.jpg)
លោក ហ៊ុន ម៉ាណែត ចូលរួមក្នុងពិធីអបអរសាទរ ទិវាសេរីភាពសារព័ត៌មានសកលលោក ឆ្នាំ២០២២ ក្រោមប្រធានបទ "សារព័ត៌មានក្នុងសម្ពាធប្រព័ន្ធឌីជីថល" នៅភ្នំពេញ។ រូបថត Hun Manet page
មន្ត្រី និងអ្នកធ្វើការក្នុងវិស័យសារព័ត៌មានមើលឃើញពីសារៈសំខាន់នៃជំនួបរវាងនាយករដ្ឋមន្ត្រី និង អ្នកសារព័ត៌មាន ដែលជំនួបលើកទី៦ នឹងធ្វើឡើងនៅថ្ងៃទី៣ ខែឧសភានេះ។
ពិធីជួបជុំរវាងអ្នកសារព័ត៌មាននិងអ្នកបម្រើការក្នុងវិស័យប្រព័ន្ធផ្សព្វផ្សាយ ជាមួយនាយករដ្ឋមន្ត្រីថ្មីនៅថ្ងៃទី៣ ខែឧសភានេះគឺជាការជួបជុំលើកទី៦ ដែលពីមុនរវាងអតីតនាយករដ្ឋមន្ត្រី លោក ហ៊ុន សែន។ ប៉ុន្តែនេះជាការជួបជុំលើកទីមួយសម្រាប់លោកនាយករដ្ឋមន្ត្រី ហ៊ុន ម៉ាណែត។
លោក ប៉ែន បូណា អ្នកនាំពាក្យរាជរដ្ឋាភិបាលកម្ពុជា បានថ្លែងថា ជំនួបរវាងលោកនាយករដ្ឋមន្ត្រីនិងអ្នកសារព័ត៌មានគឺជាការបន្តវប្បធម៌ប្រពៃណីដ៏ល្អរបស់លោក ហ៊ុន សែន អតីតនាយករដ្ឋមន្ត្រី ដែលលោកតែងជួបជាមួយប្រជាពលរដ្ឋគ្រប់មជ្ឈដ្ឋាន ដូចជា កីឡាករ សិល្បៈករ អ្នកសារព័ត៌មាន កម្មករ ជាដើម។
លោកថ្លែងដូច្នេះថា៖ «ការជួបរបស់ថ្នាក់ដឹកនាំនិងប្រជាពលរដ្ឋគឺដើម្បីឲ្យយល់គ្នាកាន់តែច្បាស់ពីគោលនយោបាយរបស់រដ្ឋាភិបាលដែលអ្នកសារព័ត៌មានអាចស្ដាប់ផ្ទាល់នូវប្រសាសន៍របស់នាយករដ្ឋមន្ត្រីអំពីវិស័យសារព័ត៌មាន បង្ហាញពីភាពស្និទ្ធស្នាល ក៏ដូចជាការទទួលបានព័ត៌មានថ្មីៗពីរាជរដ្ឋាភិបាល»។
លោក ណុប វី នាយកប្រតិបត្តិសម្ព័ន្ធសារព័ត៌មានកម្ពុជា ក៏មើលឃើញពីសារៈសំខាន់នៃជំនួបនេះដែរ ដោយលោកថ្លែងថា នាយកនាយករដ្ឋមន្ត្រីដែលជាថ្នាក់ដឹកនាំកំពូលអាចធ្វើការសម្រេចចិត្ត និងផ្ដល់យោបល់ដល់អ្នកសារព័ត៌មាន។
យ៉ាងណាក៏ដោយ លោកចង់ឃើញវេទិកានេះ មានការអនុញ្ញាតឲ្យអ្នកសារព័ត៌មានអាចលើកឡើងពីកង្វល់របស់ពួកគេផ្ទាល់ដើម្បីឲ្យលោកនាយករដ្ឋមន្ត្រីបានដឹង។
លោកលើកឡើងអំពីបញ្ហាមួយចំនួនដូចជាការដកអាជ្ញាប័ណ្ណរបស់អ្នកសារព័ត៌មាន ការពន្លឿនច្បាប់ទទួលបានព័ត៌មាន ការធ្វើវិសោធនកម្មច្បាប់របបសារព័ត៌មាន ការមិនអនុញ្ញាតឲ្យអ្នកសារព័ត៌មានពីស្ថានប័នខ្លះចូលក្នុងកម្មវិធីមួយចំនួន និងបញ្ហាមួយចំនួនទៀត។
លោកនិយាយថា៖ «រដ្ឋាភិបាលលោកមានអំណាចមួយក្នុងការធានាថា អ្នកសារព័ត៌មាននឹងមិនទទួលបានការគំរាមកំហែង ការរើសអើង ឬសកម្មភាពផ្សេងៗទៀតតាមអនឡាញ និងផ្ទាល់ ជាពិសេសបញ្ចប់ការបៀតបៀនទៅលើស្ត្រីអ្នកសារព័ត៌មាន»។
លោក ទេព អស្នារិទ្ធ អ្នកនាំពាក្យក្រសួងព័ត៌មានបានប្រាប់ភ្នំពេញប៉ុស្តិ៍ថា ជំនួបនៅថ្ងៃទី៣ ខែឧសភានេះ គឺស្របគ្នានឹងទិវាសេរីភាពសារព័ត៌មានពិភពលោក ដែលកាន់តែធ្វើឲ្យជំនួបនេះមានសារៈសំខាន់ថែមទៀត។
លោកថា ជំនួបនេះក៏ជាឱកាសដ៏វិសេសវិសាលប្រចាំឆ្នាំសម្រាប់អ្នកសារព័ត៌មាននៅកម្ពុជាបានប្រាស្រ័យដោយផ្ទាល់ជាមួយលោកនាយករដ្ឋមន្ត្រី ក៏ដូចជា ឱកាសក្នុងការផ្តល់ព័ត៌មានពីកង្វល់ និងបញ្ហានានា ដែលអ្នកសារព័ត៌មានទាំងប្រព័ន្ធផ្សព្វផ្សាយបុរាណនិងទំនើបបានជួបប្រទះ ដើម្បីស្វែងរកការគាំទ្រក៏ដូចជា ដំណោះស្រាយពីសំណាក់នាយករដ្ឋមន្ត្រី។
លោកក៏បញ្ជាក់ដែរថា ក្រោមការដឹកនាំរបស់លោក នេត្រ ភក្ត្រា រដ្ឋមន្ត្រីក្រសួងព័ត៌មាន ក្រសួងបានជួបប្រជុំជាមួយជាមួយអ្នកសារព័ត៌មាន អង្គភាពសារព័ត៌មាន និងសមាគមសារព័ត៌មាន ដើម្បីស្តាប់មតិយោបល់ សំណូមពរ សម្រាប់រៀបចំជាសំណើក្នុងក្របខណ្ឌរួមមួយ ក្នុងការដាក់ជូនលោកនាយករដ្ឋមន្រ្ដីពិនិត្យ និង ដោះស្រាយ។
គិតចាប់តាំងពីឆ្នាំ ២០១៧ រហូតមកដល់ឆ្នាំ ២០២៣នេះ ជំនួបរវាងអ្នកសារព័ត៌មានជាមួយនាយករដ្ឋមន្រ្ដី បានធ្វើឡើងចំនួន ៥លើក រួចមកហើយ ប៉ុន្តែត្រូវខកខានធ្វើនៅឆ្នាំ ២០២១ និង ឆ្នាំ២០២២ ដោយសារការរីករាលដាលនៃជំងឺកូវីដ១៩ ។
លោកថ្លែងដូច្នេះថា៖ «ជារួម ជំនួបនេះផ្ដល់ឱកាសដល់អ្នកសារព័ត៌មានអាចពិភាក្សា លើកឡើងពីបញ្ហា សំណូមពរ ឬកង្វល់ផ្សេងៗ ដើម្បីដាក់ជូនប្រមុខរាជរដ្ឋាភិបាលពិនិត្យ និងជួយដោះស្រាយ។ ជំនួបនេះមានសារៈសំខាន់ណាស់ជាការរួមចំណែកលើកកម្ពស់ សិទ្ធិសេរីភាពសារព័ត៌មាន និងសេរីភាពក្នុងការបញ្ចេញមតិនៅកម្ពុជា»៕
