សកម្មភាពចុះបង្ក្រាបបទល្មើសទន្ទ្រានយកដីនៅខេត្ដពោធិ៍សាត់កាលពីថ្ងៃទី១៦ មីនា ។ រូបថត GRK News
ភ្នំពេញៈ លោក ខ្វៃ អាទិត្យា មន្ត្រីនាំពាក្យក្រសួងបរិស្ថានបានថ្លែងថា ចាប់ពីថ្ងៃទី ១៣ ដល់ ១៧ ខែមីនា សមត្ថកិច្ចចម្រុះបង្ក្រាប និងទប់ស្កាត់បទល្មើសធនធានធម្មជាតិក្នុងភូមិសាស្ត្រខេត្តពោធិ៍សាត់ ចំនួន ១០ ក្រុម ដែលមានកម្លាំងសរុប ៧៨៩ នាក់ បានចុះអន្តរាគមន៍ ឃ្លុំឬហ៊ុមព័ទ្ធដីទំហំចំនួន ៣ ៩៤២,៧៣ ហិកតា និងបានឃុំខ្លួនជនសង្ស័យម្នាក់ ហើយបានអប់រំមនុស្សមួយចំនួនផងដែរ។
លោកបានថ្លែងបែបនេះកាលពីថ្ងៃទី១៨ ខែមីនា ក្រោយកិច្ចប្រជុំបូកសរុបការងារប្រតិបត្តិការលើកទី១ កាលពីថ្ងៃទី ១៧ ខែមីនា នៅសាលាស្រុកវាលវែង ខេត្តពោធិ៍សាត់ ដោយមានការចូលរួមដឹកនាំដោយលោក ចាយ សាមិត្ត រដ្ឋលេខាធិការក្រសួងងបរិស្ថាន និងលោកខូយ រីដា អភិបាលខេត្តពោធិ៍សាត់ ព្រមទាំងមានការចូលរួមពីតំណាងអគ្គស្នងការនគរបាលជាតិ មេបញ្ជាការកងរាជអាវុធហត្ថលើផ្ទៃប្រទេស អាជ្ញាធរខេត្ត អាជ្ញាធរមូលដ្ឋានគ្រប់លំដាប់ថ្នាក់ និងមន្ត្រីជំនាញពាក់ព័ន្ធមួយចំនួនទៀត។
លោកបានបញ្ជាក់ថា៖«ដោយមានបញ្ជាពីរាជរដ្ឋាភិបាលកម្ពុជា ក្នុងការជំរុញឱ្យអាជ្ញាធរពាក់ព័ន្ធពង្រឹងការគ្រប់គ្រងធនធានធម្មជាតិនៅតាមភូមិសាស្ត្រនានាទូទាំងប្រទេស ប្រតិបត្តិការទ្រង់ទ្រាយធំរបស់សមត្ថកិច្ចចម្រុះបានចុះបង្ក្រាបនិងទប់ស្កាត់បទល្មើសធនធានធម្មជាតិ ក្នុងភូមិសាស្ត្រខេត្តពោធិ៍សាត់ បានធ្វើឡើង»។
ការចុះប្រតិបត្តិការនេះធ្វើឡើងក្រោយពីការដាក់បទបញ្ជាដោយផ្ទាល់ពីលោក អ៊ាង សុផល្លែត រដ្ឋមន្ត្រីបរិស្ថាន និងលោក សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មការថ្នាក់ជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ និងបញ្ជាការកងឯកភាពខេត្ត ដឹកនាំដោយលោក ខូយ រីដា អភិបាលនៃគណៈអភិបាលខេត្តពោធិ៍សាត់។
លោក ខ្វៃ អាទិត្យា បានបន្ថែមថា ក្នុងយុទ្ធសាស្ត្របញ្ចកោណដំណាក់កាលទី១ នៃរាជរដ្ឋាភិបាលក្នុងនោះបញ្ចកោណទី៤ ការអភិវឌ្ឍប្រកបដោយភាពធន់ ចីរភាព និងបរិយាបន្ន និងក្នុងមុំទី២ ស្តីពីការគ្រប់គ្រងធនធានធម្មជាតិ បេតិកភណ្ឌ វប្បធម៌ និងទេសចរណ៍ប្រកបដោយចីរភាព។
លោកថា ៖«លើសពីនេះ ក្នុងកិច្ចប្រជុំពេញអង្គគណៈរដ្ឋមន្ត្រីកាលពីថ្ងៃទី១៥ ខែមីនា ឆ្នាំ២០២៤ សម្តេចបវរធិបតីនាយករដ្ឋមន្ត្រី ហ៊ុន ម៉ាណែត បានណែនាំឱ្យអាជ្ញាធរពាក់ព័ន្ធយកចិត្តទុកដាក់លើការគ្រប់គ្រងនិងការពារធនធានធម្មជាតិ ជាពិសេសព្រៃឈើដើម្បីកុំឱ្យមានជនឆ្លៀតឱកាសបំផ្លាញធនធានធម្មជាតិ»។
យោងតាមរបាយការណ៍របស់សមត្ថកិច្ចចម្រុះនៅថ្ងៃទី១៧ ខែមីនា បានបង្ហាញថា ប្រតិបត្តិការនៃកម្លាំងចម្រុះបានសម្រេចឃ្លុំដីបានចំនួន ៥១៥ ហិកតា និងបានដកហូត ផាល ត្រាក់ទ័រ (ទុកនៅប៉ុស្តិ៍នគរបាលរដ្ឋបាលអន្លង់រាប) ២ គ្រឿង, រណារយន្ត១គ្រឿង, តង់កៅស៊ូ ១០ តង់,រោងប្រក់ស័ង្កសី ៩ខ្នង,រោងប្រក់ស្លឹក១ខ្នង,ដើមដំឡូង ៣៧០ បាច់,ដើមចេក ៧០ គុម្ព,បង្គោលរបងថ្ម ២០ បង្គោល និងបង្គោលរបងឈើ៧០បង្គោល។
របាយការណ៍ដដែលបន្ថែមថា ដោយឡែកនៅក្នុងពេលចុះអន្តរាគមន៍កម្លាំងចម្រុះបានរុះរើ រោងប្រក់ស័ង្កសី៣ខ្នង,រោងប្រក់ស្លឹក ២ខ្នង,បង្គោលរបង១២២ដើមនិងបានស៊ើបអង្កេតអត្តសញ្ញាណកសាងសំណុំរឿង២ករណី(នៅចំណុចកូនភ្នំកណ្ដាល)ក្នុងស្រុកវាលវែងខេត្តពោធិ៍សាត់។
សូមរំឭកដែរថា ក្រសួងបរិស្ថានកន្លងមក បានដាក់ចេញវិធានការយ៉ាងម៉ឺងម៉ាត់ក្នុងការទប់ស្កាត់បទល្មើសធនធានធម្មជាតិ ស្របតាមយុទ្ធសាស្ត្រចក្រាវិស័យបរិស្ថានគឺស្អាត បៃតង និងចីរភាព។ក្នុងនោះរួមមាន ការអនុវត្តច្បាប់ ១០០ភាគរយមិនមានការលើកលែងជាដាច់ខាតនិងបញ្ចប់នូវវប្បធម៌ចុះកិច្ចសន្យាហើយដោះលែងអ្នកប្រព្រឹត្តបទល្មើសនិងពង្រឹងកិច្ចសហការជាមួយគណៈបញ្ជាការឯកភាពរដ្ឋបាលរាជធានី ខេត្ត ដើម្បីទប់ស្កាត់ការពារ និងអភិរក្សធនធានធម្មជាតិ។
ជាមួយគ្នានេះក្រសួងបរិស្ថានបន្តសហការជាមួយបញ្ជាការដ្ឋានកងរាជអាវុធហត្ថលើផ្ទៃប្រទេស និងអង្គភាពប្រឆាំងអំពើពុករលួយ បន្ថែមលើកិច្ចសហការជាមួយអាជ្ញាធរមូលដ្ឋានដែលបានអនុវត្តកន្លងមកនិងជំរុញការដាំស្តារព្រៃឈើសំដៅឱ្យមានការដាំដើមឈើឱ្យច្រើនដើម្បីបង្កើនគម្របព្រៃឈើឱ្យបាន៦០ភាគរយនៅឆ្នាំ២០៥០៕
.jpg)
