![](https://pppkhmer.sgp1.digitaloceanspaces.com/image/main/20243/7_3_2024_topic_18_kratie_administration_prohibits_illegal_fishing_equipments_at_snuol_district_in_kratie_province_on_29_02_2024_by_kratie_admin_1_.jpg)
មន្ត្រីរឹបអូសឧបករណ៍នេសាទខុសច្បាប់ដឹកយកទៅរក្សាទុក។ រូបថត រដ្ឋបាលខេត្តក្រចេះ
រដ្ឋបាលខេត្តក្រចេះ ណែនាំជាថ្មីហាមឃាត់ការធ្វើនេសាទដោយប្រើប្រាស់ឧបករណ៍ឆក់ត្រី មងក្រឡាធំនិងសន្ទូចរនង នៅក្នុងតំបន់គ្រប់គ្រង និងការពារសត្វផ្សោតទន្លេមេគង្គក្នុងភូមិសាស្ត្រខេត្តនេះបន្ទាប់ពីសង្កេតឃើញថា សត្វផ្សោតភាគច្រើនងាប់ដោយប្រើប្រាស់ឧបករណ៍នេសាទខុសច្បាប់ និងជាប់សន្ទូចជាដើម។
ការហាមឃាត់នេះ យោងតាមអនុក្រឹត្យលេខ១៥៥ អនក្រ.បក ចុះថ្ងៃទី២៥ ខែកញ្ញា ឆ្នាំ២០១២ របស់រាជរដ្ឋាភិបាលកម្ពុជាស្ដីពី ការបង្កើតតំបន់គ្រប់គ្រង និងការពារសត្វផ្សោតទន្លេមេគង្គ។
សេចក្តីជូនដំណឹងរដ្ឋបាលខេត្តក្រចេះ ចុះថ្ងៃទី៧ ខែមីនា ឆ្នាំ២០២៤ បានលើកឡើងថា នាពេលកន្លងមក រដ្ឋបាលខេត្ត បានសង្កេតឃើញថា សត្វផ្សោតរស់នៅតាមដងទន្លេមេគង្គ ជាពិសេសរស់នៅតំបន់អន្លង់ផ្សោតកាំពី និងជ្រោយបន្ទាយ ភាគច្រើនងាប់ដោយការប្រើប្រាស់ឧបករណ៍នេសាទហាមឃាត់ដូចជា អាំងវែកទ័រឆក់ត្រី មងគ្រប់ប្រភេទ និងសន្ទូចរនងនៅក្នុងកន្លែងដែលផ្សោតរស់នៅ។
រដ្ឋបាលខេត្តឱ្យដឹងទៀតថា បើទោះបីជាមន្ត្រី ជំនាញ ឆ្មាំទន្លេ អាជ្ញាធរពាក់ព័ន្ធ និងសហគមន៍នេសាទខិតខំទប់ស្កាត់ និងបង្ក្រាបជាច្រើនករណីមកហើយក្តី ប៉ុន្តែអ្នកនេសាទបានលួចប្រើប្រាស់ឧបករណ៍ហាមឃាត់នៅពេលយប់។
រដ្ឋបាលខេត្តសង្កត់ធ្ងន់ថា៖«សកម្មភាពល្មើសច្បាប់ទាំងនេះ គឺធ្វើឱ្យប៉ះពាល់យ៉ាងធ្ងន់ធ្ងរដល់ធនធានជលផល ជាពិសេសសត្វផ្សោតទន្លេមេគង្គដែលជារតនសម្បត្តិធម្មជាតិមានជីវិតដ៏ពិសិដ្ឋរបស់ជាតិ»។
ឆ្លៀតក្នុងឱកាសនេះរដ្ឋបាលខេត្តក្រចេះ អំពាវនាវដោយទទូចដល់បងប្អូនប្រជាពលរដ្ឋ ជាពិសេសអ្នកនេសាទ ចូលរួមដោយស្ម័គ្រចិត្តប្រគល់ជូនអាជ្ញាធរមូលដ្ឋាន និងមន្ត្រីជំនាញជលផលនូវឧបករណ៍នេសាទល្មើសច្បាប់ទាំងនោះ ដែលកំពុងប្រើប្រាស់នៅក្នុងតំបន់ស្នូលទី៤ ស្ថិតនៅក្នុងឃុំជ្រោយបន្ទាយ ស្រុកព្រែកប្រសព្វ និងឃុំសំបុក ឃុំថ្មគ្រែ ស្រុកចិត្របុរី ខេត្តក្រចេះ ចាប់ពីក្បាលកោះទ្រង់ឡើង រហូតដល់ភូមិក្បាលជួរ មានប្រវែង ២១,៦៥ គីឡូម៉ែត្រ។ បើតាមរដ្ឋបាលខេត្ត ទីតាំងដែលបានរៀបរាប់ខាងលើនេះគឺជាតំបន់សក្តានុពល មានហ្វូងផ្សោតរស់នៅ និងបំផ្លាស់ទី ព្រមទាំងតំបន់គ្រប់គ្រង ការពារសត្វផ្សោតផងដែរ។
បន្ថែមពីនេះ រដ្ឋបាលខេត្តក្រចេះ ដែលមានខណ្ឌរដ្ឋបាលជលផល នៃមន្ទីរកសិកម្ម រុក្ខាប្រមាញ់ និងនេសាទ ជាសេនាធិការ បានព្រមាននឹងចាត់វិធានការអនុវត្តតាមនីតិវិធីច្បាប់ស្តីពីជលផលជាធរមាន ដោយប្រើប្រាស់យន្តការចុះឆែកឆេរដល់លំនៅឋានក្នុងករណីបងប្អូនប្រជាពលរដ្ឋអ្នកនេសាទមិនអនុវត្តតាមសេចក្តីជូនដំណឹងនេះ។
លោក អ៊ុក វិបុល ប្រធាននាយកដ្ឋានអភិរក្សជលផល នៃក្រសួងកសិកម្ម រុក្ខាប្រមាញ់ និងនេសាទធ្លាប់ប្រាប់ថាគិតត្រឹមខែកុម្ភៈ ឆ្នាំ២០២៤ កម្ពុជាទទួលបានកូនផ្សោតចំនួន ៣ក្បាលហើយ បើប្រៀបធៀបរយៈពេលដូចគ្នាក្នុងឆ្នាំ២០២៣ ដែលមានកូនផ្សោត១ក្បាល។ លោកបន្ថែមថា វត្តមានកំណើនចំនួនកូនផ្សោតនេះ វាជាទិន្នាការមួយដ៏ល្អ នាពេលអនាគត ដែលនឹងមានចំនួនកើនឡើងជាបន្តបន្ទាប់ ក្រោមកិច្ចខិតខំប្រឹងប្រែងពីគ្រប់ភាគីពាក់ព័ន្ធក្នុងការការអភិរក្សនិងការពារ។យ៉ាងណាមិញ លោកក៏បានណែនាំឱ្យប្រជាពលរដ្ឋត្រូវចៀសវាងការប្រើប្រាស់ឧបករណ៍នេសាទដែលបង្កហានិភ័យដល់សត្វផ្សោត ពីព្រោះផ្សោតជាសម្បត្តិបេតិកភណ្ឌធម្មជាតិមានជីវិតដ៏វិសិដ្ឋរបស់កម្ពុជា។
បើតាម លោក អ៊ុក វិបុល តាមការប៉ាន់ស្មានផ្សោតដែលរស់នៅក្នុងខេត្តស្ទឹងត្រែង និងក្រចេះ មានចំនួនប្រមាណជា ៩០ក្បាលទាំងផ្សោតមេពូជ និងផ្សោតវ័យជំទង់៕