសម្រាប់កូនៗពួកគាត់ចូលរៀន ដែលជាហេតុទាមទារឱ្យមានការចូលរួមពីគ្រប់ភាគីពាក់ព័ន្ធ ជាពិសេសភាគីនិយោជកក្នុងការទទួលខុសត្រូវលើបញ្ហានេះ។
ជុំវិញរឿងនេះប្រធានសម្ព័ន្ធសហជីពជាតិ លោក ហ្វា សាលី បានគាំទ្រចំពោះរាជរដ្ឋាភិបាលដែលផ្តួចផ្តើមឱ្យមានការបង្កើតអគារទារកដ្ឋាន និងមត្តេយ្យសិក្សាសហគមន៍នៅតំបន់រោងចក្រ និងតំបន់សេដ្ឋកិច្ចពិសេសនៅទូទាំងប្រទេសនេះ ខណៈនៅក្នុងច្បាប់ស្តីពីការងារក៏បានចែងស្រាប់ជុំវិញការបង្កើតឱ្យមានកន្លែងថែទាំសម្រាប់កូនៗកម្មកររោងចក្រនេះដែរ។
លោកបានថ្លែងថា៖«កន្លងមក ទោះជាច្បាប់បានចែងឱ្យបង្កើតទារកដ្ឋាននៅកន្លែងការងារ តែមិនទាន់បានអនុវត្តពេញលេញនៅឡើយទេ ព្រោះនៅតែឃើញម្តាយជាច្រើននៅតែមានការលំបាកក្នុងការយកកូនមកដាក់នៅទារកដ្ឋាន ហើយក៏ឃើញម្តាយជាច្រើនតែងតែយកកូនរបស់ពួកគាត់ទៅឱ្យក្រុមគ្រួសារនៅស្រុកកំណើតមើលថែជំនួស ហេតុនេះការបង្កើតឱ្យមានទារកដ្ឋានគឺជារឿងសំខាន់»។
លោកបានបន្ថែមដែរថា ប្រទេសជាតិមួយ ចាំបាច់ត្រូវមានទារកដ្ឋានក្នុងវិស័យឧស្សាហកម្មកាត់ដេរសម្លៀកបំពាក់ កាបូប និងគ្រឿងអេឡិចត្រូនិកសម្រាប់កម្មករកម្មការិនី ប៉ុន្តែទន្ទឹមនឹងនេះ លោកក៏ជំរុញឱ្យមានការគិតគូរលើការបង្កើនប្រាក់ឈ្នួលស្នូលឱ្យបានខ្ពស់ ការផ្តល់អាហារសមរម្យ ការផ្តល់មធ្យោបាយធ្វើដំណើរងាយស្រួល ដែលជួយឱ្យពួកគាត់មានលទ្ធភាពផ្គត់ផ្គង់កូនៗនិងក្រុមគ្រួសារកាន់តែប្រសើរ។
បើតាមក្រសួងការងារ រហូតមកទល់ពេលនេះ នៅកម្ពុជាមានអគារទារកដ្ឋានចំនួន១៣ នៅទូទាំងប្រទេស ក្នុងនោះមាននៅខេត្តកំពង់ស្ពឺចំនួន ១០ កន្លែង និងខេត្តកំពង់ចាមមានចំនួន៣កន្លែង។
កាលពីពេលថ្មីៗនេះ លោកនាយករដ្ឋមន្ត្រីហ៊ុន ម៉ាណែត ក៏បានផ្តល់អនុសាសន៍ឱ្យក្រសួងការងារខិតខំជំរុញការងារបង្កើតកន្លែងទារកដ្ឋាននេះឱ្យបានរួចរាល់នៅឆ្នាំ២០២៤ និង២០២៥ ខាងមុខ។
លោកធ្លាប់បានលើកឡើងថា ការរៀបចំឱ្យមានទារកដ្ឋាននៅកន្លែងការងារនេះនឹងផ្ដល់ភាពងាយស្រួលដល់មាតានិងទារកស្ត្រីមានកូនតូចៗនឹងមានជម្រើសច្រើនក្នុងការបំបៅដោះកូន ជាពិសេសចំណេញថវិកានិងបង្កើនផលិតភាពការងារថែមទៀត៕
