លោកស្រី Dena Fisher ប្រធានបេសកកម្មប្រចាំកម្ពុជា និងលោក ស សុខា រដ្ឋមន្ត្រីក្រសួងមហាផ្ទៃ កាលពីថ្ងៃទី ៥ ខែកុម្ភៈ ឆ្នាំ ២០២៤។ ក្រសួង មហាផ្ទៃ
ភ្នំពេញៈ អង្គការកាកបាទក្រហមអន្តរជាតិ (ICRC) តាមរយៈលោកស្រី Dena Fisher ប្រធានបេសកកម្មប្រចាំកម្ពុជា បានកោតសរសើររដ្ឋាភិបាលកម្ពុជា ចំពោះកិច្ចខិតខំកែលម្អស្ថានភាពចង្អៀតណែននៅក្នុងពន្ធនាគារ និងសន្យាបន្តជួយជ្រោមជ្រែងកម្ពុជា ទៅលើការគ្រប់គ្រងពន្ធនាគារនេះ បន្ទាប់ពីមានកិច្ចសហប្រតិបត្តិការជាមួយកម្ពុជារយៈពេល ៣០ ឆ្នាំរួចមក។
ការកោតសរសើររបស់លោកស្រីប្រធានបេសកកម្ម ICRC នេះធ្វើឡើងក្នុងជំនួបពិភាក្សាការងាររវាងលោកស្រី និងលោកស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីថ្ងៃទី ៥ ខែកុម្ភៈ ឆ្នាំ ២០២៤។ នេះបើយោងតាមខ្លឹមសារផ្សព្វផ្សាយលើហ្វេសប៊ុកក្រសួងមហាផ្ទៃនៅយប់ថ្ងៃដដែល។
បើយោងតាមក្រសួងមហាផ្ទៃ លោកស្រី Dena Fisher បានកោតសរសើររដ្ឋាភិបាលកម្ពុជា ដែលបានខិតខំកែសម្រួលឱ្យស្ថានភាពចង្អៀតណែនក្នុងពន្ធនាគារនៅកម្ពុជា តាមរយៈកិច្ចគាំទ្រពី ICRC ដែលជំនួយ និងការជ្រោមជ្រែងប្រមាណ ៣០ ឆ្នាំនេះ គឺមានគោលដៅធ្វើយ៉ាងណាកែលម្អជាបន្តបន្ទាប់នូវលក្ខខណ្ឌនៃការឃុំខ្លួនក្នុងពន្ធនាគារនៅកម្ពុជា។
លោកស្រីបញ្ជាក់ថា៖ «បើទោះបីជាបេសកកម្មរបស់អង្គការ ICRC នៅកម្ពុជា នឹងមានការកាត់បន្ថយមួយចំនួននៅឆ្នាំ ២០២៤ នេះក៏ដោយ ប៉ុន្តែអង្គការ ICRC នៅតែបន្តប្ដេជ្ញាចិត្តខ្ពស់ក្នុងការជួយជ្រោមជ្រែងដល់វិស័យពន្ធនាគារ និងការស្ដារទំនាក់ទំនងរវាងក្រុមគ្រួសារ និងជនជាប់ឃុំបន្តទៀត ដោយមានកិច្ចសហការពីកាកបាទក្រហមកម្ពុជាផងដែរ»។
ជាមួយគ្នានេះ លោកស សុខា បានលើកឡើងពីការយកចិត្តទុកដាក់របស់ ICRC ដោយបានជួយកម្ពុជាលើផ្នែកមនុស្សធម៌ជាច្រើនកន្លងមក ជាពិសេសការយកចិត្តទុកដាក់លើកិច្ចការពន្ធនាគារ និងការស្តារនីតិសម្បទាក្នុងពេលបច្ចុប្បន្ននេះ ដែលលោកចាត់ទុកជាកិច្ចសហប្រតិបត្តិការដ៏រឹងមាំក្នុងវិស័យពន្ធនាគាររវាង ICRC និងក្រសួងមហាផ្ទៃកម្ពុជា ដែលចាប់ផ្តើមឡើងតាំងពីឆ្នាំ ១៩៩៣ មក។
លោកបន្ថែមថា ៖ «រដ្ឋាភិបាលកម្ពុជា ជាពិសេសក្រសួងមហាផ្ទៃ កំពុងយកចិត្តទុកដាក់លើការកាត់បន្ថយភាពចង្អៀតណែនក្នុងពន្ធនាគារ តាមរយៈដំណោះស្រាយចំពោះមុខ និងចក្ខុវិស័យទៅអនាគត ដោយការកែលម្អលក្ខខណ្ឌឃុំខ្លួន រួមមាន ការថែរក្សាសុខុមាលភាពជនជាប់ឃុំ និងការរក្សាទំនាក់ទំនងរបស់ជនជាប់ឃុំជាមួយក្រុមគ្រួសារ»។
ភាគីទាំង ២ បានឯកភាពគ្នាបន្តប្តេជ្ញាចិត្តក្នុងភាពជាដៃគូដ៏រឹងមាំបន្តទៅទៀត សំដៅកែលម្អបន្ថែមទៀតចំពោះកិច្ចសហប្រតិបត្តិការដែលត្រូវបានធ្វើឡើងរវាងស្ថាប័នទាំ ង២ ក្នុងរយៈពេល ៣០ ឆ្នាំកន្លងទៅ។ពាក់ព័ន្ធនឹងរឿងនេះដែរលោកនុត សវនា អ្នកនាំពាក្យអគ្គនាយកដ្ឋានពន្ធនាគារ បានស្វាគមន៍ចំពោះការកោតសរសើររបស់កាកបាទក្រហមអន្តរជាតិនេះ និងអះអាងថា រដ្ឋមន្ត្រីក្រសួងមហាផ្ទៃ បានជ្រាបច្បាស់ណាស់ពីស្ថានភាពក្នុងពន្ធនាគារជាពិសេសលើភាពចង្អៀតណែនដោយលោកបានចុះត្រួតពិនិត្យបានមណ្ឌលកែប្រែ និងមន្ទីរឃុំឃាំងមួយចំនួននាពេលកន្លងមក។ លោកថា ក្នុងផ្នែកពន្ធនាគារ ខាងកាកបាទក្រហមអន្តរជាតិបានជួយកម្ពុជាច្រើនក៏ប៉ុន្តែនឹងត្រូវបញ្ឈប់គម្រោងធំៗមួយចំនួន ដោយសារគេបង្វិលជំនួយទៅកាន់ប្រទេសអ៊ុយក្រែន និងតំបន់ហ្គាហ្សាវិញ។
លោក នុត សវនា ប្រាប់ថា៖ «ខ្ញុំសូមស្វាគមន៍ចំពោះការជួយជ្រោមជ្រែងរបស់កាកបាទក្រហមអន្តរជាតិ ដែលបានចំណាយធនធានដ៏ច្រើនទាំងថវិកា បច្ចេកទេស សម្ភារ និងការបណ្តុះបណ្តាលជនជាតិខ្មែរយើងទៅជាអ្នកជំនាញតាមផ្នែកនានា រួមមានក្នុងវិស័យពន្ធនាគារនេះផង មានច្រើនធំធេងណាស់ តាំងពីទសវត្សរ៍ឆ្នាំ ១៩៩០ មក»។
លោកបញ្ជាក់ថា រដ្ឋាភិបាលកម្ពុជា និងផ្នែកពាក់ព័ន្ធព្យាយាមយ៉ាងខ្លាំង ដើម្បីដោះស្រាយភាពចង្អៀតណែននៅក្នុងពន្ធនាគារ តាមរយៈកិច្ចសហការជាមួយក្រសួងយុត្តិធម៌ តុលាការ ជាពិសេសការបញ្ជូនអ្នកជាប់ឃុំទៅកាន់មន្ទីរឃុំឃាំងផ្សេងៗដែលមិនចង្អៀត ជំរុញនីតិវិធីកាត់ក្តី អភិវឌ្ឍអគារពន្ធនាគារចាស់ៗ សង់អគារពន្ធនាគារថ្មី ព្រមជាមួយយន្តការបន្ធូរបន្ថយ និងលើកលែងទោស ជាមួយគម្រោងដោះលែងទណ្ឌិតក្រោមរូបភាពមនុស្សធម៌ក្រោមលក្ខខណ្ឌណាមួយនាពេលអនាគត។
ហេង ជីវ័ន
លោក អំ សំអាត នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ យល់ថា ការកោតសរសើររបស់ ICRC ជាការយល់ផ្ទាល់ខ្លួន នៅចំពោះមុខនៃការប្តេជ្ញាចិត្តរបស់រដ្ឋាភិបាលកម្ពុជា លើការកាត់បន្ថយភាពចង្អៀតណែនក្នុងពន្ធនាគារនេះ។ អ្វីដែលសំខាន់គឺយុទ្ធនាការជំរុញនីតិវិធីតុលាការ ជំរុញការដោះស្រាយសំណុំរឿងកកស្ទះក្នុងតុលាការ ជាពិសេសលើបញ្ហាគ្រឿងញៀន ចរាចរណ៍ និងអត្រានុកូលដ្ឋាន ខណៈសំណុំរឿងជាប់ឃុំជាង ៥០% ពាក់ព័ន្ធនឹងគ្រឿងញៀន។
លោកថា៖«បើយើងពិនិត្យពីស្ថានភាពទូទៅក្នុងពន្ធនាគារវិញ ទោះបីមានកិច្ចខិតខំប្រឹងប្រែងក្តី បើយើងមើលពីទំហំផ្ទុករបស់ពន្ធនាគារ វានៅតែបង្ហាញពីកង្វល់ពីភាពចង្អៀតណែននៅពន្ធនាគារដដែល បើយើងមើលពីស្តង់ដាពន្ធនាគារកម្ពុជា»។
លោកបានលើកទឹកចិត្តដល់រដ្ឋាភិបាលបន្តដោះស្រាយភាពចង្អៀតណែនក្នុងពន្ធនាគារនេះ តាមរយៈយុទ្ធនាការដែលរដ្ឋាភិបាលដាក់ចេញនានា អនុវត្តការដាក់ទោសការងារសហគមន៍ជំនួសការជាប់ពន្ធនាគារ ការអនុញ្ញាតឱ្យនៅក្រៅឃុំសម្រាប់អ្នកទោសជិតផុតទោស ការអនុវត្តការនៅក្រៅឃុំបណ្តោះអាសន្ន និងការពិចារណាលើកលែង និងបន្ធូរបន្ថយដល់អ្នកទោសពាក់ព័ន្ធបញ្ហាសិទ្ធិមនុស្ស និងសកម្មជននយោបាយ ជាដើម៕
