លោកស្រី អ៊ឹង កន្ថាផាវី ថ្លែងក្នុងពិធីអបអរសាទរទិវានារីអន្តរជាតិ កាលពីថ្ងៃទី ១០ ខែមីនា។ រូបថត ក្រសួងកិច្ចការនារី
ភ្នំពេញៈ លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារីបានថ្លែងថា ប្រទេសកម្ពុជា ទទួលបានការដាក់ចំណាត់ថ្នាក់ខ្ពស់បំផុត ក្នុងចំណោមបណ្តាប្រទេសក្នុងពិភពលោក ដែលមានសេរីភាពសម្រាប់ស្ត្រី ក្នុងការចាប់ផ្ដើមអាជីវកម្ម និងធុរកិច្ច ខណៈដែលមានស្ត្រីប្រមាណ ៧០ ភាគរយ ជាអ្នកតំណាងអង្គភាពសេដ្ឋកិច្ចសរុប នៅកម្ពុជា។
លោកស្រីបានថ្លែងដូចនេះ នាពិធីអបអរសាទរ ខួបទី១១៣ ទិវាអន្តរជាតិនារី ៨ មីនា ឆ្នាំ ២០២៤ ក្រោមមូលបទ «ស្ត្រី និងក្មេងស្រី ក្នុងបរិវត្តកម្មឌីជីថល» នៅខណ្ឌកំបូល រាជធានីភ្នំពេញ កាលពីថ្ងៃទី ១០ ខែមីនា ឆ្នាំ ២០២៤ ដោយលោកស្រីបានបន្ថែមថា ស្ត្រី បាននិងកំពុងចូលរួមយ៉ាងសកម្ម ក្នុងការលើកកម្ពស់ស្ថានភាពជីវភាពគ្រួសារ និងកំណើនសេដ្ឋកិច្ចគ្រួសារ និងជាតិកម្ពុជា។
លោកស្រី អ៊ឹង កន្ថាផាវី បានបញ្ជាក់ថា៖ «បច្ចុប្បន្ននេះ យើងបានឃើញមានវត្តមានស្ត្រី ជាម្ចាស់អាជីវកម្ម,ម្ចាស់ក្រុមហ៊ុនម្ចាស់សហគ្រាស ឬក៏មានមុខរបរផ្ទាល់ខ្លួនបានរួមចំណែកយ៉ាងសំខាន់ក្នុងសេដ្ឋកិច្ចគ្រួសារ។ យើងមានមោទនភាព ដែលស្ត្រីយើង គាត់មានសមត្ថភាព និងបន្តបង្កើនសមត្ថភាពរបស់ខ្លួនជាបន្តបន្ទាប់ ក្នុងការរួមចំណែកក្នុងកិច្ចអភិវឌ្ឍន៍សង្គម»។
លោកស្រីបានបន្ថែមថា ទន្ទឹមនឹងស្ថានភាពសេដ្ឋកិច្ច និងការចូលរួមរបស់ស្ត្រីក្នុងសង្គមមានភាពល្អប្រសើរ ផ្នែកស្ថានភាពសុខុមាលភាពវិញក៏មានភាពប្រសើរឡើងជាបន្តបន្ទាប់ផងដែរដោយក្នុងនោះអត្រាមរណភាពមាតា អត្រាមរណភាពរបស់ទារក និងអត្រាមរណភាពរបស់កុមារ អាយុក្រោម ៥ ឆ្នាំ មានការថយចុះជាបន្តបន្ទាប់។
លោកស្រីថា៖ «នៅឆ្នាំ ២០២២ អត្រាមរណភាពមាតា ថយចុះមកត្រឹម ១៥៤ ក្នុង ១០ ម៉ឺនកំណើតរស់ និងចំពោះទារកថយចុះមក ត្រឹម ១២ នាក់ ក្នុងចំណោម ១ ០០០ កំណើតរស់ ខណៈកុមារក្រោម ៥ ឆ្នាំចុះមកត្រឹម ១៦ នាក់ ក្នុងចំណោម ១ ០០០ កំណើតរស់។ ជាមួយគ្នានោះ តាមរយៈការអនុវត្តកម្មវិធីជាតិគាំពារសង្គម ស្ត្រីបានទទួលអត្ថប្រយោជន៍ ជាបន្តបន្ទាប់ ជាពិសេសសម្រាប់ស្ត្រីដែលមានផ្ទៃពោះ»។
លោកស្រី កែវ មុំ ប្រធានសមាគមសហគ្រិនស្ត្រីកម្ពុជា បានប្រាប់ឱ្យដឹងថា ស្ត្រីមានភាពអង់អាចណាស់ ក្នុងការឈានជើងប្រឡូកនៅក្នុងវិស័យធុរកិច្ច ដោយសមាជិកជាស្ត្រីរបស់សមាគមបន្តមានកំណើនជាបន្តបន្ទាប់ គួរជាទីមោទនៈ។
លោកស្រីបានបន្ថែមថា ទិវាអន្តរជាតិនារី ៨ មីនា មិនគ្រាន់តែជាទិវាបង្ហាញពីសិទ្ធិរបស់នារីទេ តែវាថែមទាំងបង្ហាញ នារីកម្ពុជា មានសមត្ថភាពគ្រប់គ្រាន់ក្នុងការទ្រទ្រង់អាជីវកម្មមួយដោយខ្លួនឯង និងទទួលបានជោគជ័យ។
លោកស្រីបានបញ្ជាក់ទៀតថា៖ «ក្នុងនាមជាថ្នាក់ដឹកនាំសមាគម ខ្ញុំរីករាយណាស់ ដែលបានឃើញថា ស្ត្រីខ្មែរយើង ពីមួយឆ្នាំទៅមួយឆ្នាំ បានបង្ហាញពីភាពខ្លាំងរបស់ខ្លួន ជាពិសេសការបើកអាជីវកម្មមួយដោយខ្លួនឯង។ ទិវាសហគ្រិនស្ត្រីកម្ពុជា លើកទី៤ ឆ្នាំ ២០២៣ ជាតឹកតាងបង្ហាញច្បាស់ថា ស្ត្រីត្រូវបានគោរព និងឱ្យតម្លៃ ដែលជាចំណែកមួយមិនអាចខ្វះបានក្នុងសហគ្រិនភាព»។
ទោះជាយ៉ាងណាក៏ដោយ លោកស្រី កែវ មុំ ថា ស្ត្រីនៅតែមានបញ្ហាប្រឈម ក្នុងវិស័យនេះ។ លោកស្រីបានបញ្ជាក់ថា៖«យើងគ្រប់គ្នាសុទ្ធតែបានដឹងហើយថា ក្នុងចំណោមសហគ្រាសខ្នាតមីក្រូ តូច និងមធ្យមប្រមាណជាង ៦៥ ភាគរយ គឺមានម្ចាស់ជាស្ត្រី ដែលក្នុងនោះ ៩០ ភាគរយត្រូវបានគ្រប់គ្រង និងដឹកនាំដោយស្ត្រី តែពួកយើងនៅតែមានបញ្ហាប្រឈមជាច្រើននៅឡើយពាក់ព័ន្ធទៅនឹងការធ្វើអាជីវកម្ម និងពាណិជ្ជកម្ម។
លោកស្រី កែវ មុំ បានបន្តទៀតថា៖ «ដូច្នេះយើងស្នើឱ្យមានការយកចិត្តទុកដាក់បន្ថែមទៀតពីរាជរដ្ឋាភិបាល ដៃគូអភិវឌ្ឍន៍ អង្គការសង្គមស៊ីវិល វិស័យឯកជន វិនិយោគិន និងផ្នែកពាក់ព័ន្ធនានា ដើម្បីជួយគាំទ្រដល់សកម្មភាពសេដ្ឋកិច្ចរបស់ស្ត្រីកម្ពុជាយើង»។
ទិវាសហគ្រិនស្ត្រី ត្រូវបានប្រារព្ធធ្វើឡើងជាសកលដើម្បីពង្រឹងភាពអង់អាចដល់ស្ត្រី និងយុវតីឱ្យចូលរួមយ៉ាងសកម្មនៅក្នុងប្រព័ន្ធសេដ្ឋកិច្ច តាមរយៈការកសាងបណ្តាញអ្នកដឹកនាំស្ត្រី អ្នកច្នៃប្រឌិត និងសហគ្រិន ដើម្បីផ្តួចផ្តើមអាជីវកម្ម ជំរុញសកម្មភាពសេដ្ឋកិច្ច និងពង្រីកសហគមន៍អាជីវកម្មជុំវិញពិភពលោក។
ដោយឡែក ដើម្បីសម្រេចបាននូវគោលដៅដ៏មហិច្ឆតានេះ ទិវាសហគ្រិនស្ត្រីកម្ពុជា បានបង្កើត និងជំរុញបណ្តាញសំខាន់ៗជាបុគ្គល និងអាជីវកម្មដែលដឹកនាំដោយស្ត្រីកម្ពុជា ដើម្បីបានដឹងពីសក្តានុពលពេញលេញរបស់ស្ត្រី និងការផ្លាស់ប្តូរពិភពលោក។
រាជរដ្ឋាភិបាល នីតិកាលទី៧ នៃរដ្ឋសភា បានបន្តកំណត់ការលើកកម្ពស់សមភាពយេនឌ័រ និងការបង្កើនភាពអង់អាចរបស់ស្ត្រី និងក្មេងស្រី នៅគ្រប់វិស័យ ជាអាទិភាពក្នុងរបៀបវារៈគោលនយោបាយ និងយុទ្ធសាស្ត្របញ្ចកោណ ដំណាក់កាលទី១ តាមរយៈការពង្រឹងភាពជាពលរដ្ឋ ក្នុងសង្គម ដែលមានអរិយធម៌ខ្ពស់ ប្រកបដោយសីលធម៌ សមធម៌ និងបរិយាបន្ន ដែលក្នុងនោះ «ស្ត្រី គឺជាស្នូល»៕
