លោកស្រី ម៉ែន សំអន (កណ្តាល) នៅក្នុងពីធីប្រកាសសេចក្តីសម្រេចទទួលស្គាល់ការកែសម្រួល និងបំពេញសមាសភាពគណៈកម្មការសមាគមនារីកម្ពុជា នាថ្ងៃទី៦ ខែមីនា។ រូបថត Neth Pheaktra FB
ភ្នំពេញៈ លោកស្រី ម៉ែន សំអន ឧត្តមទីប្រឹក្សាផ្ទាល់ព្រះមហាក្សត្រ និងជាប្រធានសមាគមនារីកម្ពុជា ដើម្បីសន្តិភាព និងអភិវឌ្ឍន៍បានថ្លែងថា សមាគម ពិតជាមានមោទនភាពខ្លាំងណាស់ ចំពោះការលះបង់កម្លាំងកាយចិត្តនិងសម្ភាររបស់នារីនៅទូទាំងប្រទេសក្នុងការការពារស្តារ និងអភិវឌ្ឍន៍ប្រទេសជាតិ។
ការថ្លែងរបស់លោកស្រី ម៉ែន សំអន បានធ្វើឡើងនៅក្នុងពីធីប្រកាសសេចក្តីសសម្រេចទទួលស្គាល់ការកែសម្រួល និងបំពេញសមាសភាពគណៈកម្មការសមាគមនារីកម្ពុជា ដើម្បីសន្តិភាព និងអភិវឌ្ឍន៍ នៃក្រសួងសង្គមកិច្ច អតីតយុទ្ធជន និងយុវនីតិសម្បទា នាថ្ងៃទី ៦ ខែមីនា ឆ្នាំ ២០២៤ ។
លោកស្រីបានថ្លែងដូច្នេះថា៖ «នារីបានរួមចំណែកបង្កើតនូវសមិទ្ធផលដ៏ធំធេង ដែលគណបក្សក៏ដូចជារាជរដ្ឋាភិបាលយើងទទួលបានរយៈពេល ៤៤ឆ្នាំ កន្លងមកនេះ ហើយបានប្រែក្លាយប្រទេសកម្ពុជាពីប្រទេសមួយពោរពេញដោយសង្គ្រាម វិនាសកម្ម ព្រាត់ប្រាស រងទុក្ខវេទនា ការឈឺចាប់ ខ្លោចផ្សារកទីបំផុតគ្មាន និងឯកោនៅលើឆាកអន្តរជាតិ ឱ្យក្លាយទៅជាប្រទេសមួយដែលមានសន្តិភាព ស្ថិរភាព សុវត្ថិភាព មានការរីកចម្រើនគ្រប់វិស័យ ប្រជាជនមានជីវភាពធូរធារជាលំដាប់និងមានការទទួលស្គាល់ពីសហគមន៍អន្តរជាតិ»។
ការកែសម្រួលសមាសភាពនេះក៏មានគោលបំណងពង្រឹងនិងពង្រីកចំណងសាមគ្គីភាព មិត្តភាព កិច្ចសហការ ចែករំលែកនូវព័ត៌មាន បទពិសោធន៍ល្អៗ ក្នុងការបំពេញភារកិច្ច បញ្ហាប្រឈម និងរួមគ្នាដោះស្រាយបញ្ហា ព្រមទាំងការប្តេជ្ញាចិត្តក្នុងការសម្រេចឱ្យបាននូវផែនការយុទ្ធសាស្ត្របញ្ជ្រាបយេនឌ័រ ដើម្បីលើកកម្ពស់សមភាពយេនឌ័រ និងបង្កើនភាពអង់អាចដល់ស្ត្រី។
លោកស្រីមានប្រសាសន៍ទៀតថា៖ «ខ្ញុំសង្ឃឹមយ៉ាងមុតមាំថា គណៈកម្មការសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ នឹងខិតខំប្រឹងប្រែងអស់ពីសមត្ថភាព កម្លាំងកាយចិត្ត ប្រាជ្ញាស្មារតី អនុវត្តឱ្យបានជោគជ័យនូវទិសដៅភារកិច្ចដែលបានកំណត់ ជាពិសេសមានចក្ខុវិស័យវែងឆ្ងាយ ដើម្បីឈានទៅសម្រេច តាមផែនការ និងអភិវឌ្ឍន៍ប្រកបដោយចីរភាព»។
លោក ជា សុមេធី រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា បានថ្លែងថា ផ្អែកលើកម្មវិធីគោលនយោបាយរបស់រាជរដ្ឋាភិបាលនីតិកាលទី៧ នៃរដ្ឋសភា ការលើកកម្ពស់ស្ថានភាពស្ត្រី នៅតែបន្តយកចិត្តទុកដាក់លើកស្ទួយតម្លៃស្ត្រីខ្មែរនៅក្នុងសង្គម លើកកម្ពស់ស្ថានភាព តួនាទី និងសិទ្ធិស្ត្រី និងលុបបំបាត់នូវរាល់ទស្សនៈ ឬឥរិយាបថរើសអើងស្រ្តី និងជនងាយរងគ្រោះ។ បន្ថែមពីនេះ រដ្ឋាភិបាលក៏បានជំរុញស្រ្តីឱ្យចូលរួម ការងារសង្គម ដើម្បីបង្កើនចំនួនស្ត្រីក្នុងការធ្វើសេចក្ដីសម្រេចចិត្តទាំងខាងនយោបាយ និងសង្គម សេដ្ឋកិច្ច។
លោកបញ្ជាក់ថា៖ «ក្រសួងក៏បានខិតខំកសាងសមត្ថភាពលើការបញ្ជ្រាបយេនឌ័រតាមវិស័យ ដោយបានបង្កើតក្រុមការងារបញ្ជ្រាប យេនឌ័រ ដែលមានកាតព្វកិច្ចរៀបចំផែនការសកម្មភាពបញ្ជ្រាបយេនឌ័រក្នុងវិស័យ ដែលបង្កលក្ខណៈឱ្យស្ត្រីបានចូលរៀនសូត្រ ពង្រឹងសមត្ថភាពរបស់ខ្លួន និងទទួលបានតួនាទីជាអ្នកដឹកនាំទាំងក្នុងកម្រិតបច្ចេកទេស និងកម្រិត នយោបាយជាបន្តបន្ទាប់»។
សូមជម្រាបថា សមាគមនារីកម្ពុជាដើម្បីសន្តិភាព និងអភិវឌ្ឍន៍បានបន្តវេនពីសមាគមនារីសង្គ្រោះជាតិកម្ពុជា ដែលបានចាប់បដិសន្ធិឡើងនៅថ្ងៃទី ២ ខែធ្នូ ឆ្នាំ ១៩៧៨ គឺជាអង្គការមហាជនមួយស្ថិតនៅក្រោមការដឹកនាំរបស់គណបក្សប្រជាជនកម្ពុជា និងទទួលខុសត្រូវលើការងារនារី និងកុមារនៅទូទាំងប្រទេស។ សមាគមនារីមានរចនាសម្ព័ន្ធ ៤ ថ្នាក់គឺ ថ្នាក់កណ្តាល, ក្រសួង-ស្ថាប័ន-រាជធានី-ខេត្ត, ក្រុង-ស្រុក-ខណ្ឌ និងឃុំ-សង្កាត់។
នៅឆ្នាំ ១៩៩១ សមាគមនារីបានប្រែក្លាយខ្លួនទៅជាសមាគមមិនមែនរដ្ឋាភិបាល ធ្វើសកម្មភាពគាំទ្រកម្មវិធីគោលនយោបាយ គោលការណ៍ដឹកនាំរបស់គណបក្សប្រជាជន និងមានទំនាក់ទំនងជាមួយអង្គការសមាគមដៃគូអភិវឌ្ឍន៍ជាតិ-អន្តរជាតិ ដើម្បីពិគ្រោះយោបល់ និងស្វែងរកការគាំទ្រចំពោះគម្រោងស្ត្រីដើម្បីអភិវឌ្ឍសម្រាប់លើកកម្ពស់ជីវភាពសុខុមាលភាពរបស់ប្រជាពលរដ្ឋ ជាពិសេសស្ត្រីនិងកុមារ៕
