.jpg)
ក្រសួងអប់រំ យុវជន និងកីឡា អនុញ្ញាតឲ្យសាលារៀនប្ដូរម៉ោងសិក្សា ដោយបញ្ចប់នៅម៉ោង ១០ព្រឹក និងចាប់ផ្ដើមម៉ោង ២ រសៀលវិញ ដោយសារតែអាកាសធាតុក្ដៅខ្លាំងដែលនៅតំបន់ខ្លះឡើងលើសពី ៤០អង្សាសេ។
នៅក្នុងសេចក្ដីជូនដំណឹងចុះថ្ងៃទី៣០ ខែមេសានេះ លោក ហង់ជួន ណារ៉ុន រដ្ឋមន្ត្រីក្រសួងអប់រំបញ្ជាក់ថា អាកាសធាតុក្ដៅខ្លាំងកើតមានចន្លោះពីម៉ោង ១០ ព្រឹក ដល់ម៉ោង ២ រសៀល។ ដូច្នេះ លោកអនុញ្ញាតឲ្យសាលារៀនប្ដូរម៉ោងសិក្សាពីម៉ោង ៧ព្រឹកដល់ម៉ោង ១១ ឬ ១២ មកនៅត្រឹមម៉ោង ១០ព្រឹក ខណៈដែលពេលរសៀល សាលាអាចចាប់ផ្ដើមនៅម៉ោង ២រៀល ដែលពីមុនចាប់ផ្ដើមនៅម៉ោង ១រសៀល។
ការផ្ដាស់ប្តូរម៉ោងសិក្សានេះ គឺដើម្បីបង្ការទប់ស្កាត់ហានិភ័យ និង ចៀសវាងជំងឺផ្សេងៗ ដែលអាចប៉ះពាល់ដល់សុខភាព ការរៀនសូត្ររបស់សិស្សានុសិស្ស និង ការបំពេញការងាររបស់លោកគ្រូ អ្នកគ្រូ។ នេះបើតាមការបញ្ជាក់របស់លោក។
លោកបន្ថែមថា ក្នុងមួយម៉ោងសិក្សា លោកគ្រូ អ្នកគ្រូ ត្រូវឲ្យសិស្សឈប់សម្រាករយៈពេល ១៥ នាទី។
លើសពីនេះ ក្រសួងប្រាប់ឲ្យគ្រឹះស្ថានសិក្សាត្រៀមទឹកសម្រាប់គ្រូបង្រៀន និង សិស្សប្រើប្រាស់ និងណែនាំសិស្សឲ្យយកទឹកឆ្អិនពីផ្ទះមកទទួលទាន។
លោក ហង់ជួន ណារ៉ុន បញ្ជាក់ដូច្នេះថា៖ «ក្នុងករណីសីតុណ្ហភាពឡើងខ្លាំងលើសពីការគ្រប់គ្រង គ្រឹះស្ថានសិក្សាមានសិទ្ធិក្នុងការសម្រេចជាក់ស្តែង»។
គោលការណ៍នេះនឹងត្រូវអស់សុពលភាពនៅពេលរដូវក្តៅបានកន្លងផុតទៅ៕
