លោកស្រី ឃួន សុដារី ប្រធានរដ្ឋសភាធ្វើដំណើរចាកចេញពីរាជធានីភ្នំពេញ ទៅចូលរួមកិច្ចប្រជុំកំពូលប្រធានសភាស្ត្រី នៅសាធារណរដ្ឋបារាំង។ រូបថត NA
លោកស្រី ឃួន សុដារី ប្រធានរដ្ឋសភាកម្ពុជា នាយប់ថ្ងៃទី ២ ខែមីនា បានដឹកនាំគណៈប្រតិភូជាន់ខ្ពស់រដ្ឋសភា ទៅបំពេញទស្សនកិច្ចជាផ្លូវការ និងចូលរួមកិច្ចប្រជុំកំពូលប្រធានសភាស្ត្រី នៅសាធារណរដ្ឋបារាំង រយៈពេល ១០ ថ្ងៃ ចាប់ពីថ្ងៃទី ២ ដល់ថ្ងៃទី ១១ ខែមីនា ឆ្នាំ ២០២៤ តបតាមការអញ្ជើញរបស់លោកស្រី យ៉ាអ៊ែល ប្រូន ពីវេ (Yaël Braun-Pivet) ប្រធានរដ្ឋសភា នៃសាធារណរដ្ឋបារាំង។
យោងតាមសេចក្តីជូនព័ត៌មានរបស់រដ្ឋសភាបានឱ្យដឹងថា៖ «ដំណើរទស្សនកិច្ចនាពេលនេះ ធ្វើឡើងក្នុងគោលបំណងជំរុញលើកកម្ពស់ទំនាក់ទំនងស្ថាប័ននីតិប្បញ្ញត្តិ និងទំនាក់ទំនាក់ទំនងរវាងប្រជាជននៃប្រទេសទាំង ២ កម្ពុជា-បារាំងឱ្យកាន់តែជិតស្និទ្ធ»។
តាមរយៈសេចក្តីជូនព័ត៌មាននេះដែរដំណើរទស្សនកិច្ចនេះក៏ជាឱកាសមួយ ដើម្បីពង្រឹងវិស័យការទូតសភាកម្ពុជាជាមួយសភានានានៅលើសកលលោក ជាពិសេសការលើកកម្ពស់សមភាពយេនឌ័រ គោលការណ៍ពហុភាគីនិយម ដើម្បីថែរក្សាការពារសុខសន្តិភាព ស្ថិរភាព និងវិបុលភាពសង្គមប្រកបដោយចីរភាព និងបរិយាបន្ន។
ក្នុងអំឡុងនៃទស្សនកិច្ចជាផ្លូវការនៅសាធារណរដ្ឋបារាំង លោកស្រី ឃួន សុដារី នឹងមានជំនួបសំខាន់ៗ ដែលក្នុងនោះមាន ជំនួបសម្តែងការគួរសមនិងពិភាក្សាការងារជាមួយប្រធានរដ្ឋសភាបារាំង ប្រធានរដ្ឋសភាឥណ្ឌូនេស៊ី ប្រធានរដ្ឋសភា អាល្លឺម៉ង់ ប្រធានរដ្ឋសភាបែលហ្ស៊ិក និងប្រធានរដ្ឋសភាតង់ហ្សានី ព្រមទាំងចូលរួមពិធីសម្ពោធការតាំងពិព័រណ៍ ឧទ្ទិសដល់សិទ្ធិនយោបាយរបស់ស្ត្រីនៅលើពិភពលោក។
រដ្ឋសភា បានបញ្ជាក់ថា ៖ «ក្រៅពីជំនួបពិភាក្សាការងារជាមួយប្រធានសភាជាស្ត្រី សម្តេចមហារដ្ឋសភាធិការធិបតី ឃួន សុដារី ក៏នឹងមានជំនួបសម្តែងការគួរសម និងពិភាក្សាការងារជាមួយប្រតិភូនៃសភានិយាយភាសាបារាំង(APF) ផងដែរ ដើម្បីជំរុញបន្ថែមវឌ្ឍនភាពនៃទំនាក់ទំនង និងកិច្ចសហប្រតិបត្តិការរវាង APF និងសភាកម្ពុជា។ក្រៅពីនេះ គណៈប្រតិភូរដ្ឋសភាកម្ពុជាក៏នឹងមានជំនួបដាច់ដោយឡែកជាមួយក្រុមមិត្តភាពសភាកម្ពុជា-បារាំង គណៈកម្មការសង្គមកិច្ចនៃរដ្ឋសភាបារាំង និងជំនួបរវាងអគ្គលេខាធិការ នៃរដ្ឋសភាកម្ពុជា និងរដ្ឋសភាបារាំងផងដែរ»។
លោក ស៊ឺន សម អ្នកជំនាញផ្នែកទំនាក់ទំនងអន្តរជាតិនៃរាជបណ្ឌិត្យសភាកម្ពុជា បានប្រាប់ឱ្យដឹងនៅថ្ងៃទី៣ ខែមីនាថា នេះគឺជាដំណើរទស្សកិច្ចផ្លូវការលើកទី២ របស់លោកស្រី ឃួន សុដារី នៅក្រៅប្រទេស ខណៈ ដែលកាលពីកន្លងទៅលោកស្រីបានទៅបំពេញទស្សនកិច្ចរដ្ឋរបស់ខ្លួននៅប្រទេសវៀតណាម និងប្រទេសឡាវ។
លោកបានបញ្ជាក់ថា ៖ «ទស្សនកិច្ចនេះ គឺនឹងជួយជំរុញទំនាក់ទំនងកម្ពុជាជាមួយនឹងប្រទេសបារាំងដែលជាអតីតអាណាព្យាបាលរបស់ខ្លួន ឱ្យកាន់តែរឹងមាំបន្ថែមទៀត និងជារឿងល្អបំផុត»។
លោក ស៊ឺន សម បានថ្លែងថា៖ «ខ្ញុំគិតថា ជារឿងមួយដ៏សំខាន់ ដែលលោកស្រី ឃួន សុដារី គួរតែទៅ និងបំពេញការទូតបន្ថែមទៀតក្នុងនាមជាប្រធានរដ្ឋសភាកម្ពុជា។ យើងដឹងហើយ ទោះជាការបំពេញទស្សនកិច្ចនេះ ផ្តោតលើប្រធានសភាជាស្ត្រីក៏ដោយ ក៏ប៉ុន្តែទំនាក់ទំនងជាមួយបារាំង គ្រប់ថ្នាក់ដឹកនាំរបស់កម្ពុជាព្រះមហាក្សត្រ នាយករដ្ឋមន្ត្រី និងប្រធានរដ្ឋសភាជាដើមនេះ គឺសុទ្ធសឹងជាមានតួនាទីយ៉ាងសំខាន់ ពង្រឹងទំនាក់ទំងកម្ពុជា-បារាំង»។
បើតាមសេចក្តីជូនព័ត៌មានរបស់រដ្ឋសភា កិច្ចប្រជុំកំពូលប្រធានសភាស្ត្រីនាឆ្នាំ ២០២៤ នេះ នឹងមានការចូលរួមពីប្រធានសភាជាស្ត្រីនៅទូទាំងពិភពលោក មកពីប្រទេសចំនួន ២៥ ប្រទេស សំដៅជំរុញបន្ថែមនូវការទូតសភាប្រកបដោយភាពបុរេសកម្ម ដែលគិតគូរពីបញ្ហាស្ត្រីនិងក្មេងស្រី ការលើកកម្ពស់សិទ្ធិស្ត្រីនៅទូទាំងពិភពលោក និងការប្រឆាំងរាល់ទម្រង់នៃអំពើហិង្សាលើស្ត្រី។ សំខាន់ជាងនេះទៅទៀត សភាដើរតួនាទីនាំមុខ ក្នុងការជំរុញឱ្យមានសមភាពរវាងស្ត្រីនិងបុរស តាមរយៈការតាក់តែងនិងអនុម័តច្បាប់ពាក់ព័ន្ធសំខាន់ៗ។
កិច្ចប្រជុំកំពូលនេះមានវេទិកាតុមូលសំខាន់ចំនួន ២ ផងដែរ រួមមាន៖ ទី១ ការអប់រំប្រកបដោយសមភាព ការប្រយុទ្ធប្រឆាំងនឹងអំពើហិង្សាលើស្ត្រី និងសុខភាពស្ត្រី និងទី២ សមភាពនិងចំនួនស្មើគ្នារវាងស្ត្រីនិងបុរសក្នុងវិស័យនយោបាយ និងការអះអាងអំពីតួនាទីគំរូរបស់ស្ត្រី៕
