អ្នកចូលរួមប្រារព្ធ«ទិវាអន្តរជាតិនារី ៨មីនា ខួបលើកទី១១៣ ឆ្នាំ២០២៤» កាលពីថ្ងៃទី២កុម្ភៈ។ រូបថត Men Sam An FB
ភ្នំពេញៈ ព្រះមហាក្សត្រនៃព្រះរាជាណាចក្រកម្ពុជា ក្រសួង ស្ថាប័នរបស់រាជរដ្ឋាភិបាល បានចូលរួមអបអរសាទរខួបលើកទី១១៣ ទិវាអន្តរជាតិនារី ៨ មីនា ឆ្នាំ ២០២៤ នេះ ដែលឆ្នាំនេះ ត្រូវប្រារព្ធធ្វើឡើងក្រោមប្រធានបទ៖ «ស្ត្រីនិងក្មេងស្រី ក្នុងបរិវត្តកម្មឌីជីថល»។
ក្នុងនោះរួមមានក្រសួងក្រសួងវប្បធម៌ និងវិចិត្រសិល្បៈ ក្រសួងទេសចរណ៍ ក្រសួងការងារ និងបណ្ដុះបណ្ដាលវិជ្ជាជីវៈ ក្រសួងអធិការកិច្ច ព្រមទាំងមានសហជីព អង្គការមិនមែនរដ្ឋាភិបាលក៏ចូលរួមប្រារព្ធទិវា៨មីនានេះផងដែរ ដើម្បីលើកកម្ពស់សិទ្ធិការងារ សិទ្ធិស្ត្រី។
លោកស្រី ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈបានថ្លែងកាលពីថ្ងៃទី ១ ខែមីនា នាឱកាសប្រារព្ធ «ទិវាអន្តរជាតិនារី ៨ មីនា ខួបលើកទី១១៣ ឆ្នាំ ២០២៤» ថា ទិវានេះគឺជាព្រឹត្តិការណ៍ក្រើនរំឭក និងជំរុញដល់ការគិតគូរដល់ស្ត្រីឱ្យកាន់តែខ្លាំង និងដោះស្រាយបញ្ហាប្រឈមទាំងនេះឱ្យកាន់តែមានប្រសិទ្ធភាព។
លោកស្រីបញ្ជាក់ថា៖ «ប្រធានបទឆ្នាំនេះ គឺសមស្របនឹងបរិយាកាសនៃការប្រើប្រាស់បច្ចេកវិទ្យាកាន់តែខ្លាំង ក្នុងជីវភាពរស់នៅក្នុងសង្គម សេដ្ឋកិច្ច និងនយោបាយ ហើយក៏បង្ហាញឱ្យឃើញពីទិសដៅ និងការគិតគូរបន្ថែមដល់ស្ថានភាពស្ត្រី ដែលត្រូវដើរឱ្យទាន់សភាពការណ៍ដែលកំពុងវិវត្ត»។
លោកស្រី ភឿង សកុណា បន្តថា ជាលក្ខខណ្ឌធម្មជាតិ ស្ត្រីបានកើតមកជាមួយនូវកម្លាំងរូបវន្តខ្សោយជាងបុរស ព្រមទាំងការទទួលខុសត្រូវផ្នែកគ្រួសារខ្លាំងជាងបុរស រួមជាមួយក្រឹត្យក្រមសង្គមមួយចំនួន ដែលជាបុព្វហេតុចម្បងនាំទៅដល់បញ្ហានានា ដែលប៉ះពាល់យ៉ាងខ្លាំងដល់លម្ហនៃសិទ្ធិសេរីភាពរបស់ស្ត្រី ការរើសអើងផ្នែក Gender វិសមភាពការងារ អំពើហិង្សា ការជួញដូរ ការកេងប្រវ័ញ្ច និងអយុត្តិធម៌ក្នុងសង្គមជាដើម។
លោកស្រីថ្លែងថា៖ «សូមបន្តកំណត់លក្ខណសម្បត្តិស្ត្រី និងលើកសំណើតែងតាំងស្ត្រី សម្រាប់មុខតំណែងដែលនៅទំនេរ ,ក្នុងករណីមានលក្ខណសម្បត្តិប្រហាក់ប្រហែលគ្នា ត្រូវបន្តផ្តល់អាទិភាពដល់បេក្ខនារី ដែលត្រូវជ្រើសរើសជាមន្ត្រីរាជការក្របខ័ណ្ឌថ្មី និងជាមន្ត្រីជាប់កិច្ចសន្យា និងបន្តយកចិត្តទុកដាក់ចំពោះមន្ត្រីជាស្ត្រីមុនពេលចូលនិវត្តន៍ ដោយត្រូវរៀបចំបែបបទដំឡើងឋានន្តរស័ក្តិនិងថ្នាក់ ទៅតាមអតីតភាពការងារស្របតាមគោលការណ៍ជាធរមាន»។
ជាមួយគ្នានេះ ក្រសួងទេសចរណ៍ក៏បានប្រារព្ធទិវានេះដែរ ដោយលោក សុខ សូកេន រដ្ឋមន្រ្តីក្រសួងទេសចរណ៍លើកឡើងថា ក្រសួងទេសចរណ៍ មានភាពចាំបាច់ក្នុងការចូលរួមគាំទ្រ និងអនុវត្តការងារលើកកម្ពស់សមភាពយេនឌ័រ និងបង្កើនភាពអង់អាចដល់ស្ត្រី ដើម្បីបង្កើតបរិស្ថានអំណោយផល និងផ្តល់ឱកាសឱ្យស្ត្រីបានបន្តចូលរួមយ៉ាងពេញលេញក្នុងការអនុវត្តសិទ្ធិ និងករណីយកិច្ច ព្រមទាំងទទួលបានផលប្រយោជន៍ពីកិច្ចអភិវឌ្ឍន៍វិស័យទេសចរណ៍ប្រកបដោយសមធម៌ និងសមភាព។
លោកថ្លែងថា៖ «ការអនុវត្តការលើកកម្ពស់សមភាពយេនឌ័រនេះ គឺតាមរយៈការបន្តគិតគូរដល់ស្ត្រីដែលបម្រើការក្នុងវិស័យមាសបៃតងមួយនេះ ដោយដាក់ចេញនូវផែនការយុទ្ធសាស្ត្រលើកកម្ពស់យេនឌ័រក្នុងវិស័យទេសចរណ៍ និងកម្មវិធីអភិវឌ្ឍន៍នានារបស់ក្រសួង»។
ចំណែកលោក ហួត ហាក់ រដ្ឋមន្រ្តីក្រសួងអធិការកិច្ច ក៏បានលើកឡើងដែរថា គោលបំណងសំខាន់ដែលក្រសួងអធិការកិច្ច ប្រារព្ធទិវានេះ គឺដើម្បីជំរុញឱ្យមានការចូលរួមរបស់ក្មេងស្រី និងស្ដ្រី ក្នុងការធ្វើសេចក្ដីសម្រេចចិត្តនៅគ្រប់កម្រិតទាំងក្នុងនយោបាយ និងសាធារណៈ ជាពិសេសលើកកម្ពស់យេនឌ័រក្នុងវិស័យអធិការកិច្ច។
រីឯលោក ហេង សួរ រដ្ឋមន្ត្រីក្រសួងការងារ ក៏បានដថ្លែងដែរថា ការដាក់ប្រធានបទឆ្នាំនេះ គឺសមស្របទៅនឹងការវិវឌ្ឍនៃសង្គមជាតិ និងស្របតាមផែនការយុទ្ធសាស្ត្ររបស់រាជរដ្ឋាភិបាលអាណត្តិទី៧ ដែលបានសម្រេចផ្តោតជាសំខាន់ទៅលើបច្ចេកវិទ្យាឌីជីថល។
លោកថា សម្រាប់ក្រសួងការងារ នឹងជំរុញឱ្យស្ត្រី និងយុវតីកម្ពុជាផ្សារភ្ជាប់ជាមួយបច្ចេកវិទ្យាឌីជីថលនេះ គឺនឹងផ្តល់អត្ថប្រយោជន៍ និងផលប្រយោជន៍ច្រើនចេញពីការអភិវឌ្ឍនៃបច្ចេកវិទ្យាឌីជីថលជាស្នូល។
លោក ហេង សួរ ថ្លែងថា៖ «ស្ដ្រីដើរតួនាទីយ៉ាងសំខាន់ក្នុងការជួយជ្រោមជ្រែងសេដ្ឋកិច្ច និងការអភិវឌ្ឍសង្គមដែលធ្វើឱ្យកម្ពុជារីកចម្រើនដូចសព្វថ្ងៃ។ លើសពីនេះ កម្ពុជាបានផ្តល់ភាពស្របច្បាប់ និងភាពស្មើគ្នាដោយគ្មានការរើសអើងចំពោះមុខរបរដែលស្ត្រីប្រកប ទោះបីក្រៅម៉ោងការងារ និងក្នុងម៉ោងការងារក៏ដោយ»។
ទន្ទឹមនឹងនេះដែរ តាមរយៈព្រះរាជសាររបស់ព្រះវររាជមាតាជាតិខ្មែរ ក្នុងឱកាសអបអរសាទរខួបលើកទី១១៣ ទិវាអន្តរជាតិនារី ៨ មីនានេះ ព្រះអង្គក៏បានគាំទ្រក្រសួងកិច្ចការនារី និងភាគីពាក់ព័ន្ធ ដែលបាននិងកំពុងខិតខំប្រឹងប្រែងអនុវត្តភារកិច្ចដើម្បីស្ត្រី និងក្មេងស្រី បានទទួលនូវកិច្ចការពារសិទ្ធិ និងផលប្រយោជន៍ ក្នុងការអភិវឌ្ឍគ្រួសារ និងសង្គម ពិសេសបានជំរុញលើកទឹកចិត្ត កសាង និងអភិវឌ្ឍសមត្ថភាពស្ត្រីឱ្យពួកគេចូលរួមប្រកបដោយសមភាព និងសមធម៌ក្នុងគ្រប់ការងារនៅគ្រប់វិស័យ។
សម្តេចព្រះមហាក្សត្រី មានព្រះបន្ទូលថា៖ «ខ្ញុំសូមអំពាវនាវ និងលើកទឹកចិត្តឱ្យរាជរដ្ឋាភិបាល និងស្ថាប័នពាក់ព័ន្ធបន្តយកចិត្តទុកដាក់អនុវត្តការងារកសាង និងអភិវឌ្ឍសមត្ថភាពស្ត្រីជាបន្តទៀតដើម្បីវិបុលភាព និងសេចក្តីសុខចម្រើនរបស់ជនរួមជាតិយើង»។
ជាមួយគ្នានេះដែរ សម្តេចព្រះមហាក្សត្រី ក៏បានកត់សម្គាល់ឃើញដែរថា សម្រាប់កម្ពុជា បរិវត្តកម្មឌីជីថល គឺជាការចាំបាច់ដើម្បីទាញយកផលប្រយោជន៍ជាអតិបរមាពីការរីកចម្រើននៃបច្ចេកវិទ្យា ដើម្បីបង្កើនផលិតភាព ភាពប្រកួតប្រជែង និងប្រសិទ្ធភាពសេដ្ឋកិច្ច។
ដោយឡែកចំពោះក្រុមសហជីព សមាគម និងអង្គការមិនមែនរដ្ឋាភិបាលចំនួន ២០ ស្ថាប័ន ដែលកំពុងធ្វើការងារដើម្បីលើកកម្ពស់សិទ្ធិការងារ សិទ្ធិស្ត្រី និងសមភាពយេនឌ័រនៅកម្ពុជា បានរួមគ្នាប្រារព្ធទិវាអន្តរជាតិនារី ៨ មីនា នេះ ក្រោមប្រធានបទ «ធានាសិទ្ធិសេរីភាពស្រ្តី និងក្មេងស្រី ដើម្បីស្ថិរភាពសេដ្ឋកិច្ច និងយុត្តិធម៌សង្គម»។
ក្រុមអង្គការទាំងនោះលើកឡើងថា៖ «ការប្រារព្ធទិវានេះ ដើម្បីពង្រឹងសាមគ្គីភាពរវាងអង្គការសង្គមស៊ីវិល សមាគម សហជីព កម្មករ និងកិច្ចសហប្រតិបត្តិការជាមួយ ក្រសួងពាក់ព័ន្ធ ដៃគូអភិវឌ្ឍន៍ ក្នុងការធានានូវសិទ្ធិសេរីភាពរបស់ស្ត្រី និងក្មេងស្រីដើម្បីស្ថិរភាពសេដ្ឋកិច្ច និងយុត្តិធម៌សង្គម»។
ក្រុមអង្គការ និងសហជីពទាំងនោះ ក៏បានធ្វើយុទ្ធនាការតាមបណ្ដាញសង្គមចាប់ពីដើមខែមីនានេះតទៅ ដោយការប្ដូរស៊ុមរូបភាពប្រូហ្វាល់ហ្វេសប៊ុក និងបង្ហោះសារផ្សេងៗទាក់ទងនឹងតម្រូវការនិងដំណោះស្រាយជាអាទិភាព ដើម្បីធានានូវសិទ្ធិសេរីភាពរបស់ស្ត្រី និងក្មេងស្រីដើម្បីស្ថិរភាពសេដ្ឋកិច្ច និងយុត្តិធម៌សង្គម៕
