.jpg)
លោក ហ៊ុន ម៉ានី អញ្ជើញបើកវិញ្ញាសាប្រឡងប្រជែងជ្រើសរើសគ្រូបង្រៀនអនុវិទ្យាល័យ ឱ្យចូលបម្រើការងារក្នុងក្របខណ្ឌក្រសួងអប់រំ យុវជន និងកីឡា នៅថ្ងៃទី២ ឧសភា។ រូបថត ក្រសួងមុខងារសាធារណៈ
ភ្នំពេញ៖ បេក្ខជនចំនួនជាង ៣ម៉ឺននាក់ បានចូលរួមប្រឡងប្រកួតប្រជែងជ្រើសរើសគ្រូបង្រៀនអនុវិទ្យាល័យឱ្យចូលបម្រើការងារក្នុងក្របខ័ណ្ឌក្រសួង អប់រំ យុវជន និងកីឡា ដែលមានចំនួនជាង ៤០០កន្លែង។
ការប្រឡងនេះធ្វើឡើងរយៈពេល ៤ថ្ងៃ ចាប់ពីថ្ងៃទី២ ដល់ ថ្ងៃទី៥ ខែឧសភា។ ក្នុងថ្ងៃចាប់ផ្តើមការប្រឡង លោក ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការប្រឡងប្រជែងបានបើកវិញ្ញាសាប្រឡង។
ការបើកវិញ្ញាសាប្រឡងនេះ មានការចូលរួមពីតំណាងមកពីក្រសួងអប់រំ យុវជន និងកីឡា ក្រសួងសេដ្ឋកិច្ច និងហិរញ្ញវត្ថុ អង្គភាពប្រឆាំងអំពើពុករលួយ អ្នកសង្កេតការណ៍មកពីសាកលវិទ្យាល័យនានា មហាជនដែលបានចុះឈ្មោះសង្កេតការណ៍ និង សហភាពសហព័ន្ធយុវជនកម្ពុជា (ស.ស.យ.ក.)។ នេះបើយោងតាមគេហទំព័រក្រសួងមុខងារសាធារណៈ។
លោក ហ៊ុន ម៉ានី ថ្លែងប្រាប់អ្នកសារព័ត៌មាននាថ្ងៃទី២ ខែឧសភាថា៖ «ចំពោះការរៀបចំការប្រឡងជ្រើសរើសគ្រូអនុវិទ្យាល័យចំនួន ៤៤១ នាក់នេះផងដែរ ក្នុងការអនុវត្តនៃនិយាមគឺយើងបើកជាប្រព័ន្ធចុះឈ្មោះឱ្យស្មើៗគ្នាតែម្តងក្នុងរយៈពេល ១ខែ។ ក្នុងពេលរយៈពេល ១ខែនេះ អ្នកដែលបានចុះនៅក្នុងបញ្ជីគឺ ៥១ ៨៤៩នាក់។ អ្នកបានបំពេញបែបបទហើយមានសិទ្ធិក្នុងការចូលប្រឡងដែលក្នុងនោះគឺមាន ៣៣ ៣១៤នាក់»។
លោកថ្លែងថា៖ «នៅក្នុងថ្ងៃនេះ គឺក្នុងចំណោមបេក្ខជនប្រមាណ ៣៣ ៣១៤ នាក់ គឺយើងរៀបចំបេក្ខជនប្រឡងនៅក្នុងថ្ងៃនេះ នៅសាលាភូមិន្ទភ្នំពេញនេះគឺ ៦ ៥៨៥នាក់ ដែលយើងបំបែកទៅជា ២ វេនទៀត»។
បើតាមការបញ្ជាក់របស់លោក ហ៊ុន ម៉ានី ក្នុងចំណោម ៣៣ ៣១៤ នាក់នេះ មានបេក្ខនារីចំនួន ២ ២១៥៨នាក់ ព្រះសង្ឃចំនួន ២២៤អង្គ និងបេក្ខជនដែលមានពិការភាពមានចំនួន១៨៦នាក់។ លើកនេះ គឺជាលើកទី ៦ នៃការរៀបចំធ្វើការជ្រើសរើសក្រោមនិយាមថ្មី។
លោកបន្ថែមថា ទោះបីមានការអនុវត្តការប្រឡង ៥ ដងមកហើយក៏ដោយ ក៏ពីដំណាក់កាលមួយទៅដំណាក់កាលមួយគឺមានការដកស្រង់បទពិសោធ ពិគ្រោះយោបល់គ្រប់ភាគីដើម្បីធ្វើយ៉ាងណាមិនមើលស្រាលទៅលើស្ថានភាពនោះ ដោយត្រូវមានការប្រុងប្រយ័ត្នជាបន្តបន្ទាប់។
លោករដ្ឋមន្ត្រីបញ្ជាក់ថា៖ «ចំពោះការរៀបចំលើកទី៦ មួយនេះ គឺយើងមានការគិតគូរជាជំហានៗបន្ថែមទៀតដែលក្នុងនោះ គឺយើងមានការបង្កើតអនុគណៈកម្មការត្រួតពិនិត្យ និង វាយតម្លៃដើម្បីធ្វើយ៉ាងណាយើងអាចសិក្សាពីប្រព័ន្ធ និង process (នីតិវិធី) ធ្វើការងាររបស់យើងដើម្បីយើងអាច improve [កែលម្អ] ជាបន្តបន្ទាប់តែម្តង។ ក្នុងលើកនេះ ពិតជាមានការកោតសរសើរដល់មន្ត្រីបច្ចេកទេសនិងសមាជិកគណៈកម្មការប្រឡង និង អនុគណៈកម្មការទាំងអស់។ គ្រប់ភាគីទាំងអស់ពិតជាមានការគិតគូរ ខំប្រឹងប្រែងមែនទែន»។
លោក ហ៊ុន ម៉ានី បន្ថែមថា៖ «អ្វីដែលយើងកំពុងតែខំប្រឹងប្រែងធ្វើនេះគឺជាការធ្វើឱ្យប្រសើរឡើងនូវប្រព័ន្ធជ្រើសរើសមន្ត្រីរាជការស៊ីវិល កសាងប្រព័ន្ធជំនឿទុកចិត្តមួយ ដែលពួកគាត់អាចទទួលយកហើយនិងជឿទុកចិត្តជាប្រចាំ និង ការផ្តល់ឱកាសឱ្យយុវជនយុវនារីយើងចូលរួមក្នុងការប្រកួតប្រជែង ហើយនិងចូលរួមការបម្រើការងារក្នុងក្របខ័ណ្ឌរដ្ឋបាលសាធារណៈរបស់យើង»។
ក្រសួងអប់រំ បញ្ជាក់តាមរយៈបណ្តាញសង្គមនាថ្ងៃទី២ ខែឧសភា ថា ការប្រឡងនេះប្រើប្រាស់មណ្ឌលប្រឡងចំនួន ៣ មណ្ឌល និងត្រូវបានប្រព្រឹត្តទៅប្រកបដោយ គុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព «ចេះគឺជាប់ ជាប់ដោយមោទនៈ មិនជាប់ដោយអស់ចិត្ត»។
ក្រសួងអប់រំបញ្ជាក់ថា៖ «សូមបេក្ខជនទាំងអស់យកឱកាសដែលរាជរដ្ឋាភិបាលបានផ្ដល់ជូនស្មើៗគ្នានេះ បញ្ចេញអស់ពីសមត្ថភាព ដើម្បីក្លាយខ្លួនជាមន្ត្រីរាជការស៊ីវិលរបស់កម្ពុជាម្នាក់ប្រកបដោយគុណភាព»៕
