លោកទៀ សីហា ក្នុងជំនួបពិភាក្សាការងារជាមួយលោកចាន់សាម៉ន ចាន់យ៉ាឡាត កាលពីថ្ងៃទី៤ ខែមីនា ។ រូបថត ក្រសួងការពារជាតិ
ភ្នំពេញៈ មន្រ្តីការពារជាតិកម្ពុជា និងឡាវ ប្តេជ្ញាបង្កើនកិច្ចសហប្រតិបត្តិការផ្នែកកងទ័ពឱ្យកាន់តែស៊ីជម្រៅបន្ថែមទៀត ដើម្បីនាំមកនូវការរីកចម្រើនដល់កងទ័ពទ្វេភាគីខណៈភាគីទាំង ២ ក៏បានលើកឡើងពីទំនាក់ទំនងល្អជាមួយគ្នាក្នុងនាមជាប្រទេសភូមិផងរបងជាមួយតាំងពីយូរលង់ណាស់មកហើយ។
ការប្តេជ្ញាចិត្តរវាងប្រទេសទាំង ២ ធ្វើឡើង តាមរយៈជំនួបទ្វេភាគី រវាងរដ្ឋមន្ត្រីការពារជាតិកម្ពុជាលោកទៀ សីហា និងរដ្ឋមន្ត្រីការពារជាតិឡាវ លោកចាន់សាម៉ន ចាន់យ៉ាឡាត កាលពីថ្ងៃទី ៤ ខែមីនា ឆ្នាំ ២០២៤ នៅអំឡុងចូលរួមកិច្ចប្រជុំចង្អៀតរដ្ឋមន្ត្រីការពារជាតិអាស៊ាន នៅទីក្រុងហ្លួងព្រះបាង នៅប្រទេសឡាវ។ នេះបើយោងតាមសេចក្តីប្រកាសព័ត៌មានក្រសួងការពារជាតិនៅព្រឹកថ្ងៃទី ៧ ខែមីនា។
ក្នុងឱកាសនោះ លោក ទៀ សីហា បានវាយតម្លៃខ្ពស់ចំពោះកិច្ចសហប្រតិបត្តិការផ្នែកកងទ័ព និងប្រជាជន នៃប្រទេសទាំង២ ដែលកន្លងមកក្នុងនាមប្រទេសភូមិផងរបងជាមួយ ហើយធ្លាប់មានប្រវត្តិទំនាក់ទំនងជាប្រវត្តិសាស្ត្រយូរលង់នឹងគ្នា។
រដ្ឋមន្ត្រីការពារជាតិកម្ពុជាបញ្ជាក់ថា៖ «ទំនាក់ទំនងរវាងស្ថាប័នការពារជាតិរវាងប្រទេសទាំង២ នឹងបន្តពង្រឹងនិងពង្រីកកិច្ចសហប្រតិបត្តិការនឹងគ្នាឱ្យកាន់តែជិតស្និទ្ធបន្ថែមទៀត ដើម្បីនាំមកនូវការរីកចម្រើនដល់កងទ័ពនៃប្រទេសទាំង ២ ស្របពេលរដ្ឋាភិបាលកម្ពុជាថ្មីដឹកនាំដោយលោក ហ៊ុន ម៉ាណែត កំពុងខិតខំប្រឹងប្រែងពង្រឹងកិច្ចសហប្រតិបត្តិការជាមួយនឹងប្រទេសជិតខាង ក្នុងបំណងនាំមកនូវសន្តិភាព ស្ថិរភាព និងការអភិវឌ្ឍ»។
ជាមួយគ្នានេះ លោក ចាន់សាម៉ន ចាន់យ៉ាឡាត បានគូសបញ្ជាក់ថា កម្ពុជានិងឡាវ មានទំនាក់ទំនងល្អជាប្រពៃណី ជាបងប្អូន ដែលមានវប្បធម៌ ប្រពៃណី ជាមួយគ្នាទាំងពីយូរលង់តពីជំនាន់មួយទៅជំនាន់មួយ ហើយលោកក៏កោតសរសើរដល់កម្ពុជាដែលទទួលបានការអភិវឌ្ឍទៅលើវិស័យសង្គម និងសេដ្ឋកិច្ច។
លោកសង្កត់ធ្ងន់ថា៖ «ប្រទេសទាំង ២ កងទ័ពទាំង ២ កម្ពុជា-ឡាវ នឹងបន្តកិច្ចសហប្រតិបត្តិការគ្នាកាន់តែជិតស្និទ្ធថែមទៀត ជាពិសេសបន្តពង្រឹងនូវទំនាក់ទំនង ដែលសម្តេចតេជោ ហ៊ុន សែន អតីតនាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចពិជ័យសេនា ទៀ បាញ់ អតីតឧបនាយករដ្ឋមន្ត្រី រដ្ឋមន្រ្តីក្រសួងការពារជាតិកម្ពុជា បានខិតខំកសាងឡើងនូវកិច្ចសហប្រតិបត្តិការនិងទំនាក់ទំនងល្អនេះ»។
ជាមួយគ្នានេះ រដ្ឋមន្ត្រីការពារជាតិឡាវ បានសម្តែងការសាទរចំពោះកម្ពុជាដែលទទួលបានជោគជ័យក្នុងការធ្វើជាសហប្រធាននៃកិច្ចប្រជុំរដ្ឋមន្ត្រីការពាជាតិអាស៊ាន ADMM-បូក ជាមួយចិន លើការងារមីនមនុស្សធម៌កន្លងមក ក៏ដូចជាធ្វើការសហប្រធានជាមួយអូស្ត្រាលីលើជំនាញសន្តិសុខព័ត៌មានវិទ្យា នាពេលកន្លងមក។
លោក ក៏បានស្នើសុំកម្ពុជាជួយគាំទ្រឡាវដែលនឹងធ្វើជាសហប្រធានជាមួយរុស្ស៊ី លើការងារសង្គ្រោះគ្រោះមហន្តរាយមនុស្សធម៌ផងដែរ។
ជាការឆ្លើយតបទៅនឹងសំណើនេះ លោក ទៀ សីហា បានថ្លែងថា៖ «ការធ្វើសហប្រធានរវាងឡាវ និងសហព័ន្ធរុស្ស៊ី ក្នុងក្រុមការងារជំនាញកិច្ចប្រជុំ ADMM បូក លើការងារសង្គ្រោះមហន្តរាយមនុស្សធម៌ នឹងនាំមកនូវអត្ថប្រយោជន៍ដល់ប្រទេសឡាវ រួមនឹងកម្ពុជា ព្រមទាំងប្រទសអាស៊ានផងដែរ»។
ជុំវិញរឿងនេះ លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា លើកឡើងថា កម្ពុជានិងឡាវ មានទំនាក់ទំនងល្អជាប្រពៃណីនឹងគ្នា ក្នុងនាមជាអ្នកជិតខាងល្អ ដោយសារលក្ខខណ្ឌភូមិសាស្ត្រ វប្បធម៌ ប្រវត្តិសាស្ត្រ។
លោកបន្តថា ក្នុងកិច្ចសហប្រតិបត្តិការកងទ័ពរវាងប្រទេសទាំង ២ វិញ ក៏មានសារៈសំខាន់ផងដែរ ព្រោះប្រទេសភូមិផងរបងជាមួយគ្នានេះមានបញ្ហាជាកង្វល់រួមនឹងគ្នាផ្នែកសន្តិសុខ តួយ៉ាង ការប្រយុទ្ធប្រឆាំងគ្រឿងញៀនតាមបណ្តោយព្រំដែន ការជួញដូរមនុស្ស និងឧក្រិដ្ឋកម្មឆ្លងដែន។
លោកសង្កត់ធ្ងន់ថា៖ «ទំនាក់ទំនងល្អផ្នែកសន្តិសុខរវាងកម្ពុជានិងឡាវ ផ្តល់ផលប្រយោជន៍ទៅវិញទៅមក ដែលអាចបញ្ចៀសការប្រឈមមុខគ្នាណាមួយខាងផ្លូវប្រដាប់អាវុធ។ ក្នុងនាមជាប្រទេសជិតខាងល្អនឹងគ្នា ជាមិត្តភាពជាប្រពៃណីយូរអង្វែង កម្ពុជានិងឡាវ ត្រូវតែបន្តកិច្ចសហប្រតិបត្តិការគ្រប់វិស័យ ជាពិសេសផ្នែកការពារជាតិ និងសន្តិសុខ»៕
